Засгийн газрын хуралдааны шийдвэрийг танилцуулж байна.
ЦХИХХ-ийн сайд Ц.Баатархүү, Засгийн газрын өнөөдрийн хуралдаанаар Монгол Улсыг кибер аюулгүй байдлыг хамгаалах, кибер гэмт хэрэгтэй тэмцэх чиглэлээр томоохон шийдвэрүүд гаргалаа.
Нэг эмнэлгийн асуудлыг хэвлэлээр мэдээлээд өнгөрөх биш улсын хэмжээнд онц чухал мэдээллийн дэд бүтэц бүхий байгууллагуудын кибер аюулгүй байдлыг хангах тогтолцоог бүрдүүлэх шаардлагатай.
Монгол Улс НҮБ-аас гаргасан Кибер аюулгүй байдлын индексээр 193 орноос 103-рт эрэмбэлэгдсэн. Ингэхдээ хууль эрхзүйн шалгуураар өндөр оноо авсан боловч техник технологийн ур чадвар, гадаад дотоодын хамтын ажиллагааанд хамгийн муу үнэлгээ авч байна. Монгол Улсын кибер аюулгүй байдлын эрсдэлийн түвшинг тогтоохоор Оксфордын их сургуультай хамтран ажиллаж байна.
Онц чухал мэдээллийг хадгалдаг байгууллагууд кибер аюулгүй байдлын мэргэжилтэнтэй болох шийдвэрийг Засгийн газрын хуралдаанаас гаргалаа.
Кибер халдлагад өртсөн хувь хүн, байгууллагыг буруутгавал дараагийн байгууллага халдлагад өртсөнөө нуудаг. Нуувал тухайн хортой код хаанаас орж ирснийг илрүүлэх явц нь удааширдаг.
Улсын төсөв болон тухайн байгууллагын төсөв батлахдаа мэдээллийн технологийн зардал гэх ерөнхий зүйл ангиар биш кибер аюулгүй байдлын зардал гэж тусад нь төсөв баталж, кибер аюулгүй байдлын технологийн шинэчлэл, албан ёсны лицензтэй программ хангамж ашиглах шийдвэр гаргаж байна.
Монгол Улсад кибер зөрчил, халдлагатай тэмцэх гурван төв ажилладаг. Тагнуулын ерөнхий газрын дэргэд Кибер аюулгүй байдлын эсрэг үндэсний төв, БХЯ-ны дэргэд Батлан хамгаалахын кибер аюулгүй байдлын төв, иргэд хувийн хэвшилд мэргэжлийн үйлчилгээ үзүүлэх “Кибер халдлага зөрчилтэй тэмцэх нийтийн төв” ажилладаг.
Өнөөдөр Интермэд эмнэлгийн асуудлыг нийтээрээ ярьж байна. Дэлхийн өнөөгийн чиг хандлага бол кибер халдлагад өртсөн байгууллагыг буруутгахаас илүү дахиж ийм халдлага гаргахгүй байх тогтолцоог бүрдүүлэхийн төлөө ажиллах нь хамгийн зөв арга гэж үздэг. Кибер халдлагад өртсөн хувь хүн, байгууллагыг буруутгавал дараагийн байгууллага халдлагад өртсөнөө нуудаг. Нуувал тухайн хортой код хаанаас орж ирснийг илрүүлэх явц нь удааширдаг.
Интермэд эмнэлэгт Кибер халдлага зөрчилтэй тэмцэх нийтийн төвийн дөрвөн мэргэжилтэн барьцаалагдсан есөн серверийг бүрэн сэргээхээр ажиллаж байна.
Энэ эмнэлэгт гарсан кибер халдлагатай холбоотой асуудлаар цагдаа, тагнуул, нийтийн төв зэрэг мэргэжлийн байгууллагууд дүгнэлтээ бичиж байна.
