Дөрвөн настай бага охин минь ээжтэйгээ цэцэрлэгээсээ ирэхдээ “Ааваа танд зураг” зурсан гэсээр орж ирлээ. Хөөрхөн юм (надад л тэр шүү дээ).
Том, жижиг гурван хүн инээлдэн хөтөлцөн алхана. Цаана нь нар, солонго зурсан байлаа.
Охин минь зургаа тайлбарлана: Нэг инээсэн ногоон хүн нь би юм байх аа. Энэ нь нар, энэ нь солонго гээд л…
-Аав аа солонго бороо орсны дараа гардаг. Тийм ээ?
-Тийм ээ миний охин… Охин минь хэсэг бодсоноо
-Аав аа солонго яагаад өвөл байдаггүй юм бэ? гэв
-Зөвхөн зун л бороо орсны дараа л солонго гардаг юм гэж тайлбарлав. Бүтэн тайлбарлахад нас нь арай л бага санагдлаа.
Миний охин ирэх жил сургуульд орно. Багш нь чамд яагаад зун солонго гардгийг хэлж өгнө … гэснээр яриа өндөрлөв. Гэтэл хэд хоногийн өмнө хэт шашинжсэн нэгэн надаас “Яг яагаад солонго гардаг болсныг мэдэх үү” гэж их л нууцыг олсон хүний өнгөтөй асууж байсан нь санаанд оров. Тэрээр бас ч үгүй дээд боловсролын диплом өвөрлөсөн хүн байж билээ.
Би түүнээс “Яагаад” гэж асуухад.
Тэрээр “Бурхан 6000 жилийн өмнө их үер болгосныхоо баталгаа болгож солонго бүтээсэн” гэж хариулдаг юм байна. Би түүнээс “6000 жилээс өмнө солонго гардаггүй байжээ” гэж лавлахад “Тийм, тийм” гэж их л итгэлтэй хариулж билээ.”Харин солонго чухам яаж гардаг юм бол” гэсэн миний асуултанд “Бурхан бүтээсэн” гэж билээ. Сонин юм шүү дунд сургууль дараа нь дээд сургууль төгссөн хүний амнаас ийм үг гарах гэж.
Би тэрхүү “шашины ном”-ыг сонирхон уншив. Түүнд бичсэнээр:
1-р хэсэг
“Их үер” гэж бүлэгт.
Бурхан Ноа (еврэй нэр) гэж хүндээр ирж “одоогоос долоо хоногийн дараа би дөчин өдөр, дөчин шөнийн турш бороо оруулж, өөрийнхөө бүтээсэн амьтай бүхнийг газрын хөрснөөс арчина. Ганц танай гэр бүлийг аварна. Чи том завь бүтээ” гэжээ. Ноа бурхны тушаасан ёсоор завь бүтээжээ. Ноагийн хөвгүүд, эхнэр, бэрүүд хамт үерийн усны улмаас хөвөгч завинд, бүх амьтан жигүүртнээс нэг нэг хосыг завиндаа оруулжээ. Ингээд бурхан хүн төрөлхтнөөс авахуулаад араатан амьтан, газраар мөлхөгч, тэнгэр огторгуйн жигүүртэн шувуудыг хүртэл газар дээрх хамаг амьтныг арчин зайлуулсан байна.(алсан л гэсэн үг). Гагцхүү Ноа болон түүнтэй хамт завинд байгсад л үлджээ… гэж бичсэн байх аж.
Сонин юм шүү хэрэв ийм зүйл болсон гэж бодоход дэлхийн бүх хүн ардыг үр хүүхэд нялх балчир, хөхүүл хүүхэд, хөл хүнд, жирэмсэн гэлгүй алсан болж таарна аа даа. Бүр амьтан ургамлын үр зулзагыг ч үлдээлгүй алж устгасан болж таарна. Тийм алуурчинг бурхан гэж бодоод мөргөж суудаг хүмүүсийн МОНГОЛ ЁС СУРТАХУУН хаачсан байж таарах бэ? Ийм алуурчныг бурхан гэж шүтдэг тэр хүмүүсийн сэтгэл ЭНЭРЭНГҮЙ НИГҮҮЛСЭН байж чадах уу?
Уг номонд Солонго гардаг болсон талаар цааш нь.
9-р бүлэг
“Би өөрийнхөө гэрээг та нартай болон та нарын үр хүүхэд… Бас та нартай хамт байсан бүх амьтан, жигүүртэн шувууд, мал адгуус, газрын бүх амьтан, хөвөгч завинаас гарсан бүхэнтэй буюу дэлхий дээрх бүх араатан амьтантай гэрээ байгуулна” гэжээ.
Тэр гэрээ гэдэг нь солонго юм байх аа. Тухайн номонд ингэж л тодорхойлсон байна.
Харин Монгол улсын боловсролын яамнаас зөвшөөрөгдсөн 6-р ангийн физикийн хичээлийн сурах бичигт:
Солонго гэж агаар их чийгтэй үед тохиолдох байгалийн үзэгдэл. Та бүхэн усан оргилуурын дэргэд зогсоход дээш цацагдаж байгаа усан дуслууд дээр нарны гэрэл тусахад солонгорч харагддагийг санаж байгаа байх. Тэр бол нарны гэрэл усны дусал дээр тусаж хугаран нарны шар гэрэл задарч олон өнгөд хуваагдан харагдаж байгаа хэрэг юм. Тэгэхээр гол ус ууршилт явагдан үүл болон хуримтлагдаж бороо болон орсны дараа агаар мандалд ихээр хуримтлагдсан чийгийг нарны цацраг нэвтлэн гарах үедээ хугарч улаан, улбар шар, шар, ногоон, цэнхэр, хөх, нил ягаан өнгө болон газар дээрээс харахад нум хэлбэрийн солонго болон харагдана. Харин онгоцноос цагираг хэлбэрээр харагддаг байна.
Энэ бол дунд сургуулийн 6-р ангийн сургалтын программд байгаа зүйл юм. Энэ хоёр зөрүүтэй мэдлэгийг одоо бодъё.
-6000 жилийн өмнө бурхан солонго бүтээжээ
-Бурхан гээч нь 40 өдөр ,40 шөнө бороо оруулж цэвэрлэгээ хийжээ.
40 өдөр, 40 шөнө гэж буй тул нар байсан байх нь. Бороо оруулж үер буулгана гэхийг бодоход ус байсан байна. Нар байгаад ус байвал ууршилт явагдана. Ууршсан агаар бороо хур болж эргэж бууна. Тэгвэл агаар чийгшинэ. Агаар чийгшилтэй бол нарны гэрэл хугарч л тусна. Тэгэхээр 6000 жилээс өмнө ч дэлхий дээр солонго татдаг байсан болж таарна. Дэлхий ертөнц үүссэн, ус бий болсон 4 тэрбум жилийн тэртээгээс солонго бий болсон байж таарна.
-Физикийн шинжлэх ухааны онол, туршилтаар батлагдан дэлхийн шинжлэх ухаанд зөвшөөрөгдөн соёлт хүн төрөлхтөний боловсролын программд тусгагдсан мэдлэг юм. Монгол хүн бүр Монгол Улсын иргэнийхээ үүргийг биелүүлж шинжлэх ухааны суурь боловсрол заавал эзэмших үүрэгтэй гэдгээ сана…
Нийтлэлийг бичсэн: Модун Хүннү
