Нийслэлээс нийтийн тээврийн автобус худалдан авах тендерийг нээлтэй зарлаж, өнөөдөр санал ирүүлсэн компаниудыг олон нийтэд танилцууллаа.
Хотын дарга Х.Нямбаатарын захирамжаар автобус худалдан авах тендерийн үнэлгээний хороо байгуулагдсан.
Тус хороо аравдугаар сарын 24-өөс арваннэгдүгээр сарын 24-ны өдөр хүртэл нээлттэй тендер зарлаж, өнөө өглөө тендерийн саналыг нээж байгаа аж.
Автобусны нээлттэй тендерт Хятадын дөрөв, Монголын нэг компаниас үнийн санал ирүүлсэн байна.
Нийслэлийн Засаг даргын Тамгын газраас нийтийн тээврийн автобус худалдан авахад 183.4 тэрбум төгрөгийн төсөвт өртөг бүхий нээлттэй тендерийг зарласан байна. Харин хамгийн бага буюу 52.6 сая төгрөгийн үнийн саналыг China North Vehicle Corporation LTD ирүүлсэн тендерийн баталгааг ирүүлээгүй учраас автоматаар хасагдах юм байна.
-Xiamen King Long United Automotive Industry Co.,Ltd -147,686,834,611
-Xiamen Golden Dragon Bus CO.LTD- 156,932,775,600
-Yutong Bus Co.,Ltd- 165,589,920,000
-Майнс Ап /Моннис групп/-178,817,556,720 төгрөгийн үнийн саналыг тендерийн баталгаатай тус тус хүргүүлжээ.
Автобус худалдан авах нээлттэй тендерт Хятадын 4, Монголын нэг компани санал ирүүлжээ
Дээрх санал ирүүлсэн оролцогчдоос гүйцэтгэгчийг сонгон шалгаруулах ажлыг өөр үнэлгээний баг ажиллаж, тодруулах юм байна. Өөрөөр хэлбэл, тендерийг нээсэн өдрөөс эхлэн гүйцэтгэгчийг сонгон шалгаруулах дараагийн үнэлгээний хороо ажилдаа орох аж.
Гүйцэтгэгчийн нийлүүлэх автобус нь 2023 онд үйлдвэрлэгдсэн, зөв талдаа жолооны хүрдтэй, 26-аас дээш суудалтай, 80-иас дээш хүний багтаамжтай, Евро-5 түлш хэрэглэх заалттай, -45 хэм хүртэл хүйтэн тэсвэртэй байх шаардлагатай аж. Хот нийт 600 автобус худалдан авахаар төлөвлөжээ.
Гүйцэтгэгчийг сонгон шалгаруулсны дараа буюу он дуусахаас өмнө эхний 300 гаруй автобусыг оруулж ирэх, үлдсэнийг нь 2024 оны нэгдүгээр улиралд авах төлөвлөгөөтэй ажиллаж байгааг Нийслэлийн хэвлэлийн албанаас мэдээллээ.
