АТГ-аас УИХ-ын гишүүн С.Ганбаатарын зусланд нэгжлэг хийжээ. Тэрбээр энэ талаар, “Надад хийсэн хэрэг байхгүй. Ерөнхийлөгч У.Хүрэлсүхийг “Дарангуйлагч боллоо, чи боль оо. Монголын хууль хяналтынхныг Энканто саунаас удирдах аа зогсоо” гэж би хэлсэн нь үнэн” хэмээн лайваар хэлсэн.
Мөн өнөөдөр түүний туслахыг баривчилжээ. УИХ дахь Ардчилсан намын гишүүд энэ үйл явдлыг эсэргүүцэн, Төрийн ордонд хэвлэлийн хурал хийв.
УИХ дахь АН-ын бүлгийн дарга О.Цогтгэрэл: Зөрүүтэй байр суурь илэрхийллээ гэж хуулийн байгууллагаар айлгадаг, дарамталдаг. Энэ байдал манай улсын сүүлийн 35 жилийн түүхэд улам төгөлдөржиж байна. Ардчилал гажуудаж байгааг та бүхэн мэднэ. Үүний нэг жишээ өнөөдөр үргэлжиллээ.
Үгээ хэлсэн иргэд, УИХ-ын гишүүнд ийм зүйл тохиолдох ёсгүй. Хуулийн байгууллагынхан гарч ирээд яагаад гишүүний зусланд нэгжлэг хийсэн, туслахыг нь баривчилсан үндэслэлээ хэлэх байх. Гэхдээ үүний цаана улс төр байгаад бид огтхон ч эргэлзэхгүй байна. Учир нь С.Ганбаатар гишүүн 2027 оны Ерөнхийлөгчийн сонгуульд нэрээ дэвшүүлнэ гэдгээ мэдэгдсэн юм.
Өмнө нь манай намын Н.Алтанхуяг гишүүний эсрэг мөн адил үйл ажиллагаа явуулсан. Ер нь манай намын 50-иас дээш настай гишүүдийг илт онилох боллоо. С.Ганбаатар гишүүн ураны төслийг эсэргүүцсэн юм.
Энэ бол зөвхөн нэг гишүүний асуудал биш. Монголын парламентат ёс, парламентын дархлаанд сөрөг нөлөөтэй. Манай бүлэг өнөөдөр ээлжит бусаар хуралдан, парламентаа хамгаалах ёстой гэж үзлээ. Иймд улс төрийн мэдэгдэл гаргаж байна.
УИХ-ын гишүүн Х.Тэмүүжин: Нэг даргад маш их эрх мэдэл төвлөрч, хуулийн байгууллагуудыг тэр дарга хувийн ашиг сонирхолдоо ашиглаж болохгүй. Төрийн нөөцийг хувийн эрх ашгийн төлөө ажиллуулж болохгүй гэв.
УИХ-ын гишүүн С.Ганибал: Асуудал их ярвигтай болж байна. Магадгүй, 2027 оны Ерөнхийлөгчийн сонгууль ийм эрт эхэлж, АН-ын нэр дэвшигчдийн боломжийг боомилж байна. Ийм үйлдэл харагдаж байна. С.Ганбаатар гишүүн Ерөнхийлөгчийг дахин зургаан жилээр сунгаж томилохгүй, Үндсэн хуульд нээлт өөрчлөлт хийхгүй гэж хатуу байр сууриа илэрхийлсэн. Мөн газрын тосны үйлдвэр ашиглалтад орохгүй байгаад анхаараач гэсэн юм.
Гэтэл С.Ганбаатар гишүүний эргэн тойрны хүмүүсийг шалгаж, хорилоо. Монгол Улсад ардчиллыг нухчин дарах гэсэн үйлдэл гаргалаа. Иймээс бид албан ёсоор мэдэгдэл гаргалаа.
