Гуравдугаар сарын сүүлийн 10 хоногт нийт нутгаар цаг агаар хүйтэн, цастай, цасан шуургатай хэмээн ЦУОШГ-аас анхааруулж, сэрэмжлүүлэг мэдээ түгээж байв. Цаг уурын байгууллагаас урьдчилан анхааруулсан бүс нутгуудад гуравдугаар сарын 21-нээс эхлэн их хэмжээний цас орж, шуурчээ.
Дорнод аймгийн Баян-Уул суманд гуравдугаар сарын 21-ний 18.00 цагийн үед цас орж эхэлсэн бөгөөд 20.00 цагийн орчмоос битүү шуурч эхлэв. Нүүр нүдгүй балбасан цасан шуурга шөнөжин үргэлжилж, 22-ны өглөө нь сумын төвийн болон айлууд хоорондын зам хаагдаж, хунгар цасанд дарагджээ. Сумын захаар суурьшсан айлуудын хашаанд хунгар үүсэж, гэрийн хаалга нь цасанд дарагдсан байна.
Сумын онцгой байдлын газар болон Цэргийн ангийн машин техникээр хунгарласан цасыг түрж, зам харгуй гарган тээврийн хэрэгслүүд хөдөлгөөн хийх боломж бүрдүүлжээ.
Тэр шөнийн шуурганаар хэд хэдэн малчин шуурганд туугдаж, төөрсөн, сураггүй болсон байв.
Хүчтэй цасан шуурганы улмаас 21-ний 20.00 цагийн орчимд “Манайхаас урагш 100 метрийн зайтай байдаг айл харагдахгүй болтлоо шуурсан. Өглөө манай байшингийн хаалга хунгарт дарагдаж онгойхгүй болсон учир бид цонхоороо гарч, цасаа цэвэрлэсэн.
Сумын төвд ийм хүчтэй шуурч байхад хөдөө эзгүй хээрт айхтар шуурсан байх аа. Өнөөдөр ч /2023.03.23/ салхитай, тэнгэр бүүдгэр байна” гэж тус сумын иргэн Н ярив.
ЦУОШГ-аас цасан шуургатай гэсэн сэрэмжлүүлэг өгсөөр байсан тул тус суманд онцгой байдал зарлаж, гуравдугаар сарын 22-ны өдөр сургууль, цэцэрлэгийн үйл ажиллагааг түр зогсоосон байна.
Шуурганы улмаас Баян-Уул сумын төвөөс баруун хойд зүгт 25 км-т орших Урт багийн Дарьхинтын гол хэмээх газарт малчин Г гуравдугаар сарын 21-ний 17:00 цагт явганаар малаа хариулж яваад сураггүй болжээ.
ОБЕГ-ын мэдээ:
Энэ тухай дуудлагыг Онцгой байдлын газар мөн өдрийн 19:42 цагт хүлээн авсан байна. Дуудлагын дагуу тус аймгийн Онцгой байдлын газрын Баян-Уул сум дахь Гал түймэр унтраах, аврах 53 дугаар анги, Хилийн цэргийн 0275 дугаар ангийн алба хаагчид, Баян-Уул сумын мэргэжлийн ангийнхан, орон нутгийн иргэд болон ар гэрийнхэн нь 22-ны 07:25 цагаас 54 настай эрэгтэй Г-г эрэн хайх ажиллагааг зохион байгуулжээ.
Эрэлчид 22-ны 16:40 цагт буюу малчныг гэрээсээ гарснаас хойш 24 цаг орчмын дараа гэрээс нь урд зүгт 4 км-ын зайтай тус сумын Урт багийн Дарьхинтын гол хэмээх газраас цогцсыг олсон харамсалтай явдал болжээ. Энэ шуурганы улмаас малчдын олон тооны мал цасанд дарагдаж, малын хорогдол гарсан байна.
Малчид, иргэд, тээвэрчдэд зориулсан мэдээ:
2023 оны 3-р сарын 23-ны өдөр зүүн аймгуудын нутгийн хойд хэсгээр ялимгүй цас орж, говь талын нутгаар хүйтэн салхитай байна.
