“COVID-19”-ийн вакцины тухай БШУ-ы доктор, профессор, МАУ-ны академийн гишүүн Ж.Оюунбилэг ЭМЯ-ны албан ёсны цахим хуудсаар мэдээлэл өглөө.
Тэрбээр мэдээллийн эхэнд, “Аливаа халдварт өвчний хувьд, тухайн хүн амын 70-75 хувьд дархлаа тогтвол халдварт өвчний дэгдэлт зогсоно гэж үздэг. Дархлал тогтоох арга нь вакцинжуулалт юм. “COVID-19” халдварын үед шинжлэх ухаан технологийн хөгжлийн үр дүнд олон төрлийн вакцин гарч хэрэглэхэд бэлэн болжээ” хэмээн тодотгоод хэрэглэж эхлээд буй вакцинуудыг танилцуулсан юм.
Нэгдүгээрт, Модерна вакцинд 15 000, Файзер вакцинд 45 500 хүн хамруулж туршилт хийсний үндсэн дээр хэрэглэхэд бэлэн болжээ.
Хоёрдугаарт, Векторийн вакцины судалгааг олон улсад хийж байна. Үүний гуравдугаар шатны туршилтад 30-40 мянган хүн хамрагдаж, аюулгүй байдлыг тогтоон, дархлалын үзүүлэлтийг төрөл зүйлээр нь ялган тогтоосон байна.
Гуравдугаарт, идэвхгүйжүүлсэн вакцины технологийг өмнө нь олон төрлийн халдварт өвчний эсрэг ашиглан үйлдвэрлэл явуулж байсан. Манай улсад галзуугийн халдвараас эмчлэн сэргийлэх вакциныг хийж байсан.
Дөрөвдүгээрт, уурагт суурилсан вакцины судалгааг өндөр хөгжилтэй орнуудад хийж байна. Үүний гол төлөөлөгч нь новавакс уургийн дэд бүрдлийн вакцин гаргах эцсийн шатандаа явж байна.
“Эдгээр вакцины аюулгүй байдлыг эмнэл зүйн 1,2,3 дугаар шатанд судлан тогтоосон. Манай улсын Эмийн тухай хуульд зааснаар, “Аливаа эмийн бэлдмэлийн аюулгүй байдлыг үндэсний хяналтын лаборатори судлан тогтоох ёстой. Зөвхөн лабораторийн шинжилгээ хийсэн эмийг бүртгэнэ” гэж заасан байдаг.
Харамсалтай нь, 1976 онд Нийгмийн эрүүл мэндийн үндэсний төвд анх байгуулсан биобэлдмэлийг шалгах улсын хяналтын лаборатори Мэргэжлийн хяналтын байгууллагыг дагаж 1996 онд очсоноос хойш ажиллахгүй болсон. Манай Нийгмийн Эрүүл мэндийн үндэсний төвөөс уг лабораторийг сэргээн байгуулах, шинжилгээг эрүүл мэндийн салбарт ажиллаж байгаа мэргэжлийн хүмүүс хийхэд бэлэн байна” хэмээн тэрбээр энэ үеэр онцлов.
Мөн тэрбээр, “Аливаа вакцины үр дүнд аюулгүй байдал, ариун чанарыг судлан тогтоодог хамгийн гол үзүүлэлт бол дархлалын үзүүлэлтийг тогтоож шаардлага хангах эсэхийг үнэлдэг арга зүй байдаг. Эдгээр вакцины найрлага болон дээр дурдсан үзүүлэлтийг олон улсын болон үндэснийх нь хяналтын байгууллагууд судлан хангалттай болохыг судлан тогтоосон байна. Аливаа вакцинд дархлал үүсгэгч уургаас гадна түүнийг хадгалах, тогтворжуулагч бодис, зарим төрлийн фосфатын болон калийн давс нэмдэг арга зүй байдаг. Энэ бүхний үр дүнд урд нь хэрэглэж байгаагүй, шинжлэх ухаан технологийн хөгжлийн үр дүнд бий болсон, РНХ-д суурилсан вакциныг хэрэглэх бололцоо бүрдлээ. Мөн вакцины үйлдвэрлэлд олон жил хэрэглэсэн, вакцины судалгаа үйлдвэрлэлийг үндэслэсэн Францын их эрдэмтний 100 гаруй жилийн өмнө гаргасан идэвхгүйжүүлсэн вакцин, мөн манай улсад одоо өргөн хэрэглэж байгаа В гепатитаас сэргийлэх уурагт суурилсан вакцин зэрэг дөрвөн төрлийн вакциныг манай улсын хүн ам хэрэглэхэд бэлэн болоод байна.
Өвчлөл их байгаа АНУ, Бразил, Энэтхэг, ОХУ, Их Британи зэрэг улс вакцинд олон сая хүнийг хамруулаад байна. Мөн БНСУ, БНХАУ дархлаажуулалт хийж байна. Үүний үр дүнд дэлхий дахинд нийт халдварын тохиолдол 15 хувиар буурсан. Энэ оны нэгдүгээр сарын 18-нд хүн амаа дархлаажуулалтад өргөнөөр хамруулсан ОХУ-д хоногт гарч буй тохиолдлын тоо 50 гаруй хувиар буураад байна. Иймд бид цаашид хэрэглэхэд бэлэн болсон эдгээр дөрвөн төрлийн вакциныг хэрэглэж өвчлөлийг хяналтад авахад тус төхөм болно. Чанар аюулгүй байдал нь олон улсын болоод үндэсний хяналтын байгууллагаар хянаж баталгаажсан эдгээр вакциныг тариулж энэхүү аюулт өвчнийг ялахад хувь нэмэр оруулахыг уриалж байна.
Монгол Улс дэлхий дахинд бүрмөсөн устгахаас 40 жилийн өмнө цагаан цэцэг гэдэг аюулт өвчнийг устгасан. Мөн халдварт саа өвчнийг 20 жилийн өмнө устгасан. Цагаан цэцэг, халдварт саа өвчнийг ялсан шиг коронавирусийг ч гэсэн бид ялж чадна” гэв.
