Францын нэг дуучин “Монгол” хэмээх нэршлийг доромж утгаар хэрэглэх явдлыг өөгшүүлсэн нэгэн дуу гаргасан нь хүний эрхийн мэдрэмжтэй хэн бүхний дургүйцлийг төрүүлсэн хэрэг болоод байгаа талаар мэдээлж, эсэргүүцлийн арга хэлбэрт оролцохыг уриалж, ЮНЕСКО-гийн итгэмжит Нүүдэлчин Зам холбооны зохицуулагч, ИНАЛКО их сургуулийн Монгол хэл, бичгийн багш Ш.Номиндарь бидэнд энэхүү захидлыг илгээлээ.
Тэрээр “…Францын рэп дуучин Орэлсан шинээр гаргасан « L’odeur de l’essence » (Шатахууны үнэр) дуундаа Монгол нэрийг Монголчууд болон Монгол соёлоос гаралтай хэн бүхэнд туйлын доромж утгаар хэрэглэсэн байна. Уг дуунд:
2’57-оос эхлэн:
“Эргүү малуудыг (монголуудыг) авч зэвсэг өгөөд
Энийгээ « шударга ёс » гэчихжээ, гэмт хэргүүд нь илтгэнэ.”
3’11-ээс эхлэн:
“Эргүү малууд (монголууд) эксперт болсноос хойш
Эргүү малуудаар (монголуудаар), Монголын Эзэнт Гүрнээр хүрээлэгдэж,
Эргүү малуудад (монголуудад) таалагдахаар эргүү малуудыг (монголуудыг) хийж байна.”
гэсэн байгааг сонсч болно.
“Монгол” хэмээх нэрийг ийнхүү ашиглах нь доромжлол төдийгүй, Монгол соёлын тодотголд халдсан, хүний эрхэм чанарыг үл хүндэтгэсэн хэрэг хэмээн бид үзэж байна. Өнгөрсөн зуунуудын расист, алагчлах үзэлтэй хандлага өнөөгийн нийгэмд хэлбэржих ёсгүй. Хүний нэр төр, эрхэм чанар, соёлын олон төрлийг хүндэтгэх тал дээр франц хэлтнүүдийн сэтгэлгээнд ухралт үүсгэхэд ийнхүү нэмэрлэх нь өнөөгийн глобал виллэйж-ийн эрин үед туйлын хортой хэрэг болно. Дашрамд, Англи хэл энэхүү доромж утгыг хэдийнээ халж, Оксфордын толь бичгээс хассан билээ. Франц хэлнээ хэрэглэгдсээр буй энэ утгыг халахаар хүчин чармайлтаа бид үргэлжлүүлж байна…” гэжээ. Мөн өөрийн санааг зурагжуулж, PDF файл хэлбэрээр бидэнд явуулсныг элдэв засваргүйгээр бүрэн эхээр нь та бүхэнд хүргэж байна. Хэрхэхийг эрхэм уншигч та оюун ухаандаа болгооно уу.
ЮНЕСКО-гийн итгэмжит Нүүдэлчин Зам холбооноос Монголчууддаа хандаж гаргасан уриалга:
