Турк улсын буцалтгүй тусламжийг хүлээн авлаа

Сүүлийн жилүүдэд Монгол Улс, БНТУ-ын Засгийн газар, Батлан хамгаалах яамд хооронд цэргийн зориулалттай бүтээгдэхүүн үйлдвэрлэгчтэй гэрээ, хэлэлцээр байгуулах, Туркийн цэргийн сургуулиудад цэргийн алба хаагчдыг сургаж бэлтгэх чиглэлд идэвхтэй хамтран ажиллаж байгаа бөгөөд байгуулагдсан гэрээ, хэлэлцээрүүд амжилттай хэрэгжиж байна. 

Батлан хамгаалахын сайд Ц.Цолмон 2015 онд БНТУ-д айлчлахдаа Монгол Улсын Засгийн газар, БНТУ-ын Засгийн газар хооронд байгуулсан \”Цэргийн салбарын Санхүүгийн хамтын ажиллагааны хэлэлцээр\”-ийг байгуулсан билээ. Хэлэлцээрээр 1.0 сая ам.доллар буюу 3,000,000 турк лирийн үнэ бүхий тусламжийн бараа, бүтээгдэхүүнийг Монгол Улсын Батлан хамгаалах яаманд Турк улсын Батлан хамгаалах яамнаас олгохоор тусгасан байдаг юм байна. Тэгвэл өнөөдөр энхүү хэлэлцээрийн дагуу Турк улсаас 819,500 ам.долларын буцалтгүй тусламжийг хүлээлгэн өглөө. Тусламжийг хүлээн авах ёслолын ажиллагаанд Батлан хамгаалахын сайд Ц.Цолмон, БНТУ-аас манай улсад суугаа Онц бөгөөд бүрэн эрхт Элчин сайд Мурат Карагоз болон бусад албаныхан, БХИС-ийн захирал, хошууч генерал Я.Чойжамц, Батлан хамгаалах яамны Гадаад хамтын ажиллагааны газрын дарга, бригадын генерал Ч.Сосорбарам, Бодлогын хэрэгжилтийг зохицуулах газрын дарга, дэд хурандаа Э.Бямбажав нарын БХЯ, ЗХЖШ-ын удирдлагууд оролцлоо. Батлан хамгаалахын сайд Ц.Цолмон хэлсэн үгэндээ \”Манай хоёр улсын хамтын ажиллагаанд чухал байр суурь эзлэх салбар бол батлан хамгаалах салбар байдаг. Туркийн Засгийн газраас манай Зэвсэгт хүчний шинэчлэлийг дэмжиж, жил бүр буцалтгүй тусламж, дэмжлэг үзүүлж, тусламжийн хэмжээ нэмэгдэж байгаад БНТУ-ын Засгийн газар, Батлан хамгаалах яаманд талархаж байгаагаа илэрхийлье. Монгол Улсын Зэвсэгт хүчинд үзүүлж буй тусламж нь Монголын цэргийн алба хаагчдын нийгмийн асуудлыг шийдвэрлэх, Зэвсэгт хүчний шинэчлэлийг хэрэгжүүлэхэд чухал нөлөө үзүүлж байдаг. 2015 онд хоёр улсын Батлан хамгаалах яамд хоорондын долдугаар зөвлөлдөх уулзалт амжилттай зохион байгуулагдсан, БНТУ-аас Монгол Улсад суугаа Элчин сайдын яаманд Батлан хамгаалах атташегийн алба нээгдсэн гээд хамтын ажиллагаа жилээс жилд улам бэхжин хөгжиж байгааг онцлон тэмдэглэмээр байна. Батлан хамгаалахын атташегийн алба шинээр байгуулагдсан нь Батлан хамгаалах гадаад хамтын ажиллагаанд чухал ач холбогдолтой онцлох үйл явдал болсон. Монгол Улс, Бүгд Найрамдах Турк Улсын Зэвсэгт хүчний Тусгай хүчний бүлгүүдийн хамтарсан \”Нүүдэлчин дайчид\” хээрийн сургууль жил бүр амжилттай зохион байгуулагдаж байгааг онцлох ёстой\” гэсэн юм. Өнөөдөр Турк Улсын Засгийн газраас 819,500 ам.долларын үнэ бүхий 

1. Үүргэвчийн нисгэгчгүй нисэх аппарат

2. Дизель цахилгаан үүсгүүр, генератор 

3. Ус борооноос хамгаалагдсан зөөврийн ЛЕД дэлгэц, тайз дагалдах хэрэгсэлийн хамт

4. Цэргийн хүн нэг бүрийн хамгаалах хэрэгсэлийг хүлээлгэн өгсөн юм. Турк Улсын Батлан хамгаалах яамнаас Монгол Улсын Батлан хамгаалах яаманд жил бүр тусламжийн бараа олгож ирснийг онцлох ёстой. 

Буцалтгүй тусламж нь мөнгөн хэлбэрээр бус бараа бүтээгдэхүүнээр олгогддог юм.