Лхагва гарагт ОХУ-ын батлан хамгаалахын сайд Сергей Шойгу тэргүүтэй төлөөлөгчдөд Ким Жон Ун орчин үеийн зэр зэвсгээ танилцуулсныг Пёньяны төв хэвлэл өчигдөр мэдээлжээ.
Орос болон Хятадын засгийн газрын төлөөлөгчид Солонгосын дайны ялалтын 70 жилийн ойн баярын арга хэмжээнд уригдсан юм.
1950-1953 онуудад үргэлжилсэн Солонгосын дайн гал зогсоох гэрээгээр завсарласан ч албан ёсоор дуусаагүй.
Уг баярын арга хэмжээний үеэр Пёньян хотод цэргийн нүсэр том парад зохион байгуулагддаг уламжлалтай.
Энэ үеэр Умард Солонгосын эрх баригчид шинэ Хвасонг тив алгасах баллистик пуужингаа үзүүлжээ. Тус улсын анхны хатуу түлштэй энэ пуужинг өнгөрсөн дөрөвдүгээр сард амжилттай туршсан гэлцэж байгаа.
Хатуу түлштэй пуужин нь шингэн түлштэй пуужинтай харьцуулахад богино хугацаанд хөөрч, дайсны урьдчилан хамгаалах боломжийг багасгадаг гэдэг.
Парадын үеэр бас Умард Солонгосын инженерүүдийн зохион бүтээсэн нисгэгчгүй онгоц буюу дроны хоёр шинэ загварыг үзүүлжээ.
Умард Солонгосыг Украины дайнд хэрэглэх зэвсгийг ОХУ-д нийлүүлсэн гэж Өрнөдийн орнууд буруутгадаг.
Гэхдээ Пёньян, Москвагийн аль аль нь үүнийг эрс няцаасаар байгаа.
Ким Жон Ун, Сергей Шойгу нар үндэсний аюулгүй байдал, олон улсын аюулгүй байдлын хүрээний санаа зовоосон асуудлуудыг хэлэлцсэн тухай Солонгосын төв мэдээний агентлаг мэдээлжээ.
Ерөнхийлөгч Путиний илгээлтийг Ким Жон Унд гардуулахдаа Умард Солонгосын армийг “дэлхийн шилдэг нь” гэж Шойгу магтсан тухай дээрх мэдээнд дурдсан байна.
Хятадын төлөөлөгчдийн ахлагч, коммунист намын улс төрийн товчооны гишүүн Ли Хонзон бас Ши Жиньпиний илгээлтийг Кимд гардуулжээ.
Солонгосын дайны үеэр тухайн үеийн Зөвлөлт Холбоот Улс болон Хятадын эрх баригчид Пёньяны дэглэмийг дэмжиж байсан юм.
Орос, Хятадын төлөөлөгчид 2018 оноос хойш Пёньянд хүрэлцэн очсон анхны гадаадын хүндэт зочид болсон байна.
Эх сурвалж: BBC
