Монгол Улсын тамирчид “Парис 2024” зуны олимпод цагаан туган дор орох эрсдэлтэй нөхцөл байдал үүссэнийг Засгийн газрын хэрэг эрхлэх газрын дарга Д.Амарбаясгалан мэдээлсэн.
Ингэхдээ тамирчдын допингийн хэрэглээ болон бусад асуудлаас болж зуны олимпод Монгол Улс гэдэг нэрээр бус цагаан туган дор орох асуудлыг Дэлхийн допингийн эсрэг байгууллагаас допингийн эсрэг дүрмийг биелүүлэх, шаардлагатай журмыг батлахыг шаардсан байна. Уг асуудлаар ЗГХЭГ-ын даргаар ахлуулсан Ажлын хэсгийг өнгөрсөн долоо хоногт байгуулсан. Тэгвэл энэ өдрүүдэд Дэлхийн допингийн эсрэг байгууллагаас Монгол Улсын ажиглалтын жагсаалтад оруулах шийдвэрийг гаргасан байна.
Энэ талаар ЗГХЭГ-ын дарга Д.Амарбаясгалан: Дэлхийн Допингийн Эсрэг Байгууллагын энэ оны 2 дахь уулзалт БНХАУ-ын Шанхай хотноо 2023.09.22-нд боллоо. Уулзалтаар хэд хэдэн чухал асуудал хэлэлцсэний дотор Монгол Улсыг Дэлхийн допингийн эсрэг дүрмийг дөрвөн сарын дотор бүрэн биелүүлэх шаардлага тавьж, “ажиглалтын жагсаалт”-д орууллаа. Манай улс тэдгээр биелүүлэх шаардлагатай дүрмүүдийг дөрвөн сарын хугацаанд биелүүлэх боломжтой гэдгээ нотолж чадсан юм.
Цаашид Засгийн газар, Олимп, нийтийн биеийн тамир, спортын Үндэсний хороо, Монголын Үндэсний Олимпийн хороо, Биеийн тамир, спортын Улсын хороо, Монголын Допингийн Эсрэг Үндэсний байгууллага хамтран ажиллаж, үүсээд байгаа нөхцөл байдлыг яаралтай шийдвэрлэх, эрсдэлийг арилгахад идэвхтэй ажиллах болно” гэжээ.
