“Эрдэнэс Тавантолгой” ХК-ийн Бүрэн эрхт төлөөлөгч Ж.Ганбат цаг үеийн асуудлаар мэдээлэл өглөө.
Тэрбээр “Тус компанид ажилласнаас хойш санхүүгийн сахилга баттай холбоотой учир дутагдалтай зүйлүүд байна. Тухайн гэрээг гүйцэтгэсэн компанийн гүйцэтгэлийг хянах асуудал хангалтгүй байна. Жишээ хэлэхэд, улсын төсвийн хөрөнгө оруулалтаар сургууль, цэцэрлэг барьж буй компани ажлаа өөрсдөө хийгээд тодорхой хувийн гүйцэтгэлтэйгээр Сангийн яамнаас санхүүжилт авдаг. Харин “Эрдэнэс Тавантолгой” компанийн нийтлэг нэг алдаа бол ажил гүйцэтгээгүй байхад 20-30 хувийн мөнгийг урьдчилж өгдөг байдлаар ажиллаж ирсэн байна. Гэрээ байгуулаад л маргааш нь урьдчилгаа төлбөрийн 20-30 хувийг нь авдаг.
70 тэрбум төгрөгийн төсөвт өртөгтэй ажлын гэрээг байгуулсныхаа маргааш нь 20 тэрбум төгрөгийг нь өгнө гэдэг асуудал үүссэнээс үүдэн тус компанийн таван албан тушаалтныг АТГ-т шалгуулахаар өгсөн.
Мөн тендерт журмынхаа дагуу шалгарсан компанитай гэрээ байгуулдаггүй асуудал байна. Яагаад байгуулдаггүй нь тодорхой бус. Ингэсээр байгаад тендерийн хугацаа дуусдаг. Үүнээс үүдэн тухайн компанийн үйл ажиллагаанд доголдол үүсэх тохиолдол бий. АТГ-т уг асуудлыг шалгаж өгөөч гэдэг хүсэлт тавьсан.
Өмнөх компаниудын гэрээг дараагийн гэрээ байгуулахгүйгээр сунгаж, давуу байдал олгох нөхцөл байдал үүсэж байсан. Санхүүгийн зөрчил их байсан учраас холбогдох албан тушаалтнуудыг ажлаас чөлөөлөөд хуулийн байгууллагад шалгуулахаар өгсөн” гэлээ.
Төрийн өмчит компанийг эрсдэлд оруулсан гэрээний зүйл заалтын талаар “Бодь интернэшнл” ХХК-ийн ханшаас үүссэн эрсдэлийг “Эрдэнэс Тавантолгой” компани 100 хувь хүлээхээр болсон нь илт давуу байдал үүсгэсэн. Ийм гэрээ байгуулсан нь үнэхээр ноцтой асуудал. Нууц гэдэг зүйлд оруулсан учраас ийм нөхцөл байдалд хүргэсэн.
Нүүрсээ тухайн компанид хөнгөлөлттэй үнээр, урьдчилж мөнгийг нь өгөөд, ханшийн эрсдэлийг нь дааж, торгууль алданги бүгдийг нь “Эрдэнэс Тавантолгой” компани хүлээхээр болсон нь илт давуу байдал үүсгэсэн байна. Өөрөөр хэлбэл, “Бодь Интернейшнл” компанид 187 тэрбум төгрөгийн хөнгөлөлт үзүүлсэн.
“Эрдэнэс Тавантолгой” компанийн ажилчид хувийн хэвшлийн барьж байгаа байрны заслын ажлыг хийж байсан. Хариуцлагын асуудал яригдаж, холбогдох албан тушаалтнуудадад арга хэмжээ аваад байна. 700 гаруй сая төгрөгөөр ажил хийлгүүлсэн мөртлөө гэрээ байгуулаагүй тохиолдол бий” гэв.
