Увс аймгийн Тариалан сумын Бургастай багийн “Данзангийн цагаан буйр” гэдэг газар тус сумын харъяат малчин Ц-гийн 4 настай хүү Б нь энэ сарын 9-ний өдрийн 18:00 цагт гэрийнхээ гадна тоглож байгаад сураггүй алга болсон тухай мэдээлсэн билээ. Тэгвэл тус аймгийн Онцгой байдлын газрын Гал түймэр унтраах, аврах 41 дүгээр ангийн алба хаагч, орон нутгийн 15 иргэний хамтаар эрэн хайх, аврах ажиллагааг зохион байгуулж, Наранбулаг сумын Алдар багийн “Бөөдөөний-Эх” гэдэг газраас /гэрээс нь зүүн зүгт 2 км-т/ 10-ны өдрийн 08:50 цагт эсэн мэнд олж, ар гэрийнхэнд нь хүлээлгэн өгсөн байна.
Харин сар гаруйн өмнө сураггүй болсон сэтгэцийн эмгэгтэй 31 настай /эмэгтэй/ С одоо болтол олдоогүй байна. Тэрээр Сэлэнгэ аймгийн Сүхбаатар сумын Салхит багт өнгөрсөн сарны 19-ний өдрийн 17:00 цагт гэрээсээ гараад сураггүй алга болсон байдаг. Энэ тухай дуудлагыг өнгөрсөн сарын 23-ны 11:00 цагт хүлээн авсан юм. Дуудлагын дагуу тус аймгийн Онцгой байдлын газрын алба хаагчид эрэн хайх ажиллагааг зохион байгуулж үр дүнд хүрээгүй, мөн цагдаагийн байгууллага сайтар шалгах шаардлагатай гэж үзсэн тул эрэн хайх ажиллагааг тухайн сарын 24-ний өдөр түр зогсоож, улмаар энэ сарын 10-ны өдрөөс дахин эхлүүлсэн байна. Тус аймгийн Онцгой байдлын газрын Эрэн хайх, аврах ангийн алба хаагчид, цагдаагийн байгууллагын алба хаагчид, ар гэрийн нэг хүнтэй хамт 1 бичил нисэх төхөөрөмж бүхий 3 техник хэрэгсэл, 3 морьтойгоор өчигдөр 14:12 цагаас эрлээ эхлүүлжээ. Ингээд тус сумын “Бор гүвээ” гэдэг газраас “Гахайн байр” гэдэг газар хүртэл Буурын голын эрэг дагуу явганаар 7.5 км газарт эрэн хайх ажиллагааг зохион байгуулж 20:00 цагт түр зогсоосон аж. Харин өнөөдөр эрлийн ажиллагаа үргэлжилж байгаа юм байна. Сураггүй болсон иргэн өмнө нь олон удаа алга болж байжээ.
