Боловсрол, Шинжлэх Ухааны Үйлдвэрчний Эвлэлийн Холбоо (МБШУҮЭХ)-оос боловсролын салбарын ажилтнуудын цалин хөлсийг нэмүүлэх тэмцэл, хөдөлгөөн орон даяар өрнөж эхэлсэн талаар өнөөдөр мэдээлэл хийлээ.
Тус холбооноос багш нарын үндсэн цалинг 3.5 сая төгрөг болгохыг шаардан ажлын хэсэг байгуулсан байна. Мөн энэ сарын 24-нөөс жагсаал цуглаан зохион байгуулж, орон даяар тэмцэхээ албан ёсоор мэдэгдсэн юм.
Монголын үйлдвэрчний эвлэлийн холбооны ерөнхийлөгч Э.Тамир “Монголын үйлдвэрчний эвлэлийн холбоо 21 аймаг, орон нутагт үндэсний хэмжээнд багш нарын цалинг нэмэх асуудлыг шат дараатай зохион байгуулна. Төсөв боловсруулахад иргэдээс санал авахад боловсролын салбар иргэдийн саналаар эхний гуравт орсон. Хэрэв ирэх оны төсвийг яг байгаагаар нь батлах юм бол дараагийн шатны арга хэмжээнд хүрэхээс өөр аргагүй болно гэдгийг хариуцлагатайгаар мэдэгдэж байна. Боловсролын салбар хөгжиж байж бусад салбар хөгжинө” гэв.
Мөн тус холбооны Дорнод аймаг дахь салбарын тэргүүн н.Баатарсүх “ Дорнод аймгийн боловсролын ажилтнууд бүгд энэ шаардлагыг бүрэн дэмжиж байгаа. Төсөв хэлэлцэж байгаа энэ үед багш нарын цалинг нэмэх албан бичгийг зүүн аймгаас сонгогдсон нэр бүхий УИХ-ын гишүүдэд хүргүүлсэн. Мөн боловсролын салбарын эмзэг асуудлыг ашиглаж улс төр битгий хий гэж хэлмээр байна. Намуудын хоорондын улс төрөөс болж багш нарын цалин нэмэх асуудал удаж байна” хэмээлээ.
Монголын үйлдвэрчний эвлэлийн холбоо, Боловсролын яамтай 2001-2024 онд байгуулсан хамтын хэлэлцээрийн заалтууд болон бусад заалт одоогийн байдлаар огт хэрэгжээгүй аж. Түүнчлэн энэ оны 2 сарын 24-нд Монголын үйлдвэрчний эвлэлийн холбоо, Засгийн газрын хооронд байгуулсан нэмэлт хэлэлцээрээр Засгийн газар тодорхой үүрэг хүлээсэн байна. Гэсэн ч энэ сарын байдлаар ямар нэгэн хариу өгөөгүй. Цалин нэмэх боломжгүй гэсэн хариу өгсөн гэсэн мэдээлэл өгчээ.
