Н.Оюундарь: Буриад Монголын харилцаа, нөхөрлөл ямар ч ажлаас илүү чухал

 

Буриадаас Монгол Улсад суугаа төлөөлөгчийн газраас өнөөдөр
УИХ-ын гишүүн Н.Оюундарийг мөнгөн тэмдгээр шагналаа. Шагнал гардуулах ёслолын
үеэр түүнтэй цөөн хором ярилцлаа.  

-Буриадын Засгийн газрын нэр хүндтэй шагнал авсанд тань
баяр хүргэе. Өмнө нь энэ тэмдгийг манай улсаас өөр хүн авч байсан болов уу? 

 

-Баярлалаа. Өмнө нь Монгол
Улсаас УИХ-ын гишүүн Г.Энх-Амгаланд Буриадын Засгийн газрын хүндэт тэмдгийг гардуулан
өгч байсан юм байна. Энэ тэмдэг нь зэс, мөнгө, алтан гэсэн хувилбартай аж. Миний
хувьд Буриад Монголын парламентын бүлгийн даргаар ажиллаад жил гаруй нүүр үзлээ.
Өнгөрсөн хугацаанд Буриад Монголын хоёр талын харилцааг хөгжүүлэхэд их хувь нэмэр
оруулсан хэмээн тэд ийнхүү Засгийн газрын нэр хүндтэй шагнал болох мөнгөн
тэмдгээр шагнаж байгаа юм байна. Буриад Монголын харилцааг улам өргөжүүлэн сайн
ажиллаарай хэмээн бидний зүтгэлийг урамшуулж байна гэж ойлголоо. 

-Буриад Монголын хамтын ажиллагааны хүрээнд хийсэн ажлаас
дурьдая. Гадаад харилцааны дэд сайдаар ажиллаж байсны хувьд таныг гаднынхан
нэлээн таньж хамтран ажиллахад хялбар байдаг уу? 

-Монгол Улс парламентын
хувьд бусад улсын парламентын найрамдалын бүлгүүдтэй найрсаг харилцаатай
ажилладаг. Буриадын хөрөнгө оруулалтыг улс руугаа татах тал дээр бид эртнээс
уулзаж олон асуудлыг нааштайгаар шийдэж эхэлсэн. Гадны хөрөнгө оруулагчдыг Монгол
Улсад үйл ажиллагаа явуулахад нь бүх талаар дэмжих, сонирхлыг нь судлах,
ажиллах таатай нөхцлөөр хангах зэргээр бид чадах бүхнээрээ хамтран ажиллаж
байна. Өнгөрсөн хугацаанд 40 гаруй оюутан залуусыг Буриад руу аялуулсан. Хоёр
улсын аялал жуулчлал нэлээн хөгжих талдаа байгаа. Хоёр талын хамтын ажиллагааны
хүрээнд \”Абсалют” хэмээх худалдааны сүлжээ дэлгүүр Монголд нээгдлээ. Чанартай
барааг манай иргэд худалдаж авах боломж нээгдэж байна гэсэн үг. Энэ хэрээр
бидний хамтын ажиллагаа дэлгэрч, хөрөнгө оруулалтыг улс руугаа их, бага
хэмжээгээр татсан болов уу. Хөрөнгө, мөнгө гэхээс илүүтэй манай хоёр орны
иргэд, байгууллагуудын хамтын ажиллагаа, найрсаг харилцаа чухал юм. Гадаад
харилцааны дэд сайдаар ажиллаж байсан минь ч гэсэн гадны улсын Элчин сайд,
төлөөлөгчидтэй харилцахад илүү танил, нээлттэй санагддаг хэмээн хэлэх нь бий. 

-Таны хувьд офшорчийг унагаж Сэлэнгээс УИХ-д сонгогдсон.
Нутаг, орон руугаа ямар ажил хийж байна даа? 

 

– Иргэдийнхээ итгэлийг
хүлээн УИХ-д сонгогдоод жил гаруйн хугацаа өнгөрлөө. Эхлүүлж, хийж болох бүх
ажлыг нь барьж авах гэж хичээж байна. Шаамар суманд Турк улсын ТИКА-гийн олон
улсын хамтын ажиллагааны төслөөр зөгийн өвлийн зоорь бариулсан. Зөгийчдийн
маань ажил бага ч гэсэн хөнгөрөх байх.

 

Мөн Франц Улсын Элчин сайдын яамтай
хамтран газар зүйн байршлын Улсын оюуны өмчийн газраар Шаамарын зөгийн балыг
гарал үүслийн гэрчилгээтэй болгох ажлыг хийхээр болсон. Гадаадад 20 орчим
оюутныг 100 хувийн тэтгэлэгтэйгээр их сургуульд суралцуулах ажлыг хийлээ. Мөн
40 орчим хүнийг гадаад улсад мэргэжил дээшлүүлэх сургалтад явуулсан. Сэлэнгэ
аймгийн нэгдсэн эмнэлэгт \”Хүүхдийн яаралтай тусламжийн тасаг” байгуулах
төслүүдийг Туркийн хамтын ажиллагааг зохицуулах агентлаг ТИКА-ынхан хийсэн.

 

Иргэдийн нарийн мэргэжлийн эмчийн үзлэгт хамруулж хавдрын эрт илрүүлэлт,
халдварт өвчнөөс сэргийлэх ажлыг таюан суманд хийлээ. Зарим сургуулийн нэгдүгээр
ангийн сурагчдад хичээлийн хэрэглэл, цүнх бэлэглэсэн.  Хамгийн сүүлд гэхэд Сэлэнгэ аймгийн Сүхбаатар
сумыг БНСУ-ын Жон Сон Гун мужийнхантай холбон өгч бүх талаар хамтран ажиллах
ажлыг эхлүүлсэн. Жон Сон Гун мужийн төлөөлөгчид Сэлэнгэд зочилж, иргэдийн ажил,
амьдралтай газар дээр нь биечлэн танилцаж хөдөө аж ахуй, газар тариалан, аялал
жуулчлал гэх мэтээр хамтран ажиллах боломжоо судлаад явсан. Бидэнд цаашдаа хийх
ажил их байна.