Хүчингийн хэрэгт нэр холбогдож сүүлдээ бүр яллах тогтоол гардаад буй одоогийн УИХ-ын хамгийн залуу гишүүн Д.Гантулгыг тойрсон дуулиан ойрын хэдэн жилдээ намжихгүй нь бололтой. Түүний хүчингийн хэрэг нь сунжрах тусам түүнийг хараан зүхэх олон түмний дургүйцэл бухимдал улам бүр газар авах шинжтэй байна. Угаас УИХ-ын гишүүн Д.Гантулгыг хүчингийн хэрэг хийсэн гэдгийг түүний эд мөрийн баримтад анхны шинжилгээг хийсэн Шүүхийн шинжилгээний хүрээлэнгийн тусгай шинжээч О.Даваасүрэн гэх эмэгтэй бараг л нотолчихсон гэж албаны эх сурвалж нотолж байгаа юм байна. Мөн түүнчлэн хууль хяналтын байгууллага ч гэсэн хэргийн мөрөөр мөрдөн шалгаад яллах тогтоол гаргасан нь Д.Гантулгыг буруутай болохыг хангалттай нотолсон үйл явдал гэж олон түмэн үзэж байгаа. Энэ бүхнээс үүдэн тэрээр өөрөө гишүүнээсээ түдгэлзэх хүсэлт өгсөн боловч түүнийг хаацайлагч эрх баригч намын 65 гишүүн хуулийн мухардалд орчихоод байна хэмээн цаг хожиж байгааг олон нийт өдгөө харж байгаа билээ. Мөн түүнчлэн Д.Гантулга гишүүний хүчингийн хэргийг ШШҮХ-гийн дэд захирал Ц.Гантулга нуун дарагдуулсан гэсэн мэдээлэл гарсан нь тус байгууллагыг албан ёсны мэдэгдэл хийхэд хүргэжээ.
Уг мэдэгдэлд “Шүүхийн шинжилгээний тухай Монгол улсын хуульд “Шүүхийн шинжилгээний байгууллага нь эрүү, иргэн, захиргааны болон бусад хэрэг, маргааныг хянан шийдвэрлэх ажиллагааны явцад нотлох баримтыг илрүүлж, бэхжүүлж авах, ул мөр, эд мөрийн баримтад үзлэг, шинжилгээ хийж, шинжлэх ухааны үндэслэлтэй дүгнэлт гаргах чиг үүрэг бүхий төрийн байгууллага мөн” гэж тодорхойлсон байдаг бөгөөд уг хуулинд зааснаар шинжээч нь “шинжилгээ хийх явцад илэрхий болсон төр, байгууллага, хувь хүний нууцыг хадгалах” үүрэгтэй байдаг.
Шүүхийн шинжилгээний үндэсний хүрээлэнгийн захирлын 2018 оны Б/125 дугаар тушаалаар “Шүүхийн шинжилгээний үндэсний хүрээлэнгийн үйл ажиллагааг олон нийтэд таниулах, сурталчлах, хэвлэл мэдээллийн бага хурал зохион байгуулах” үүрэг бүхий ажлын хэсгийг байгуулан ажиллаж байна.
Тус байгууллагын болон шинжээчдийн зүй бус үйл ажиллагаатай холбоотой өргөдөл гомдол, санал хүсэлтийг хүлээн авах 94124666, 264018 дугаартай 24 цагийн үйлчилгээтэй утас ажиллуулж эхэлсэн бөгөөд иргэд, албан байгууллага, албан тушаалтан Та бүгдийг хуулийн хүрээнд хамтран ажиллахыг Уриалж байна” гэжээ.
