‘Рио 2016’ олимпын наадмын боксын тэмцээнд шүүгч нар авлигал авч, тулаанд хэн ялахыг урьдчилан шийдэж, медалийн хүснэгтэд нөлөөлсөн гэх баримтууд ил боллоо.
Тухайлбал, Ирландын боксчин Майкл Конлан Рио 2016 олимпын наадмын хөнгөн жингийн шөвгийн наймын тулаанд ОХУ-ын тамирчин Владимир Никитинд маргаантай байдлаар ялагдсан. Тухайн үед Ирландын тамирчин дэвжээн дээр эсэргүүцэл илэрхийлж, Олон улсын боксын холбооны дотоод асуудал болон шүүгчдийн булхайг хурцаар шүүмжилж байв.
Тэгвэл Канадын хуульч Ричард Макларен тэргүүтэй хуулийн баг ‘Рио 2016’ олимпын наадмын боксын тэмцээний луйвар, шүүгч нарын авлигын хэрэгт хараат бус мөрдөн шалгах ажиллагаа явуулж, пүрэв гаригт дүгнэлтээ танилцуулсан байна. Ричард Макларены мэдээлснээр луйврын схемийн хүрээнд шүүгч авлига авч, ялагчийг урьдчилан шийдсэн байж болзошгүй 11 тулааныг судалж байгаа аж.
Үүнд, Монгол Улсын гавьяат тамирчин, “Рио 2016” олимпын наадмын боксын дээд хөнгөн жингийн хүрэл медальт Д.Отгондалай хагас шигшээд Францын тамирчин Софиан Оумихад маргаантай байдлаар ялагдсан тулаан багтжээ.
Ричард Макларены хэлснээр Францын тамирчныг ялуулахын тулд шүүгч нарт 250 мянган ам.долларын хахууль санал болгосон байна. Хэдий шүүгчид хахууль авсан гэх баримт одоогоор тогтоогоогүй ч МУГТ Д.Отгондалай Францын тамирчныг илүүрхсэн хэрнэ “0:3” харьцаатай ялагдал хүлээсэн нь анхаарал татаж байгаа аж.
Түүнчлэн 152 хуудас бүхий хараат бус мөрдөн шалгах ажиллагааны тайланд дурдсанаар “Рио 2016” олимпын наадмын өмнө Олон улсын боксын холбооны шүүгчдийн дунд эрэмбээр айлган сүрдүүлэх, дуулгавартай байх соёл байжээ. Улмаар шүүгч нар дарамт шахалтад орох, эсвэл үгсэн хуйвалдах замаар тоглолтыг засаж, медалийн хүснэгтэд нөлөөлсөн байна. Мөн шударга шүүгчдийг гадуурхах, хуйвалдаанаар үр дүн нь шийдэгдсэн тоглолтын шүүлтийг шүүмжлэхэд бурууг өөрт нь тохох зэрэг үйл явдлууд болсон талаар нэрээ нууцалсан шүүгч нар мэдүүлжээ.
Олимпын боксын шүүлттэй холбоотой асуудал зөвхөн “Рио 2016” олимпын наадмаар зогсохгүй “Лондон 2012” олимпын наадмын үеэр ч шүүгч нар үгсэн хуйвалдах замаар тоглолтыг зассан талаарх баримтуудыг хараат бус мөрдөн шалгах ажиллагааны тайланд дурдсан байна. Тухайлбал, Туркийн Боксын холбоо “Лондон 2012” олимпын наадмын боксын тэмцээнийг зохион байгуулахад хэдэн сая ам.доллар зарцуулсан бөгөөд Туркийн Боксын холбооны Ерөнхийлөгч санхүүжилтийнхээ хариуд тамирчдад нь олимпын наадамд өрсөлдөх эрх олгохыг хүсэж байжээ.
Олон улсын боксын холбоо пүрэв гаригт харуут бус мөрдөн шалгах ажиллагааны тайлантай холбоотой албан ёсны мэдэгдэл хийсэн байна. Мэдэгдэлд “Ричард Макларены хараат бус мөрдөн шалгах ажиллагааны явцад “Рио 2016” олимпын наадмын боксын тэмцээний үр дүнг засаж, медалийн хүснэгтэд нөлөөлсөн системийг илрүүлжээ. Боксчид шударга тулаан хийж, шударгаар амжилтаа үнэлүүлэх эрхтэй. Олон улсын боксын холбоо цаашид үнэнийг илрүүлж, асуудлыг залруулах болно. Ирээдүйд шударга өрсөлдөөнийг хангахын тулд өнгөрсөн хугацаанд үүссэн шударга бус явдлыг залруулахад шаардлагатай бүх арга хэмжээг авна” гэсэн байна.
Эх сурвалж: The Telegraph, The Guardian
