Ажиллах хүчний судалгааны 2022 оны 2 дугаар улирлын дүнгээр улсын хэмжээнд 15 ба түүнээс дээш насны нийт хүн амын 1.3 сая нь ажиллах хүч байна. Ажиллах хүчний 1.2 (92.2%) сая нь ажиллагчид байна. Ажиллагчид өмнөх оны мөн үеэс 59.2 (5.4%) мянгаар, өмнөх улирлаас 36.4 (3.2%) мянгаар өссөн байна.
Улсын хэмжээнд 15 ба түүнээс дээш насны хүн амын 865.4 (40.7%) мянга нь ажиллах хүчнээс гадуурх хүн ам байна. Тэдгээрийн 44.6 (5.2%) мянга нь цалин хөлс, орлого олох ажил хайх эсвэл хийх нөхцөл нь бүрдвэл ажиллах хүчний эгнээнд шилжихэд бэлэн байгаа боломжит ажиллах хүч байна.
Хөдөлмөрийн дутуу ашиглалтын 44.6 (29.8%) мянга нь боломжит ажиллах хүч, 98.5 (66.0%) мянга нь ажилгүй хүн, 6.3 (4.2%) мянга нь цаг хугацаанаас хамаарсан бүрэн бус хөдөлмөр эрхлэгчид байна.
Ажилгүй хүний тоо өмнөх оны мөн үеэс 15-39 насны бүлэгт 7.9 мянгаар, 50-54 насны бүлэгт 2.6 мянгаар, өмнөх улирлаас 15-24 насны бүлэгт 5.4 мянгаар, 30-39 насны бүлэгт 7.5 мянгаар тус тус буурчээ.
Боломжит ажиллах хүч өмнөх оны мөн үеэс 15-24 насны бүлэгт 12.1 мянгаар, 30-49 насны бүлэгт 21.2 мянгаар, өмнөх улирлаас 30-34 насны бүлэгт 2.9 мянгаар, 40- 49 насны бүлэгт 4.9 мянгаар тус тус буурсан байна.
Жич: Ажиллах хүчнээс гадуурх хүн ам гэж сургуульд суралцаж байгаа, гэрийн ажилтай, өндөр настан, өндөр насны тэтгэвэр тогтоолгосон, хөгжлийн бэрхшээлтэй болон ажил хайх итгэл алдарсан зэрэг шалтгаанаар тухайн хугацаанд ажиллах хүчинд хамаарахгүй хөдөлмөрийн насны хүн амыг ойлгоно.
Эх сурвалж: ҮСХ
