Хууль зөрчсөн 28-ыг удаах хэрэг байна уу?

Эдгээр 28 хүн намын жагсаалтаар гарч ирж, өнөөдөр \”УИХ-ын гишүүн” хэмээн
сэнтийд заларч сууна. Гэтэл Үндсэн хуулийн цэц хуралдаад энэ 28 хүн УИХ-д сууж
байгаа нь \”хууль зөрчсөн явдал мөн” гэдгийг зарлав. Үүний дараа УИХ дахь намын
бүлгүүд хуралдаж, цэцийн шийдвэрийг хүлээн зөвшөөрлөө. Одоо УИХ-ын нэгдсэн
чуулганаар асуудлыг хэлэлцэх л үлдэж байх шиг байна. Цэцийн дүгнэлт нэгэнтээ намын
бүлгүүдийн хурлаар дэмжигдсэн учраас УИХ ч дэмжээд явах болов уу.

 

Гэвч энд нэг асуудал байна. Сонгуулийн хуулийг сонгууль болохоос зургаан
сарын өмнө баталж, түүнээс цааш өөрчилдөггүй журамтай. Гэтэл цэцийн гаргасан
шийдвэрээс болоод \”Сонгуулийн хууль”-д өөрчлөлт оруулах шаардлагатай болчихлоо.
Хоёр сар хүрэхгүй хугацаа үлдчихээд байхад шүү дээ. Цэцийн шийдвэрийг дагахын
тулд өөр нэг хуулийг зөрчих нь байна.

Алдаатай, зөрчилтэй хууль баталчихсан бол цаг алдалгүй, яаралтай өөрчлөх нь
зөв. Гэвч ийм хуулиар өмнө нь нэг биш удаа сонгуулиа явуулж, сонгогдсон гишүүд
нь дөрөв дэх жилдээ төрийн өндөр сэнтийд заларч, хууль батлалцаж байхад \”оройтсон”
гэмээр цэцийн шийдвэрээс болж магадгүй сонгууль ч хойшлож мэдэхээр байдал
үүсчихээд байна.

Анх л холимог тогтолцоогоор сонгууль явуулахаар хуулийн төсөл оруулж ирж
байхад Үндсэн хуулийн цэц юу хийж байсан бэ гэж асуумаар. Гэвч тэртээх зургаан
жилийн өмнөх асуудлыг одоо сөхөж, бүр дордуулаад яах вэ.

Дүүрч… Алдаатай хуулиар 28 хүн УИХ-д сонгогдчихож. Тэгвэл ирэх сонгуулийг
алдаатай хуультайгаа угтах уу. Эсвэл хугацаа алдахгүй өөрчлөх үү.

Ураны асуудлаар ээлжит бус чуулган зарлаад л яаралтайгаар хуралдаад байдаг
мөртлөө. Хэлэлцэх асуудлын урдуур алдаатай хуулиа оруулж өөрчилж болдоггүй юм
болов уу. Эсвэл алдаа дутагдал багатай хуулийн төслийг зориудаар, санаатайгаар \”
хууль зөрчигч” болгож, олон нийтийг төөрөлдүүлж, цаг хугацаа алдуулж,
сонгуулийг хойшлуулах, өөрсөддөө ашигтай боломж олох өөр нэг атгаг санаа байгаа
юм биш биз.

 

А.Аюуш