Дэлхийн цахилгаан холбооны технологийн салбарт сүүлийн жилүүдэд Хятадын Хуавэй компани хамгийн их дарамт шахалтад өртөж, хамгийн олон шалгуурт орж буй аж. Тэгвэл саяхан Австралийн Засгийн газар “интернетийн аюулгүйн байдал”-ыг харгалзан үзэхдээ, Хуавэй компани тус улсын 5G сүлжээний бүтээн байгуулалтад оролцохыг хориглосон тухайгаа мэдэгдлээ.
Интернэтийн аюулгүй байдал хүн бүрийн, тэр дундаа улс орнуудын амин чухал ашиг сонирхолтой нягт холбоотой. Гэвч үүнийг хэт дэвэргэж, ялангуяа улс төрийн зорилгоор шалтаг болгон ашиглах нь бүр ч хортой хэмээн хятадын зүгээс үзэж байгаа бөгөөд Австралийн Засгийн газрын шийдвэр нь ямар ч үндэслэлгүй гэжээ.
Хуавэй одоогоор олон улсын хэмжээнд үйл ажиллагаа явуулж буй цахилгаан холбооны 50 гол аж ахуйн нэгжийн 45-тай нь хамтын ажиллагаатай, 170 гаруй улс оронд түгж, дэлхийн нийт хүн амын 1/3 хувийн өдөр тутмын цахилгаан холбооны эрэлт хэрэгцээг ханган ажилладаг байна. Энэ талаар хятадын хэвлэлд дурьдаад “Техникийн түвшинд Хуавэй компани Австралийн хамгийн том 4G сүлжээний техник ханган нийлүүлэгч, тус улсын цахилгаан холбооны зах зээлийн өрсөлдөх хүчин чадлыг дээшлүүлсэн төдийгүй олон нийтийн сүлжээ, цахилгаан холбооны зардлыг буруулсан юм. Харин үйл ажиллагааны хувьд даяаршил хурдтай өрнөж буй өнөө үед Хуавэй, Нокиа, Эрикссон, Аппль компани бүгд ижил төстэй ханган нийлүүлэгч, үйлдвэрлэлийн шугамтай. Бүгдэд нь Хятадын аж үйлдвэрийн оролцоо бий.
Интернэтийн аюулгүй байдал гэдэг бол Австралийн Засгийн газар Хуавэй компаниас татгалзах шалтаг төдий юм. Бизнес худалдааны дүрэм журамд нийцэхгүй, эчнээ далд санаатай энэхүү шалтгийн ард улс төрийн хүчин зүйл, оролцоо бий нь мэдээж. Урт хугацааны турш Хятад улс Австралийн гадаад худалдааны хамгийн том түнш байсаар ирсэн ба АНУ тус улсад аюулгүйн “халхавч”-ийн үүрэг гүйцэтгэсэн бол БНХАУ, АНУ-тай харилцах дипломат харилцааны тэнцвэрийг Австралийн засгийн газар чухалчилж ирсэн юм. 2017 оноос хойш Австрали-Хятадын харилцаа “хөндийрч”, тус орны дотоодод Хятадын эсрэг, найрсаг бус байдал хурцдан, хятадын оюутнуудыг буруутгах, хятадын харьяат, цагаачдыг шалгах зэрэг асуудал үргэлжлэх болж, Хятад улстай холбоотой хувь хүн, аж ахуйн нэгж, байгууллагад “аюултай” хэмээх шошго зүүлгэж ирлээ. Хуавэй үндэстэн дамнасан хувийн хэвшлийн аж ахуйн нэгжийн хувьд, энэ удаад ил тод нөхцөлд Австралийн 5G сүлжээний бүтээн байгуулалтад оролцох эрхийн төлөө өрсөлдсөн ч, Хятад улсын аж ахуйн нэгж гэдэг утгаараа “хаалганы гадна үлдсэн” байна.” гэж бичжээ.
Саяхан АНУ “Батлан хамгаалах зөвшөөрлийн тухай хууль”-ийг баталж, АНУ-ын Засгийн газрын харьяа байгууллагууд болон Засгийн газартай нь хамтран ажилладаг аж ахуйн нэгжүүд Хуавэй, ZTE компанийн бүтээгдэхүүнийг хэрэглэхийг хориглосон байдаг. Австралийн хувьд ч 1988, 2015 онд Хятад улстай тохиролцсон хөрөнгө оруулалт, чөлөөт худалдааны хоёр талт гэрээ хэлэлцээрийг умартаж, “аюултай” гэдэг шалтгаанаар ийнхүү Хуавэй компанитай хамтарч ажиллахаас татгалзлаа. Сүүлийн үеийн мэдээллээр, Австралийн Засгийн газрын энэ шийдвэр гарсанаас хойш мэдээлэл холбооны үйлчилгээ ханган нийлүүлэгч дотоодын компаниуд нь үнээ өсгөхөөр зэхээд байгаа аж.
Хятад, Австралийн харилцаа үнэндээ харилцан ашигтай, хамтдаа ашиг хүртэх харилцаа юм гэсэн байр суурийг Хятадын талаас илэрхийлсээр байгаа юм. Тус улс бизнесийн асуудлыг улс төржүүлэх ёсгүй гээд, “Австралийн Засгийн газар мэдээлэл холбооны техникийг ашиглан ирэх хэдэн жил эдийн засгаа өсгөе гэвэл ялгаварлан гадуурхах байр сууриа орхиж, Хуавэй зэрэг инновацын хүчин чадал сайтай Хятадын аж ахуйн нэгжүүдийг дэмжин, зах зээлээ нээж өгөх ёстой” гэжээ.
