Кофеноос гарах гэж байна уу?

Хэрвээ тийм бол өглөөг сэргэг угтах 9 аргыг зааж өгье. Насанд хүрэгчдийн ойролцоогоор 83 хувь нь өдөр бүр кофе уудаг аж. Харин тэдний 30 хувь нь жил бүрийн эхэнд өөртөө \”Энэ онд л би кофеноос гарна” гэсэн амлалт өгдөг гэнэ. Каффейнаас хамааралтай болчихоод байгаа биеэ амраахаар зориг шулуудсан бол өглөө бүрийн сэргээшийг чинь орлох эдгээр аргаас туршаад үзээрэй.

Кофеноос гарах гэж байна уу?

1. Өглөө босоод дасгал хийх

Дасгал хөдөлгөөн нь хүний стресс, ядаргааны мэдрэмжийг арилгаж, унтах цагийг тогтворжуулж, сэтгэл санааны байдлыг сайжруулдаг. Түүнээс гадна дасгал хийх үед эндорфин даавар ихээр ялгарч цаанаасаа л эрч хүч ундраад ирдэг. Кофеноос бараг л ялгаагүй үйлчлэлтэй байгаа биз?

Хэрэгжүүлэх нь: Тогтмол цагтай, өндөр үнэтэй фитнесс, йогийн ангид бүртгүүлбэл чамд өөрийгөө ятгах сэдэл илүү хүчтэй төрнө.

2. Гадаа гарах

Босонгуутаа дасгал хийнэ гэхээр нэг л сонин санагдаад байна уу? Тэгвэл өглөө бүр гараад хэдэн минут алхах хэвшлийг өөртөө суулга. 20 минут орчим алхахад ядарч буй мэдрэмж 65 хувиар багасдаг. Мөн өглөөний нарны цацраг чамд ажиллах урам зориг өгөх болно.

Хэрэгжүүлэх нь: Алхах гутал, хувцсаа шөнө нь бэлдэж тавь. Тэгвэл чи өглөө босмогцоо углаад л гарахад болно

3. Эрүүл өглөөний хоол ид

Өглөөний хоолыг заавал идэх ёстой гэдгийг хүн бүр мэднэ. Гэхдээ юу идэх нь ч бас чухал. Уураг, тос, нүүрс усны тэнцвэртэй холимог хоолыг зөвлөж байна. Бидний бие нүүрс усыг тэр дор нь энерги болгож хувиргадаг ба харин уураг, өөх тос хоёр нь удаан шингэдэг учраас энэ гурвын холимог чамайг түргэн сэргээж, үүссэн эрч хүчийг чинь өдрийн цайны цаг хүртэл хадгалах болно.

Хэрэгжүүлэх нь:Бүхэл үрийн талхан дээр самрын тос түрхэж идээд бууцай, өргөст хэмх, жимстэй смүүти уувал ямар вэ?

4. Ус уу

Бүхэл шөнийн турш унтсан биеэ сэргээх нэг гол түлхүүр бол шингэнээ нөхөх юм. Багахан хэмжээнд л шингэн дутагдахад толгой өвдөж, анхаарал төвлөрөхөө больж, бие сульдан сэтгэл санаа унадаг. Мөн каффейн авахаа болих үед ч эдгээр шинж тэмдэг илэрдэг юм. Тиймээс кофегоо больё гэж бодож байгаа бол оронд нь ус уугаад үзээрэй.

Хэрэгжүүлэх нь: Өглөө босоод дор хаяж 250 мл ус уу. Хэрвээ ус дангаараа амтгүй санагдаад байвал өргөст хэмх, гаа, лайм, мөс, зүсэм нимбэг хийж болно.

5. Цайгаар орлуул

Кофегоо цайгаар солих нь каффейныхаа хэмжээг аажмаар бууруулах сонгодо арга юм. Ихэнх цай нь каффейныхаа хэмжээгээр кофеноос бага. Хэрвээ чи каффейнаас нэгмөсөн татгалзахаар шийдсэн бол нэг аяга эмийн ургамлын гаралтай цай ууж өглөө бүр кофе уудаг зуршлаа дарж болно.

Хэрэгжүүлэх нь: Хар цай, ногоон цайны төрлүүд кофены талын дайтай каффейныг агуулах мөртлөө илүү олон ач холбогдол, ашиг тустай.

6. Хэмнэлийг эхлүүл

Өөдрөг хэмнэлтэй дуу сонсох нь чамд хөдлөх, урагшлах урам зоригийг бэлэглэдэг. Дээрээс нь сэтгэл санааг ч засах болно.

Хэрэгжүүлэх нь:Өглөө бүр ирээд сонсдог нэг playlist-тэй бол. Харин тэр дуунуудаа өдрийн турш үргэлжлүүлэн сонсож болохгүй шүү. Тэгвэл чиний чихэнд хэт дасал болж сэргээх чанараа алдчихна.

7. Стрессийн тэмдэглэл хөтлө

Сэтгэл санааны байдлаа хүчтэйгээр гаргаж бичих нь хүний биеийн болон сэтгэл санааны эрүүл мэндийг сайжруулдаг. Стрессийн тэмдэглэл хөтөлснөөр хэтдээ дархлааны систем ч сайжирч, даралт тогтворожиж, ой санамж дээшилж, өвдөхөө больдог аж.

Хэрэгжүүлэх нь:Day One, OnePad, Gratitude Journal зэрэг аппликейшн ашиглах юм уу жижигхэн дэвтэр дээр өглөө бүр өөрийн сэтгэл санааны байдлыг яг тэр чигээр нь гаргаж бичээрэй.

8. Биеэ сунга

Хэдхээн амархан сунгалтын хөдөлгөөн хийхэд л булчин чинь халж цусны эргэлт идэвхждэг. Өглөө бүр йогд явбал бүрч сайн.

Хэрэгжүүлэх нь:Орноосоо босоод сайтар сунайж, хөл рүүгээ чадлынхаа хэрээр тонгойгоорой. Дараа нь хоёр гараа нурууныхаа ард холбон барьж 1 минут байлгаад босч гараа шаланд хүргэ. Ингээд л чи цоглог болчихлоо.

9. Өглөөний бясалгал хий

Өглөө бүр кофе чанах цагаа ухаалгаар зарцуул. Ядарч сульдсан, шавхагдсан мэдрэмжийг үгүй хийхийн тулд өглөө бүр энгийн бясалгал хийх нь үр дүнтэй.

Хэрэгжүүлэх нь:Өглөө бүр зөвхөн амьсгалж буйгаа чагнаж 5 минут суу. Дараа нь өөрийн хөл, гаранд хүрч буй зүйлс, эргэн тойрны дуу чимээ бүрийг нэг нэгээр нь салгаж сонсон анхаарлаа өөр юунд ч бүү төвлөрүүлээрэй.

Сэтгэл санааны бэлтгэлтэй байгаарай!

Өдөрт ганцхан аягыг уудаг байсан ч кофеноос гарна гэдэг амаргүй. Ялангуяа удаан хугацааны зуршил болоод тогтчихсон бол бүр ч хэцүү. Каффейныг гэнэт больсноос болж толгой өвдөх, ядрах, дотор муухайрах, анхаарал сарних, ааш хөдлөх шинж тэмдгүүд илэрч болох ч эдгээр нь долоо хоног л үргэлжилдэг. Хэрвээ чамд энэ нь хүндрэлтэй санагдаж байвал уудаг кофеныхоо хэмжээг нэг долоо хоногийн турш аажим аажмаар бууруулаад, амралтын өдрөөр ногоон цай руу шилжүүлээрэй.