Шадар сайд С.Амарсайхан “Бүсчилсэн хөгжлийн талаар хэлэлцэж, хоёр шийдвэр гаргалаа. Өргөтгөсөн худалдаанд 21 аймгийн ИТХ-ын дарга, аймаг, нийслэлийн засаг дарга нар оролцсон.
Улс орны нийгэм, эдийн засгийн өсөлт хөгжлийн тэнцвэртэйгээр хөгжүүлэх, ялангуяа, бүс нутгийн нөөц боломжид тулгуурласан бодлогыг эрчимжүүлэх асуудлаар өнөөдөр хэлэлцлээ.
Нэгдүгээрт, Бүсийн хөгжлийн бодлогыг аймаг, орон нутгийн түвшинд гардаж, хэрэгжүүлж, хариуцах Бүсийн хөгжлийн бодлогын зөвлөлийг байгуулах шийдвэр гаргалаа. Мөн зөвлөлийг ажиллуулах журмыг баталлаа.
Зөвлөл бол орон нутгийн иргэд, ААН-үүдийн оролцоог хангах, бүсчилсэн хөгжлийн бодлогыг бодитойгоор богино хугацаанд хэрэгжүүлэх, гүйцэтгэлийг хангуулахтай холбоотой өдөр тутмын үйл ажиллагааг хариуцаж ажиллах бүтэц байх юм.
Энэ хүрээнд аймгуудын засаг дарга, ИТХ-ын дарга, ААН-ийн эрхлэгчид, худалдаа аж үйлдвэрийн танхим, эрдэм шинжилгээ, төрийн бус байгууллага, олон улсын байгууллагуудтай хамтарсан байхаар бүсийн зөвлөлийг албан ёсоор үйл ажиллагааг нь эхлүүлэх Засгийн газрын тогтоол гарлаа.
Хоёрдугаарт, энэ хоёрдугаар улиралд багтааж, хангайн болон, баруун, зүүн, төвийн, хойд, мөн Улаанбаатарын бүсүүдэд, бүсчилсэн хөгжлийн бодлогын хэрэгжилтийг хангуулах хуралдааныг зохион байгуулахаар шийдвэрлэлээ.
Монгол Улсын Ерөнхий сайд, Засгийн газрын гишүүд бүх бүсүүдэд очиж, бүсийн удирдлага, аймаг, орон нутгийн иргэд, ААН-үүд, хөрөнгө оруулагч нартай хамтарсан стратегийн түншлэлийн, ялангуяа “Бүс бүрд хөгжил, Хүн бүрд боломж”, орон нутгийн хөгжлийг илүү эрчимжүүлэх бодлогын хүрээнд ирэх хоёрдугаар сараас эхлэн зохион байгуулалттай ажиллана.
Мэдээж, орон нутгийн онцлог, нөөц боломжид нийцсэн бүсчилсэн хөгжлийн төлөвлөгөөг нарийвчлан гаргана.
Бүсчилсэн хөгжлийн удирдлага, зохион байгуулалтын тухай хуулийг хэрэгжүүлэхэд анхаарал татсан, тулгамдсан асуудлууд дээр өөрчлөлт, шинэчлэлт хийх зайлшгүй шаардлагатай.
Мөн орон нутгийн суурь дэд бүтцийн хөгжилд онцгой анхаарч, иргэдийн амьдрах орчин, хөдөлмөр эрхлэлтийг нэмэгдүүлэх хүрээнд, 21 аймгийн 330 сумыг бүсчилсэн байдлаар зохион байгуулсан, Хөгжлийн 93 хөдөлгүүр төвийг барьж байгуулна.
Хөдөлгүүр төвүүдэд, эдийн засгийн тусгай бүс, чөлөөт бүс, үйлдвэр технологийн паркууд үйл ажиллагаа явуулж, төр хувийн хэвшлийн хамтын ажиллагааг өргөжүүлэх боломж бүрдэнэ.
Хувийн хэвшлийн хөрөнгө оруулалтыг татах, орон нутагт хөдөлмөр эрхлэлт, ажлын байрыг бий болгохоос гадна, нийгмийн үйлчилгээнүүд болох эрүүл мэнд, боловсролын дэд бүтэц, үйлчилгээ, чанарыг сайжруулах асуудлууд байгаа юм.
Энэ хүрээнд “Бүсчилсэн хөгжлийн стандарттай шийдэл” гэдэг том хөтөлбөр хэрэгжиж эхэлж буй.
Стандартын нэгдсэн шаардлагыг аймаг орон нутгийн түвшинд хэрэгжүүлэх, хяналт тавих үүрэг бүхий зохион байгуулалтыг үндэсний хороо Шадар сайдын удирдлага дор зохион байгуулна.
Товчоор, Бүсчилсэн хөгжил бол зөвхөн нэг аймаг, орон нутгийн асуудал биш. Энэ бол улсын хэмжээнд, ялангуяа улсын хөгжлийн тэнцвэртэй байдлыг хангах урт хугацааны стратеги, бодлого учраас салбар дундын уялдааг хангах, ажлын хариуцлагыг дээшлүүлэх, шийдвэрүүдийн биелэлтийг хангана. Хэрэгжилтийн явцыг тухай бүрд Засгийн газарт тайлагнах зохион байгуулалтын ажлыг өнөөдөр хэлэлцлээ” гэв.
