Нийтийн сонсголын тухай хуулийн 10 дугаар зүйлийн 10.1-д заасны дагуу “УИХ-ын гишүүдийн дөрөвний нэг нь гарын үсэг зурсан тохиолдолд нээлттэй сонсгол явуулах эрхтэй” болдог. УИХ-ын гишүүн Л.Оюун-Эрдэнэ “ 60 тэрбум”-ын асуудлаар нээлттэй сонсгол зохион байгуулахаар гарын үсэг цуглуулж эхэлсэн. Одоогоор нээлттэй сонсголыг нийт 17 гишүүн дэмжиж гарын үсэг зураад байна. Үндсэндээ 19 гишүүн гарын үсэг зурчихвал нээлттэй сонсгол хийх нөхцөл бүрдэх юм. 60 тэрбумтай холбоотой хэргийг үнэн зөв эсэхийг тогтоох, УИХ-ын дарга М.Энхболд тэргүүтэй нэр холбогдсон бүх хүмүүсийг нэгэн дээвэр дор цуглаж нэрээ цэвэрлэх, нийгмийн дунд худал үнэн нь мэдэгдэхгүй “60 тэрбум”-тай холбоотой бухимдал үүсгэж буй асуудлыг эцэслэх нь зөв.
Үүнийг дэмжиж гарын үсэг зурах ажлыг УИХ-ын гишүүн Ж.Энхбаяр эхлүүлсэн байна. Түүний тухайд үргэлж шударга ёсны төлөө дугардаг. Энэ мэт залуус олон байх тусам улс орон хөгжинө. Уг нь бол төрийн түшээд эх орон,ард түмний төлөө төрд шударга үнэнчээр зүтгэх тангарагтай. Гэсэн атал хувийн эрх ашгийн төлөө, хэдэн үеэрээ ч идээд барахгүй их хөрөнгө мөнгө цуглуулах зорилготой мэт ард түмэнд харагдах болсон. Эдийн засагч Б.Энхбатын хэлсэнчлэн Монголд Эдийн засгийн хямрал биш “хулгай” байхгүй бол улс оронд олон зүйл цэгцэрнэ гэдэг ч үнэн. Наад захын жишээ л гэхэд Монгол улсад АСЕМ-ын дээд хэмжээний уулзалт зохион байгуулах нэрээр экс Ерөнхийлөгч Ц.Элбэгдорж 395,7 тэрбум төгрөгийг хяналтгүй зарцуулсан байх жишээтэй. Одоогийн төрийн тэргүүний нэр ч тийм цэвэр дуулдахгүй л байна. Тэрээр өнөөх 60 тэрбумд нэр холбогдсон УИХ-ын дарга М.Энхболд, экс Еөрөнхийлөгч Ц.Элбэгдорж хоёртой үй зайгүй найз. Зүгээр нэг нөхөрлөл бус МАНАН-ын бүлэглэлийн толгойлогч нар гэнэ.
Энэ бүлэглэл МАНАН-г, “60 тэрбум”-ын хэргийг олон нийтэд үнэн худлыг дэнслэх сургаар Л.Оюун-Эрдэнэ, Д.Амарбаясгалан нарыг хааш нь ч хөдөлгөхгүй дарахаар улайрч байгаа сурагтай. Эх сурвалжаас авсан мэдээллээр Засгийн газрыг дахин огцруулах, дараагийн Засгийн газрыг хэрхэн бүрдүүлэхээ ч тохирсон гэж байна. Ерөнхий сайдаар Д.Хаянхярвааг, ЗГХЭГ-ын даргаар Д.Оюунхоролыг гэсэн тохироо хүртэл хийгдчихжээ. УИХ-ын дарга М.Энхболд, Ерөнхийлөгч Х.Баттулга, экс Ерөнхийлөгч Ц.Элбэгдорж гурват Х.Хүрэлсүхийн Засгийн газар улс орны хөгжил дэвшлийн төлөө шударга, зоригтой, үр дүнтэй ажиллаж, зүтгэж байгаа нь таалагдахгүй байгаа бололтой. Мөн “60 тэрбум”-ын хэрэг УИХ-ын дарга М.Энхболд тэргүүтэй бүлэглэл оролцсон эсэх үнэн, худлыг дэнслэх явдал ч тэдний “НӨХӨРЛӨЛ, БҮЛЭГЛЭЛ”-ийг илчлэх тул шударга үнэний төлөө зүтгэж буй залуу улстөрчдийг нухчин дарах ажилд эргэлт буцалтгүй хүчээ хавсарч эхэлсэн гэнэ.
