УИХ, Засгийн газрын гишүүн, Аж үйлдвэр, эрдэс баялгийн сайд Г.Дамдинням мэдээлэл хийлээ.
Тэрээр: “Олон нийтийн хэвлэл мэдээллийн хэрэгслээр УИХ-ын зарим гишүүдийн өгч байгаа худал мэдээлэлд няцаалт өгөх зорилгоор энэ хэвлэлийн бага хурлыг хийж байна. Монгол Улсын Засгийн газраас наймдугаар сард гаргасан 55-р тогтоол хууль зөрчөөгүй.
Үүнтэй ижил утгатай тогтоол өмнө нь 9 удаа гарч байсан. Арав дахь нь энэ болж байна. Бид хасах руу орчихсон эдийн засагтай засаг хүлээж авч байсан.
Амны гэрээ буюу том оффтейк гэрээний нүүрс л гардаг, улсын төсвийн орлого тасарчихсан, хил дээр 4,5 сая тонн нүүрс гацсан, ахмадуудын тэтгэвэр, төрийн албан хаагчдын цалинг өгөх орлого гацчихсан нөхцөл байдалтай байсан. Ингээд бид хоёр ч тогтоолыг батлуулсны үр дүнд эдийн засгаа нэмэх болгож, төсвөө тодотгоод байна.
Өмнөх 9 тогтоолд сонирхолтой нь янз бүрийн хувилбарууд орж ирсэн байдаг. 100 төгрөгийн үнэтэй зүйлийг 50 төгрөгөөр үнэлэх шийдвэр гаргаж татвараас зугтах боломжийг олгосон байдаг. 100 төгрөгийн үнэтэй зүйлээ 120, 150 төгрөгөөр ч үнэлж, аж ахуйн нэгжүүдээс илүү татвар авсан ч байдаг.
Асуудал яриад байгаа гишүүн маань өөрөө ХЗДХ-ийн яаманд 2013 оноос хойш уул уурхайн салбар хариуцсан мэргэжилтэн, хуульзүйн бодлогын газрын дарга, ТНБД зэрэг 9 жил орчим хугацаанд ажиллахдаа эдгээр 10 тогтоолын 5-д нь оролцож шийдвэр гаргалцсан байна. Энэ 5 тогтоолын зарим нь гэрээний үнээр буюу татвараас зугтаах боломж олгосон тогтоол ч байдаг.
Тэр үедээ яагаад Засгийн газрыг огцруулах асуудал ярьж байгаагүй юм бэ? Өөрөө оролцож явсан байж яагаад шударга ёсоо яриагүй юм бэ? Г.Занданшатарын Засгийн газар бодит байдлаа ярьж, үнэнийг хэлье гэж байгаа. Биржийн худалдааг болиулбал оффтейк том гэрээнүүд, нууц гэрээнүүд явна. Бидэнд биржийг болиул гэж байнга шахдаг. Үүнийг би нуухгүй. Бирж бол бидэнд ил тод байдлыг нэмэгдүүлж, бодит үнийг тодорхойлох боломж олгосон.
Ийм байхад П,Сайнзориг Засгийн газрыг огцруулах асуудал оруулж ирж байгаа нь улстөрийн зорилготой. Улс орноо бодсон зүйл байхгүй.
П,Сайнзориг 200 тэрбум төгрөгийн алдагдал гэдгийг хаанаас бодож олсон юм? Мэдэхгүй байна. Тэр тооцооллоо гаргаж ир. Тоо тооцооллыг Уул уурхайн яам ганцаараа ч хийдэггүй. Засгийн газрын нэг ч шийдвэр Сангийн яам, Хуулзүйн яамны шийдвэргүйгээр гардаггүй. Бас нэг шүүхийн шийдвэр яриад байгаа. 2020-2024 онд болсон үйл явдал юм билээ. Тийм учраас өмнөх Засгийн газраас тэрийг асуугаарай.
Хулгайг нь ярихаар үсрээд гараад ирж байгаа юм уу? Болохгүй шүү дээ. Тоо баримттай, үнэнийг хэлдэг бидний байр суурийг ард түмэн ойлгох байх. П.Сайнзориг гишүүн “Үндсэн Хуулийн Цэц”-д өгнө гэснээрээ өгчих. Үнэн мөнөө шүүлгээд авья.” гэж хэллээ.
