Өмнөд Америкийн Перу улсын хувьд өчигдөр улс төрийн үйл явдлуудаар дүүрэн өдөр байлаа.
Перу улсын зүүний үзэлтэй ерөнхийлөгч Педро Кастиллод парламент нь итгэл үзүүлэхээс татгалзсан тул өчигдөр албан тушаалаасаа огцорчээ.
Түүний оронд 60 настай хуульч Дина Болуарте тангараг өргөж, Перугийн анхны эмэгтэй ерөнхийлөгч болсон байна.
18 сарын өмнө болсон сонгуулиар хөдөө тосгонд багшаар ажилладаг Кастилло ерөнхийлөгч болсон нь тус улсын улс төрийн амьдралд гэнэтийн цочир үйл явдал байв.
Өнгөрсөн хугацаанд тэрбээр ерөнхийлөгчийн албан тушаалд тэнцэхгүйгээ удаа дараа батлан харуулж, гурав дахь удаагаа импичменттэй тулгараад байжээ.
Өчигдөр өглөө 53 настай Кастилло сөрөг хүчин давамгайлсан парламентыг тарааж, онц байдал тогтоох болсноо телевизээр зарласан юм.
Үүнийг эсэргүүцсэн парламентын гишүүд хугацаанаасаа өмнө чуулж, ерөнхийлөгчид итгэл үзүүлэхээс татгалзах асуудлаар санал хураалт зохион байгуулахад 130 гишүүнээс 101 нь дэмжжээ.
Ерөнхийлөгчөөр ажиллах хугацаандаа таван удаа засгийн газрын танхимыг өөрчилж, зургаан хэрэгт холбогдон шалгагдаж байгаа Кастиллог өндөр албан тушаал хаших ёс суртахууны чадваргүй хүн гэж парламентын гишүүд үзсэн байна.
Перу улсын үндсэн хууль ерөнхийлөгчийг хууль бус үйлдлээр нь бус, улс төрийн субъектив үндэслэлээр яллах боломж олгосон байдаг.
Тиймээс Кастилло нь “ёс суртахууны хувьд чадваргүй” үндэслэлээр 2018 оноос хойш албан тушаалаасаа зайлуулагдсан Перугийн гурав дахь ерөнхийлөгч болж байна.
Түүнийг огцруулснаас хойш хоёр цагийн дараа Болуарте тангараг өргөж, Кастиллогийн бүрэн эрхийн хугацааг дуусах хүртэл буюу 2026 оны долдугаар сар хүртэл ерөнхийлөгчөөр ажиллахаар болжээ.
Улс төрийн тогтворгүй байдал Перугийн хувьд шинэ зүйл биш. 2020 онд тус улс таван өдрийн хугацаанд гурван өөр ерөнхийлөгчтэй болж байсан удаатай.
Өчигдөр орой Перугийн ерөнхий прокурорын газар Кастиллог баривчилснаа зарлажээ.
Тэрбээр Перугийн жижиг тосгонд төрж, 24 жил хөдөөгийн сургуульд багшаар ажиллаж байсан хүн юм. 2017 онд болсон цалин хөлс нэмэхийг засгийн газраас шаардсан иргэдийн тэмцлийн үеэр Кастилло анх олны танил болж байжээ.
Тэрбээр өөрийгөө жирийн ардын төлөөлөл мэтээр харагдуулж, авлигатай шийдвэртэй тэмцэх амлалт өгсөөр ерөнхийлөгчийн сонгуульд ялж байв. Гэвч Кастилло ерөнхийлөгч болоод амлалтаа биелүүлээгүйгээр барахгүй өөрөө янз бүрийн дуулианд нэр холбогдох болсон тул Перугийн олон нийтийн дунд нэр хүнд нь нэлээд унаад байжээ.
Эх сурвалж: AFP
