Усан парк барихаар хашаа хатгасан ч одоо орон сууцны барилга бариад эхэлсэн гэх асуудал олон нийтийн анхаарлыг татаж, шүүмжлэлд өртөөд байна.
Тэгвэл усан парк төслийг хэрэгжүүлэгч “Эм энд Жи” констракшны захирал А.Амарбаясгалан тайлбар мэдээлэл өглөө.
Тэрээр “Манайх 2008 онд Нийслэлийн Засаг даргын захирамжаар 11.8 га газрыг орон сууцны зориулалтаар ашиглахаар гэрчилгээ авсан.
2006 оноос Монгол Улсын засгийн газар 40 мянган орон сууцны хөтөлбөр хэрэгжүүлэхээр болж, энэ хүрээнд “Эм энд Жи” констракшнд уг хөтөлбөрт дэмжлэг болж, 11.8 га газарт орон сууцны зориулалтаар олгосон.
Уг газар 2012 онд ногоон байгууламжийн зориулалттай болж өөрчлөгдсөн. Энэ нь Нийслэлийн Засаг даргаас энэ зориулалтыг өөрчилсөн. Манай компани орон сууцны хөтөлбөрөө хэрэгжүүлнэ гэж дайрахгүйгээр төсөлдөө усан парк, энтертаймент төв бүхий нэгдсэн том цогцолбор барихаар 2013 оноос ажлыг эхлүүлсэн.
Английн компанитай хамтарч ТЭЗҮ боловсруулсан. Нийтдээ 1.2 сая ам.долларыг үүнд төлсөн байдаг.
Ингээд нийслэл хотдоо усан парк барьж, жуулчдыг татах аялал жуулчлалын цэг болох азийн хамгийн том усан паркийг барих санаачилгыг компанийнхаа зүгээс гаргаж байв. Энэ төсөл одоо хүртэл үргэлжилж байгаа. Зарим хэвлэл мэдээллийн хэрэгсэл усан паркийн хэсгийг орхиод орон сууцны барилгын ажлын мэдээллийг өгч байна. Усан паркийн ажил зогсоогүй.
Бид 2008 онд хууль ёсных нь дагуу, тухайн үед дуудлага худалдааны 230 гаруй сая төгрөгийг төлөөд газар авсан. Бид бизнесийн дотоод үйл ажиллагаагаа тайлагнах шаардлага байхгүй. Гэхдээ нийслэлчүүдийн анхааралд энэ сэдэв байгаа болохоор тайлбар өгсөн нь зүйтэй гэж үзсэн.
Усан паркийн хэсэгт 90 сая ам.долларын санхүүжилт шаардлагатай байсан. Бидэнд өөрсдийн дотоод нөөц бололцоогоороо санхүүжилтээ зохицуулахаас өөр гарц үлдээгүй. 2012 онд жирийн нэг компани байтугай засгийн газар ч бонд босгох боломжгүй, зээлжилтийн зэрэглэл буурсан байсан.
Эдийн засаг, санхүүгийн хүндрэл нь усан паркийн ажил удаашрах эхний шалтгаан байлаа. Хоёрдугаарт, Энхтайваны гүүрнээс, Замын цагдаагийн төмөр замын гарц хүртэл 11.8 га газрыг анх олгосон. Үүнээс хойш 2014 онд Нийслэлээс Энхтайваны гүүрний харалдаа нүхэн гарц барьсан. Ингээд манай компанийн эзэмшлийн газар дундуур зам тавьсан. Дараа нь шинэ гүүрний бүтээн байгуулалттай холбоотойгоор Нийслэлийн удирдлагууд санал тавьж, ажил хийх зориулалттай зам талбайг чөлөөлж өгөхийг хүссэн. Манай компани нийгмийн хариуцлагын хүрээнд хүлээн зөвшөөрч, дэмжлэг үзүүлэн ажилласан.
Нийслэлийн бүтээн байгуулалтад зориулж газраа ашиглуулж байгаа учраас манайх зориулалтынхаа дагуу үйл ажиллагаа явуулж чадсангүй. Мөн түр зам тавих асуудлыг Нийслэлийн удирдлагууд албан бичгээр мэдэгдэж байсан. Бид нийгмийн хариуцлагын хүрээнд хамтран ажиллахаар Нийслэлийн авто замын газартай гэрээ байгуулсан. Ингээд манай компанийн эзэмшлийн 11.8 га газар гурав хуваагдсан. Шалтгааныг нь би дээр тайлбарлалаа. Газрын гэрчилгээг гурав хуваах шаардлагатай болсон юм. Гэтэл үүнийг газраа хуваагаад зарах гэж байна гэх мэдээллийг нийслэлийн нэр бүхий удирдлагууд мэдээлсэн.
Энэ нь ор үндэсгүй худал мэдээлэл байсан.
Бид Нийслэлийн Захиргааны хэргийн анхан шатны шүүхэд газрын гэрчилгээг хүчингүй болох захирамжийг хэрэгсэхгүй болгох тухай хандсан. Ингээд шүүхийн шийдвэрээр захирамжийг хүчингүй болгосон юм.
2021.03.03-ны өдөр газар эзэмших эрхийг албан ёсоор сэргээсэн. Санхүү болон бусад шалтгааны улмаас манай ажил удааширсан.
А даалгавар авах, зураг төсөл боловсруулахад нийт гурван жил зарцуулсан. Орон сууцнаас гадна 1000 хүүхдийн сургууль, 600 хүүхдийн цэцэрлэг, худалдаа үйлчилгээний төв барина.
Бид гурван хотын даргын нүүрийг үзлээ. Хотын удирдлагын зүгээс хувийн хэвшлийг дарамтлан, орон сууц барих зориулалттай газар авсан байхад ногоон байгууламж болго гэсэн. Таны гэр бүлийн хэрэгцээний газрыг ногоон байгууламж болго гэвэл та яах вэ? Зөвхөн усан парк барихад 90 сая ам.доллар зарцуулах тооцоо гарсан. Энэ нь 270 тэрбум төгрөг шаардана. Энэ их том төсөл учир цаг хугацаа шаардсан. Мөн усан парк барих газарт үерийн далан сэтэлж, шинэ гүүр барьсан нь (“Галакси” төвийн баруун талд) төсөл хойшлоход нөлөөлсөн. Үерийн улмаас түр гүүр барьсанд бид гомдоллохгүй. Энэ гүүр нийт иргэдэд хэрэгтэй. Бид газар хөдлөлтөд тэсвэртэй барилгууд барина, эрсдэлтэй зүйл хийхгүй.
Хувийн хэвшлийн ажилд хөндлөнгөөс оролцон, буруу мэдээлэл тараасан тул би та бүхэнд мэдээлэл өглөө. Бид төслөө 2028 он гэхэд бүрэн дуусгахаар зорьж байна. Компанийн дотоод үйл ажиллагааг та бүхэнд дэлгэрэнгүй яримааргүй байна” гэв.
