Ерөнхийлөгчийн Хэвлэл, олон нийттэй харилцах асуудал эрхэлсэн зөвлөх Г.Уянга энэ чиглэлийг хариуцсан хүний хувьд төрийн тэргүүнтэй холбоотой янз бүрийн эерэг, сөрөг хандалтуудыг хянах тодорхой хэмжээний үүрэг хүлээдэг л байх. Тэр ч утгаараа хамгийн их сенсааци дэгддэг цахим орчноос огт хараа салгадаггүй биз.
Жишээ нь, Ерөнхийлөгчийн сонгуулиас хойш тэргүүн хатагтайн асуудал намжмал болж, олон нийт бараг мартагнаж байсныг нэгэн цахим хэрэглэгч сөхсөн төдийг зөвлөгч Г.Уянга бүр даамжруулж орхив бололтой.
Ерөнхийлөгчийн сонгуульд нэр дэвшигчид тодрохоос эхлээд л Х.Баттулгын гэр гийгүүлэгч нь ямар эмэгтэй байдгийг харах, мэдэх гэсэн хүмүүс олон байсан. Арга ч үгүй биз. Тэргүүн хатагтай нь Монгол байх уу, гадны хүн байх уу гэх асуудал хүртэл гарч ирж, нэлээд шүүмжлэл дагуулж байсан болохоор тэр. Одоо ч Монголын тэргүүн хатагтайгаа харах хүсэлтэй иргэд цөөнгүй бий.
Тэгвэл саяхан нүүр номын ийм нэгэн постод Ерөнхийлөгчид зөвлөгч Г.Уянга ийм хариу өгчээ.
“Эхнэр нэхсэн нээх л олон хүмүүс. Барааг нь хараад үхмээр байна л гэнэ, яасан ч хямдхан амь байдгийн… Төрийн тэргүүнээс арай өөр юм нэхээч!
Илүү тэнгэртэйдээ “баригдаж” 4 нуган үр төрүүлсэн, ижил тэнгэртэйдээ харагддаг, дутуу тэнгэртэй нь харах тавилангүй бүсгүй бий. Зарим нэг хүн олж харахгүй бгаа юм биш бээз /хөнгөн наргиа шүү, битгий хүндрүүлээд байгаарай/” хэмээжээ.
Энэхүү хариултыг нь хүмүүс хүндрүүлснийг мэдээд тэрээр мөн “Шогийн мэдрэмжгүй болно гэдэг тэнэгэрсний тод шинж юм даа…”, “Хүний эхнэрийн тухай 1 өгүүлбэрийг хүй орчлонгоор нэг тараана. Нийгмийн тухай нэг нүүр ч унших тэвчээргүй! Хүмүүс улам тэнэгэрсээр л…” гэж үргэлжлүүлэв.
Бухимдал дүүрэн нийгэмд энэ мэт хатуудсан тоглоомд болгоомжтой хандахгүй бол нуухыг нь авах гэж байхад нүдийг нь сохлоход амархан болсон цаг үе шүү дээ.
Г.Уянга туслахын тоглоом нь ийнхүү шоглоом болох нь тэр. Наргианы 80 хувь нь үнэн гэсэн үг ч бас бий.
Товчхон сонирхуулахад, төрийн тэргүүний анхны бөгөөд албан ёсны эхнэр нь Ц.Энхтуяа гэж эмэгтэй байлаа. Түүнээс өмнө З.Уянга гэж анхны хайр нь болсон бүсгүй бас бий. Харин Ерөнхийлөгчийн сонгуулийн үеэр шүүмжлэл дагуулсан эмэгтэй бол Анжелика юм.
