![\"\"](http://undesten.mn/uploads/posts/2015-08/1440734284_4.jpg "\\"\\"")
Өнөө маргаашгүй хичээлийн шинэ жил эхэлж, хүүхэд багачууд сургууль, цэцэрлэгтээ явах гэж байна. Гэтэл жилийн жилд цэцэрлэгийн хүрэлцээгүй байдал асуудал дагуулж, олон хүүхэд цэцэрлэгт явах боломжоор хязгаарлагддаг. Энэ жил улсын хэмжээнд 27 мянган хүүхэд цэцэрлэггүй үлдэх тооцоог албаныхан гаргаад байна. Уг нь хүүхэд сургуулийн өмнөх боловсролыг үнэ төлбөргүй эзэмших эрхтэйг Үндсэн хууль болон Боловсролын тухай хуульд заасан байгаа. Гэтэл манай улсад энэ хуулийн заалт хэрэгжих нь бүү хэл, ойшоодог хүн ч алга гээд хэлэхэд буруудахааргүй байна. Жилийн жилд л эцэг, эхчүүд цэцэрлэгийн гадаа хичнээн өдрөөр хонож өнжин дугаарладаг, эрхлэгч нар нь хаданд гардаг байдалтай.
Хамгийн харамсалтай нь, энэ байдалд огт өөрчлөлт ордоггүй бөгөөд жил бүрийн өдийд хэвлэлийнхэн бичиж, сурвалжилдаг, эцэг, эхчүүд нь гомдоллодог дүр төрх амь бөхтэй оршсоор л. Энэ жилийн тухайд ердөө 10 цэцэрлэг шинээр ашиглалтад орно. Гэхдээ энэ нь яг ч шинээр барьсан гэсэн үг биш, өмнөх жилүүдэд эхлүүлсэн ажлаа дуусгаж байгаа юм. Учир нь, улсын төсөв хүндрэлтэй, эдийн засаг хямралтай гэх бэлэн тайлбарыг албаныхан өгч байгаа ч үнэн хэрэгтээ энэ бол зөвхөн бодлогын алдаа гэдэг нь ойлгомжтой билээ. Өөрөөр хэлбэл, төсөв захиран зарцуулдаг эрх мэдэлтнүүд нийтэд хүртээлтэй ажил хийе гэхээсээ илүү эргээд үр ашгаа өгөхгүй, хариуцлага нэхэхээргүй ажилд хамаг мөнгөө зараад байгаа нь хэний ч нүдэнд илхэн. Энд ердөө ганц жишээ татахад, гарчигт дурдсанчлан энэ жил цэцэрлэггүй үлдсэн хүүхдүүдийн эцэг, эхчүүд хотын удирдлагууд тэр дундаа нийслэлийг захирч байгаа Э.Бат-Үүлд хандаарай.
Учир нь, нийслэлийн хэмжээнд яагаад цэцэрлэг шинээр бариагүйг энэ хүн сайн мэдэж байгаа. Цэцэрлэгт зориулж болох байсан мөнгийг хааш нь, юунд зарцуулсныг ч Баатар дарга өөрөө мэднэ. Тэрбээр \”Энэ зун нийслэлчүүдээ уйдаахгүй байх үүднээс урлаг, соёлын арга хэмжээ олныг зохион байгууллаа” хэмээн ярьж байсан удаатай. Зарим тоо баримт сөхөхөд нийслэл Улаанбаатар хот 152 хороотой, түүнээс 40-өөд нь цэцэрлэггүй, харин үлдсэн хэсэг нь тус бүр нэг л цэцэрлэгтэй. Харин нэг хороо нь 10-аад мянган хүн амтай бөгөөд тэнд цэцэрлэгийн насны 1500 гаруй хүүхэд оршин сууж байна. Харамсалтай нь, эдгээр хүүхдийн талаас илүү хувь нь л цэцэрлэггүй үлдэж байна шүү дээ. Эх сурвалж www.wikimon.mn
