Монгол Улсын Шадар сайд С.Амарсайхан Говьсүмбэр аймагт ажиллах үеэрээ тус аймгийн малчин хоршоологчдын төлөөлөгчидтэй уулзаж, санал хүсэлтийг нь сонслоо.
Малчин хоршоологчид “Шинэ хоршоо-Чинээлэг малчин” хөтөлбөрийг үр дүнтэй хэрэгжүүлж байгааг онцолсон. Мөн цаашид хөрөнгө оруулалтын зээлд хамрагдахад илүү хялбар болгох, зээлийн дээд хэмжээг нэмэгдүүлэх, зэрэг саналыг гаргасан.
“Шинэ хоршоо-Чинээлэг малчин” хөтөлбөрийн хүрээнд тус аймагт 68 шинэ хоршоо байгуулагдаж, 597 малчин хоршоонд гишүүнээр элссэн байна. Үүнээс 59 хоршооны гишүүн 220 малчин хоршоологч нийт 8.7 тэрбум төгрөгийн хөрөнгө оруулалтын зээлд хамрагджээ.
Малчин хоршоологчид үржлийн мал худалдан авах, Стандартын шаардлага хангасан малын хашаа, хороо, саравч худалдан авч, шинээр барих, Мал аж ахуйн үйлдвэрлэлд зориулагдсан техник, технологи, тоног төхөөрөмж худалдан авах, Мах сүү цагаан идээ бэлтгэх, боловсруулах, Малын тэжээл, тэжээлийн ургамал тариалах, тэжээл үйлдвэрлэлийн цех байгуулах зэргээр зээлээ үр дүнтэй зарцуулсан байна.
Монгол Улсын Засгийн газраас уур амьсгалын өөрчлөлтөөс үүдэн бий болж байгаа байгалийн гамшгаас урьдчилан сэргийлэх, гамшгийн эрсдэл, сөрөг нөлөөллийг бууруулах, даван туулах, үр дагавар, хор хохирлыг арилгах зорилгоор “Шинэ хоршоо хөдөлгөөн”-ийг 2024 оны 4 сарын 24-ний өдрөөс хэрэгжүүлж эхэлсэн.
“Шинэ хоршоо” хөдөлгөөн өрнөж эхэлснээр хоршооны гишүүн малчин арилжааны банкнаас 6 хувийн хүүтэй 50 хүртэлх сая төгрөгийн хөрөнгө оруулалтын зээлийг 5 хүртэлх жилийн хугацаатай авах боломж бий болсон.
Өнөөдрийн байдлаар улсын хэмжээнд 7510 шинэ хоршоо байгуулагдаж 74 мянга гаруй малчин хоршоонд шинээр элсжээ.
