УИХ-ын ес дэх удаагийн сонгуулиар 126 гишүүнийг сонгох санал хураалт өнөөдөр /2024,06.28/ улс даяар 07:00 цагаас эхэллээ.
Санал хураалт 22:00 цаг хүртэл үргэлжилнэ. Бүх нийтийн амралтын өдөр, автомашины дугаарын хязгаарлалт үйлчлэхгүй.
Энэ удаагийн сонгуульд 19 нам, хоёр эвслээс 13 тойрогт 969, бие даан нэр дэвшиж байгаа 42 хүнээс иргэд сонголтоо хийх өдөр. Учир нь Монгол Улсад засгийн бүх эрх ард түмний мэдэлд байж, сонгож байгуулсан төрийн эрх барих төлөөлөгчдийн байгууллагаараа уламжлан энэхүү эрхээ эдлэх хуультай.
Харин УИХ-ын гишүүн бол төрийн эрх барих дээд байгууллагад сонгогдсон ард түмний элч. Нийт иргэн, улсын ашиг сонирхлыг эрхэмлэн баримтлах үүрэгтэй байна.
Парламентын 126 гишүүнийг сонгох үйл ажиллагаанд улсын төсвөөс 32 тэрбум төгрөг зарцуулах бөгөөд Монгол Улсын нэг иргэн саналаа өгөхөд дөрвөн ам.доллар буюу 14,000 төгрөг зарцуулагдана.
Ингээд санал өгөх байр, саналын хуудсыг хэрхэн бөглөх, санал авах байранд хориглох зүйлсийн талаарх мэдээллийг хүргэе.
-
Та аль тойргийн сонгогч болох, тухайн тойрогт хэн гэдэг хүн нэр дэвшиж байгааг манай сайтын "Сонгууль 2024" хуудаснаас нэгдсэн байдлаар харах боломжтой.
-
Харин саналаа хаана очиж өгөхөө мэдэхгүй бол https://election.burtgel.gov.mn/ хаягт хандана. Нийслэлийн есөн дүүрэг, 21 аймагт нийт 2,198 санал авах байр ажиллана.
-
Хурууны хээ танигдахгүй бол иргэний үнэмлэх хэрэгтэй болох тул авч очно.
Саналын хуудас бөглөх заавар:
Танд нэг нь нам, эвслийн нэртэй, нөгөө нь нэр дэвшигчийн нэртэй хоёр ширхэг саналын хуудас өгнө.
-
Нэр дэвшигчийн нэртэй саналын хуудсыг бөглөхдөө мандатын тоотой тэнцүү нэр дэвшигчийн өмнөх зууван дугуйг дүүргэж будна. Тухайлбал 9 мандаттай тойрог байлаа гэхэд 9 нэр дэвшигчийг дугуйлна. Илүү эсвэл дутуу тэмдэглэвэл санал хүчингүй болно гэдгийг анхаарах хэрэгтэй.
-
Нам, эвслийн нэртэй саналын хуудаст та зөвхөн нэг нам, эвслийн өмнө зууван дугуйг дүүргэж будна.
Саналын нууцлалаа хадгалахын тулд хавтсанд хийж очоод төхөөрөмжид уншуулна. Санал өгсөн иргэний хуруун дээрээ бэхэн тэмдэглэгээ хийх юм байна.
Хориглох зүйлс
-
Санал авах байранд өөрийн болон бусдын тэмдэглэсэн саналын хуудасны зургийг авах, дүрс бичлэг, шууд дамжуулалт хийж болохгүй.
Монгол Улсын 2,238,360 иргэн энэ удаагийн сонгуульд санал өгөх бөгөөд 26-35 насныхан хамгийн олон буюу 536,079.
Санал өгөх иргэдийн насны ангилал:
-
18-25 насны 355,533
-
26-35 насны 536,079
-
36-45 насны 521,594
-
46-55 насны 390,942
-
56 ба түүнээс дээш насны 434,212 иргэн.
Сонгуульд ахмадууд идэвхтэй оролцдог гэдэг ч 18-45 насныхан буюу 1,413,206 иргэн нийт сонгогчдын 63.1%-ийг эзэлж байна. Тэгэхээр залуучууд өөрийнхөө болон гэр бүл, үр хүүхдийнхээ ирээдүйн төлөө сонголтоо хийх хариуцлагатай өдөр.
Сонгогчдын ирц 50%-д хүрээгүй бол тухайн тойрогт дахин сонгууль явуулах хуулийн зохицуулалттай билээ.
