Өнгөрөгч амралтын өдөр зарим орон нутгуудад их хэмжээний бороо орж, үер буусны улмаас хэд хэдэн автозамын зорчих хөдөлгөөнийг түр хугацаанд хязгаарласан байна.
Говь-алтай аймгийн Тайшир, Төв аймгийн Лүн суманд үер бууж, энэхүү үерийн улмаас тус сумдад хүрэх авто зам усанд автсан билээ. Мөн энэхүү хүчтэй үерийн улмаас авто зам болон замын байгууламжууд эвдэрч замын хөдөлгөөнийг хэвийн үргэлжлүүлэх боломжгүй болсон учир Улаанбаатар-Төв аймгийн Лүн сум хүртэлх авто замыг 2019 оны зургаадгаар сарын 16-ны ѳдрийн 18:00 цагаас 2019 оны зургадугаар сарын 17-ны ѳдрийн 18:00 цаг хүртэл хугацаанд түр хааж, автотээврийн хѳдѳлгѳѳнийг хязгаарласан байна.
Мөн энэхүү үерийн улмаас Улаанбаатар-Өвөрхангай чиглэлийн Улсын чанартай А0301 автозам хүчтэй аадар бороо орсны улмаас үерт автаж тээврийн хэрэгсэл зорчих боломжгүй болж хаагдсан байна. Үүнтэй холбогдуулан уг замын тээврийн хэрэгслийн хөдөлгөөнийг 2019 оны зургадугаар сарын 17-ны 18.00 цаг хүртэл түр хугацаагаар хаагаад байгаа юм. Иймээс иргэд, жолооч та бүхэн Өвөрхангайгаас Улааанбаатрын чиглэлд зорчихгүй байхыг Өвөрхангай аймаг дахь замын цагдаагийн газраас анхаарууллаа.
Улаанбаатар-Арвайхээр чиглэлийн авто замын 100км,117км-т зорчих хэсэг дээгүүр үерийн ус давж, далан усанд идэгдэн тээврийн хэрэгсэл зорчиход хүндрэл үүссэн тул хөдөлгөөнийг түр хязгаарлажээ.
Улаанбаатар- Мандалговь чиглэлийн авто замын 107 км 800м, 116-123 км-ийн хооронд хэсэгчилэн зорчих хэсэг дээгүүр үерийн ус давж тээврийн хэрэгсэл зорчиход хүндрэл үүссэн тул тус чиглэлийн замд зорчихгүй байхыг анхааруулав.
Иймээс нийслэлээс баруун чиглэлд хүчтэй аадар бороо орсны улмаас зам, замын байгууламж үерт автаж, эвдэрсэн тул тус чиглэлд зорчихгүй байхыг ЗТХЯ, Онцгой байдал, АТҮТ болон Тээврийн цагдаагийн албанаас зөвлөж байна.
