БНАСАУ-ын Хөдөлмөрийн намын хорооны дарга, Төрийн зөвлөлийн дарга Ким Чен Ын өчигдөр буюу энэ сарын 19-нд Хятад улсад айлчилж, Хятадын Коммунист Намын Төв хорооны Ерөнхий нарийн бичгийн дарга, БНХАУ-ын дарга Ши Жиньпинтэй хэлэлцээ хийлээ. Хоёр орны удирдагчид хоёр улсын харилцааны хөгжил, Солонгосын хойгийн байдлаар санал солилцож, БНХАУ, БНАСАУ-ын харилцааг цаашид баталгаажуулан хөгжүүлж, Солонгосын хойгийн энх тайван, хөгжлийн эерэг хандлагыг ахиулж, дэлхийн болон бүс нутгийн энх тайван, тогтвортой байдал, хөгжил дэвшилд идэвхтэй хувь нэмэр оруулна гэдгээ санал нэгтэй илэрхийлсэн байна.
Ши Жиньпин энэ үеэр хэлэхдээ “Сингапурт ерөнхийлөгч Д.Трамптай Та чухал уулзалт хийж, Солонгосын хойгийг цөмийн зэвсэггүй болгох, хойгт энх тайвны механизм байгуулах талаар зарчмын нийтлэг ойлголтод хүрч, идэвхтэй ахиц гаргасныг Хятад улс болон миний бие маш их үнэлж байна” гэлээ.
Тэрээр цааш хэлсэн үгэндээ “Гурван сар хүрэхгүй хугацаанд миний бие тантай гурван удаа уулзаж, хоёр нам, хоёр орны харилцааны хөгжлийн зүг чигийг зааж, харилцааны хөгжлийн шинэ хуудсыг нээлээ. Хятадын нам, Засгийн газар БНХАУ, БНАСАУ-ын найрсаг хамтын ажиллагааны харилцааг дээд хэмжээгээр чухалчилдаг. Олон улсын болон бүс нутгийн байдал хэрхэн өөрчлөгдсөн ч Хятадын нам, засгийн газрын байр суурь, хоёр улсын ард түмний найрсаг харилцаа, БНХАУ-ын социалист БНАСАУ-д үзүүлэх тус дэмжлэг өөрчлөгдөхгүй. Миний бие Хөдөлмөрийн намын хорооны дарга тантай хамт хоёр талын тохиролцсон чухал, нийтлэг ойлголтыг хэрэгжүүлж, хоёр орны харилцааг урт хугацаанд тогтвортой хөгжүүлэн, ард түмэнд үр шимийг нь хүртээхэд бэлэн байна… БНАСАУ-ын эдийн засгийн хөгжил, иргэдийн амьжиргааг сайжруулах, өөрийн орны онцлогт тохирсон хөгжлийн замаар замнахыг бид дэмжинэ” гэсэн юм.
Харин Ким Чен Ын хэлсэн үгэндээ “Саяхан болсон БНАСАУ, АНУ-ын удирдагчдын уулзалт талуудын ашиг сонирхол, олон улсын хамтын нийгэмлэгийн хүлээлтэд нийцсэн үр дүнтэй уулзалт болсон юм. Төрийн тэргүүн нарын хүрсэн нийтлэг ойлголтыг хоёр тал сайтар хэрэгжүүлбэл Солонгосын хойгийг цөмийн зэвсэггүй болгох шинэ нөхцөл бүрдэх болно. БНАСАУ-ын тал Солонгосын хойгийг цөмийн зэвсэггүй болгох, тус хойгийн энх тайван, тогтвортой байдлыг хамгаалахад гаргасан Хятад улсын хүчин чармайлтыг өндрөөр үнэлж, Хятад болон холбогдох талуудтай хамт хойгийн үүрдийн энх тайван, тогтвортой байдлын систем байгуулж, Солонгосын хойгийн энх тайвны төлөө хамтдаа хүчин зүтгэхийг хүсч байна” гэлээ.
