Ерөнхий сайд У.Хүрэлсүх УИХ-ын намрын чуулганы хуралдаанд “Монгол Улсын хүн амын нутагшилт, суурьшлын хөгжлийн ерөнхий төсөл” боловсруулах ажлын явцын талаар мэдээлэл хийнэ. Төслийн талаар онцлох мэдээллийг хүргэе.
Өнөөгийн байдлаар Монгол Улсын хотжилтын түвшин нь хөдөөгөөс хот руу чиглэсэн хүн амын шилжилт хөдөлгөөний нөлөөгөөр хурдацтай нэмэгдэж 67.6 хувьд хүрчээ. Аймгийн төвүүд болон нийслэлийн орчимд нийт хүн амын 60 гаруй хувь нь амьдарч, ажиллаж байна. Улаанбаатар хотод гэхэд хүн амын 46 хувь нь төвлөрч, ААН-үүдийн 70 орчим хувь нь байршиж, ДНБ-ий 60 гаруй хувийг үйлдвэрлэж байна. Үүнийг дагаад олон талын сөрөг үр дагаврууд бий болж байгаа юм. Тэдгээр сөрөг нөхцөл байдлыг дэлхий нийтийн хэмжээнд авч үзэхэд манай орноос гадна Мексик, Бразил, Египет, Сенегал, Нигер, Бангладеш, Энэтхэг, Пакистан, Индонези зэрэг улсуудад тулгамдсан асуудал болж, том хотуудын хэт төвлөрлийг сааруулахын тулд бага, дунд хотуудын хөгжлийг дэмжих, мөн шинэ суурьшлын төвүүдийг байгуулах замаар хүн амын тогтвортой хөгжил бүхий нутагшилт, суурьшлын бодлогыг шинээр боловсруулан хэрэгжүүлэх шаардлагатай болоод байгаа юм.
Олон улсын жишгээс авч үзвэл манай улсын хувьд бодит үр дагавар бүхий нутаг дэвсгэрийг зохион байгуулах, хүн амыг зохистой байдлаар нутагшуулах төслийг боловсруулж, төрийн бодлогын түвшинд авч үзэн хэрэгжүүлэх зайлшгүй шаардлага урган гарч байна. Иймд “Монгол Улсын хүн амын нутагшилт, суурьшлын хөгжлийн ерөнхий төсөл”-ийг боловсруулж хэрэгжүүлэхээр Засгийн газар ажиллаж байна. Уг төслийг боловсруулахад:
-төсөв, хөрөнгийн эх үүсвэрийг жил бүрийн төсөвт тусган, батлуулах
-хүн амын нутагшилт, суурьшлын хөгжлийн ерөнхий төлөвлөгөөний төслийг боловсруулах үйл явцыг Улаанбаатар хотыг 2040 он хүртэл хөгжүүлэх хөгжлийн мастер төлөвлөгөөг боловсруулах үйл ажиллагаатай нягт уялдуулан боловсруулах шаардлагатай байгаа аж.
Төслийн үр дүнд:
-Хүн амын нутагшилт, суурьшлын талаар төрөөс баримтлах урт хугацааны бодлого, төлөвлөлтийн баримт бичигтэй болно.
-Бодлогын түвшинд богино /3-5 жил хүртэл/, дунд /8-10 жил/, урт /15-20 жил хүртэл/ хугацаанд хэрэгжүүлэх стратегийн зорилтудыг тодорхойлно.
-Хүн амын нутагшилт, суурьшлын тогтолцоо болон нутаг дэвсгэр зохион байгуулалтын нэгдсэн схемийг боловсруулна.
-Бүс нутаг, хот, суурин газруудын хөгжлийн чиглэл, гүйцэтгэх үүргийг тодорхой болгож тогтооно.
-Үндсэн дэд бүтэц /зам, тээвэр, харилцаа холбоо, эрчим хүч гэх мэт/, аж үйлдвэрлэл, уул уурхай, аялал жуулчлал, эдийн засгийн тогтвортой хөгжлийг хот байгуулалтын бодлоготой уялдуулан цогц төлөвлөлтийг боловсруулна.
Уг төслийн ажлын явцын тухайд одоогийн байдлаар:
-Төслийг боловсруулан батлуулах ажлыг удирдан зохион байгуулах үүрэг бүхий Үндэсний хороог байгуулсан. Тус хорооноос төсөл боловсруулж батлуулах ажлыг хэрэгжүүлэх арга хэмжээний төлөвлөгөөг гарган хэрэгжилтийг ханган ажиллаж байна.
-Энэ хүрээнд төсөл боловсруулах ажлын зургийн даалгаврын төслийг боловсруулж, холбогдох байгууллагуудаас санал авах, нэгтгэх ажиллагааг явуулж байна.
-Барилгын хөгжлийн төвийн дэргэд Хот байгуулалт, зураг төсөл, төлөвлөлттийн институтийг байгуулж, үйл ажиллагааг нь эхлүүлээд байна.
-Орон зайн өгөгдлийн дэд бүтэц, мэдээллийн санг түшиглэн нийт нутаг дэвсгэрийг хамарсан орон зайн төлөвлөлт хийх ажлыг зохион байгуулж байна.
-Төсөл боловсруулахад мэргэжил, арга зүйн дэмжлэг үзүүлэх, холбогдох салбарын чиглэлээр судалгаа, тооцоолол, мэдээллээр хангах, санал, зөвлөмж өгөх үүрэг бүхий техникийн ажлын хэсгийг байгуулсан.
-Холбогдох гадаадын түнш байгууллагуудын төлөөллийг техникийн ажлын хэсэгт оролцуулсан бөгөөд энэ хүрээнд шаардлагатай мэдээлэл, зөвлөгөөгөөр хангах, техник туслалцаа үзүүлэх чиглэлээр НҮБ-ын Хүн амын нутагшил, суурьшлын хөтөлбөртэй хамтран ажиллаж байна.
-Төсөл боловсруулах суурь судалгааны ажлыг гүйцэтгэх, төслийг боловсруулах хүний нөцийн чадавхийг бэхжүүлэх чиглэлээр ЖАЙКА-тай хамтран ажиллаж байгаа бөгөөд тус байгууллагын Төслийн зөвлөх баг энэ сараас Монголд ирж ажиллахаар тохиролцоод байна.
-АХБ, БХБЯ-ны хооронд харилцан ойлголцлын санамж бичгийг байгуулсан.
-Эрдэмтэд, судлаачид, мэргэжилтнүүдийн оролцоо сэдвээр хэлэлцүүлгийг гурван удаа зохион байгуулсан зэргийг дурдсан байна.
Дэлгэрэнгүйг ЭНД ДАРЖ үзнэ үү.
