АНУ-ын цэргүүд Каракас хотод явуулсан ажиллагаагаар ерөнхийлөгч Николас Мадурог баривчилж, Нью-Йорк хотод хар тамхи, терроризмтой холбоотой хэрэгт шүүхээр оруулсны дараахан түүний хүндэт харуулын дарга, генерал Хавьер Маркано Табатаг албан тушаалаас нь огцруулав.
Ерөнхийлөгчийн хүндэт харуул нь төрийн тэргүүнийг хамгаалах үүрэгтэй цэргийн анги юм.
АНУ-ын ажиллагааны үеэр амиа алдсан олон хүний дунд уг харуулын гишүүд багтсан байж болзошгүй ч Венесуэлийн засгийн газар хохирлын талаарх нарийвчилсан мэдээлэл өгөөгүй байна.
Генерал Маркано Табатаг огцруулах шийдвэрийг түр ерөнхийлөгч Дельси Родригес гаргасан. Родригес өмнө нь Мадурогийн дэд ерөнхийлөгчөөр ажиллаж байсан бөгөөд түүний ойрын холбоотон гэгддэг.
Мадурог баривчилсны дараах хэвлэлийн бага хурлын үеэр АНУ-ын ерөнхийлөгч Дональд Трамп АНУ Венесуэлийг “удирдана” гэж мэдэгдэж, Родригестэй хэлэлцээ хийж байгаагаа дурдсан байна. Мөн тэрбээр АНУ-ын шаардлагыг, тэр дундаа газрын тос нийлүүлэх шаардлагыг биелүүлэхгүй бол Родригес Мадурогоос ч “муу хувь тавилантай” тулгарна гэж анхааруулжээ. Венесуэль нь дэлхийд батлагдсан газрын тосны хамгийн их нөөцтэй орон юм.
Трамп дараа нь Венесуэль АНУ-д 50 сая баррель хүртэл газрын тос шилжүүлж өгнө гэж мэдэгдсэн ч түр засгийн газар үүнийг батлаагүй байна.
Түр ерөнхийлөгчөөр томилогдсоноосоо хойш Родригесийн байр суурь хатуу болон эвлэрэх өнгө аястай ээлжилж байна.
Тэрбээр Мадурог баривчилсныг “хууль бус хулгай” хэмээн буруутгасан. Гэсэн хэдий ч АНУ-тай хамтран ажиллахад нээлттэй гэдгээ мөн илэрхийлжээ. Түүний дараагийн алхмыг дотоод, гадаадын ажиглагчид анхааралтай ажиглаж байгаа бөгөөд генерал Маркано Табатаг огцруулсан нь Мадурогийн ойрын хүрээний өндөр албан тушаалтнуудад хийсэн анхны өөрчлөлтүүдийн нэг юм.
Генерал Маркано Табата нь ерөнхийлөгчийн харуулаас гадна Венесуэлийн Цэргийн сөрөг тагнуулын газар (DGCIM)-ыг удирдаж байсан.
НҮБ-ын мэдээлснээр уг байгууллага Мадурогийн засгийн газрыг шүүмжилсэн хүмүүсийг хэлмэгдүүлэхэд гол үүрэг гүйцэтгэж иржээ. Мөн тус байгууллага баривчлагдсан иргэдийг эрүүдэн шүүж, бэлгийн хүчирхийлэл болон бусад хүнлэг бус харьцаанд өртүүлсэн олон тохиолдлыг НҮБ-ын бие даасан мөрдөн шалгах баг 2013 оноос хойш баримтжуулсан байна. Гэсэн хэдий ч Табатаг огцруулсан нь хүний эрхийн зөрчилтэй холбоогүй бололтой бөгөөд түүний оронд томилогдсон хүн мөн адил ийм төрлийн буруутгалд өртөж байсан байгууллагыг удирдаж байжээ.
Түүнийг залгамжилж буй Густаво Гонсалес Лопес нь Венесуэлийн Үндэсний тагнуулын алба (SEBIN)-ыг олон жил удирдсан хүн юм.
“SEBIN” нь Каракас дахь нэр хүнд муутай “Хеликоид” шоронг хянадаг. НҮБ-ын мэдээлснээр, уг шоронд сөрөг хүчний улстөрч, сэтгүүлч, жагсагч, хүний эрхийн хамгаалагчдын эсрэг хүчирхийлэл үйлдэгдэж байсныг тогтоосон байна. Шинжээчдийн үзэж байгаагаар, генерал Маркано Табатаг огцруулсан гол шалтгаан нь Ерөнхийлөгчийн хамгаалалт Мадурог баривчлахаас сэргийлж чадаагүйтэй холбоотой аж.
