Гавъяат хуульч, шүүгч асан Б нь ШШГЕГ-ын харьяа 461-р хорих ангид нас барсан хэрэг нийгмийн анхаарлыг татаж байна. Хууль хяналтын зарим байгууллагаас түүнийг амиа хорлосон байж болзошгүй гэх мэдээлэл өгч байгаа хэдий ч гадны нөлөөтэй нас барсан гэдэг сэжиг ч олны дунд нэлээд явж байна.
Өнгөрөгч долоо хоногийн лхагва гарагт талийгаач “Ажил явдал гарсан. Хөдөө явах ажилтай боллоо” гэдгээ хүүхдүүддээ хэлж байжээ. Пүрэв гарагт бэр нь хадам ээж рүүгээ залгахад утсаа авахгүй байсан тул ярьж байсанчлан түүнийг хөдөө явжээ гэж бодсон гэнэ.
Орой нь 18:30 цагийн үед талийгаачийн гэрт АТГ-ын хүмүүс ирж нэгжлэг хийсэн тухай ааваасаа бэр нь сонссон байна. Энэ талаар ээждээ дуулгах гэсэн боловч бас л утсаа аваагүй аж.
АТГ-ынхан ээжийг нь авч явсныг талийгаачийн ажлын газрынхан хүүхдүүдэд нь дуулгажээ. Ингээд талийгаачийн гэрийнхэн АТГ дээр очиход байцаагч нь дулаан хувцсыг нь захьсан юм байна. Баасан гарагийн өглөө талийгаачийн ар гэрийнхэн байцаагчтай нь холбогдох гэсэн боловч утас нь холбогдохгүй байсан гэнэ. Ингээд байцаагчийг нь хайсаар тухайн өдрийн ажлын цаг ч дуусчээ. Бямба гараг амралтын өдөр учраас хорих ангид хүн оруулдаггүй гээд мөн л уулзаж чадаагүй байна.
Харин талийгаачтай ажлын газрынх нь хүн уулзахад “маргааш орой ирвэл ирэхгүй юу, энд хүлээгээд яах вэ” гэж хэлсэн байна. Тэрээр амралтын өдөр таарсан учраас 48 цагийн хугацааг сунгах боломжгүй тул өөрийгөө суллагдана гэдгээ ч мэдэж байсан бололтой.
Гэвч суллагдах хугацаа нь болсон ч суллаагүй бөгөөд талийгаачийн ажлынх нь газрын хүн илүү том асуудал үүссэн гэсэн мэдээллийг утсаар авчээ. Ийнхүү шөнийн 2 цагт бэр нь тоон мэдээлэл өгдөг гэх хүнтэй холбогдоход “даргатайгаа яриулъя” гээд утсыг тасалсан байна.
Тухайн үед хорих ангийн дарга, хянагч нар нь утсаа нэг нэгэндээ дамжуулж сандралдаж байсаар шөнийн 4 цагийн үед талийгаачийн нэг хүүхэд нь хорих анги руу орж, ээжийгээ 21:40 цагийн үед нас барсан гэдгийг мэджээ. 15:00 цагийн бүртгэлийн үед ээж нь зүгээр байсан аж.
Талийгаачийг нас барсанаас хойш хоёр цаг хагасын дараа цагдаагийн байгууллагад дуудлага өгчээ. Гэрийнхнээс нь нууцалж байгаад үүрийн 4 цагт буюу долоон цагийн дараа хэлсэн байгаа юм. Энэ хооронд талийгаачийн нэг хүү нь ээжийгээ асуухаар АТГ руу явсан байж.
Ингээд талийгаачийг ар гэрийнхэнд нь харуулалгүй цогцос хадгалах газар руу авч явсан байна. Харин хоёр хүүхэд нь Шүүхийн шинжилгээний үндэсний хүрээлэнд хүчээр орж ээжийгээ харж, зургийг нь авч амжжээ. Гэтэл цагдаагийн алба хаагчид зургийг нь устгахыг завдсан ч хүүхэд нь зугтсан гэж талийгаачийн бэр Р.Мөнхзул хэвлэлд өгсөн ярилцлагадаа дурдсан байна.
Мөн тэрээр “Ээжийг амиа алдахаас гурван цагийн өмнө гадуур байцаасан юм билээ. Тэр хооронд ээжийг дарамталсан, эсвэл хоолонд нь юм хольсон байх гэж би хардаж байна. Миний ээж яавч амиа хорлох хүн биш ээ” гэжээ.
Эндээс “Талийгаачтай хамгийн сүүлд хэн уулзсан бэ. Үүнийг ШШГЕГ яагаад нууцлах болов. Маргааш өглөө болоход л суллагдах ёстой гэдгээ мэдэж байсан хуульч хүн яагаад өөрийнхөө амийг хорлоход хүрэв. Мөн талийгаачийг яагаад камерын тусгал муу өрөөнд хорив. Амиа егүүтгэх оролдлого хийж байх явцад шоронгийн хянагч юу хийж байсан бэ” гэх мэт олон асуулт урган гарч ирж байна. Энэ асуултуудад хэн хариулт өгөх вэ?
