Хүүхдийг эмнэлзүйн туршилт болгож байна гэсэн асуудлаар “Монголын эцэг эхчүүдийн үндэсний зөвлөл“-өөс өчигдөр мэдээлэл хийсэн. Тэдний хэлж буйгаар зөвшөөрлийг Эрүүл мэндийн яам олгосон гэх боловч тус яамнаас энэ асуудалд хамааралгүй хэмээн мэдэгдсэн. Тэгвэл үүнтэй холбоотойгоор “Монголын Эрүүл мэндийн үүсгэл” НҮТББ-аас мэдэгдэл хийлээ.
Тус байгууллагын зүгээс Сүрьеэгийн далд халдвараас урьдчилан сэргийлэхэд Д аминдэмийн нөлөө судалгааг ЭМЯ-ны Ёс зүйн хороо, АШУҮИС-ийн Эрдмийн зөвлөл, Харвардын их сургуулийн Ёс зүйн хорооны албан ёсны зөвшөөрөлтэйгээр хийж байгаа гэдгээ мэдэгдэж байна. Ингэхдээ судалгааны протокол, арга аргачлал нь маш өндөр шалгуураар хянагдаж, олон улсын стандарт, судалгааны ёс зүйн дагуу асран хамгаалагч нар болон хүүхдүүдэд судалгааг танилцуулж албан ёсоор зөвшөөрөл, гарын үсгийг нь авч сайн дурын үндсэн дээр судалгаа хийж байгаа гэлээ.
Д аминдэмийн тухайд гэвэл, тэд судалгаандаа Tishcon корпорацийн GMP стандартыг хангаж АНУ-д үйлдвэрлэсэн өндөр чанартай аминдэмийг хэрэглэж байгаа ба уг аминдэмийг манай МХЕГ-ын лабораторид шинжилж баталгаа гаргасан гэв. Д аминдэм нь дархлааг дэмждэг бөгөөд амьсгалын замын хурц халдварт өвчин болон сүрьеэгээс урьдчилан сэргийлдэг гэсэн тайлбарыг тус байгууллагаас өгч байна. Энэ нь эдийн засгийн болоод эрүүл мэндийн чухал ач холбогдолтой гэдгийг онцоллоо. Тэд үүнийг судалгааны үр дүнгээр баталгаажуулсан гэдгээ дурьдав.
“Монголын Эрүүл мэндийн үүсгэл” НҮТББ-ын мэдэгдэж байгаагаар уг судалгааг ЭМЯ, БСШУСЯ, ХӨСҮТ-ийн Сүрьеэгийн тандалд судалгааны алба, АШУҮИС болон Харвардын Анагаахын сургуулийн эрдэмтэн судлаачдын тусламжтайгаар хийж байгаа гэлээ. Тэгэхээр ЭМЯ-наас уг асуудалд яам хамаагүй гэсэн бол эцэг эхчүүдийн зөвлөл яамд болон Эрүүл мэндий сайдыг хүртэл дурьдаж байсан юм. Тэгвэл одоо “Монголын Эрүүл мэндийн үүсгэл”-ээс тус яамны Ёс зүйн хороо болон дээр дурдсан албаныхан холбоотой ажиллаж байгаа гэдгийг мэдэгдлээ.
