Гаднах тохижилтыг нь сайжруулж, хүүхдэд ээлтэй орчин бүрдүүлэх шаардлагатай сургууль, цэцэрлэг Улаанбаатар хотод цөөнгүй бий. Нийслэлийн Боловсролын газрын дарга Ж.Гантулгын хэлж буйгаар судалгаа гаргаж, жилд 10-20 сургуулийн гадна орчны тохижилтыг сайжруулж байгаа юм. Үүнд нийслэлийн төсвөөс 800-900 сая төгрөгийн хөрөнгө зарцуулдаг ажээ.
Орчных нь тохижилтыг нэн даруй сайжруулах шаардлагатай, Чингэлтэй дүүргийн XII хороон дахь 132 дугаар сургууль, 220 дугаар цэцэрлэгийн цогцолборт өнөөдөр нийслэлийн Засаг даргын Зам, тээврийн асуудал хариуцсан төслүүдийн удирдагч Б.Отгонсүх, нийслэлийн ИТХ-ын төлөөлөгч, Хурал дахь АН-ын бүлгийн дарга Ц.Баатархүү, нийслэлийн Боловсролын газрын дарга Ж.Гантулга, нийслэлийн Авто замын хөгжлийн газрын дарга Ж.Тогтохбаяр, нийслэлийн Хот байгуулалт, ерөнхий төлөвлөгөөний газар, нийслэлийн Газрын албаны холбогдох албан тушаалтнууд ажиллалаа.
2016 оны арванхоёрдугаар сард ашиглалтад оруулсан тус цогцолборт 800 орчим хүүхэд боловсрол эзэмшиж байна. Гэвч хүүхдүүд тоглох талбайгүй, авто замгүй тул эцэг, эхчүүд нь хүүхдүүдээ хичээлд нь хүргэж өгөхөд бэрх. Тодруулбал, эл цогцолборыг уулын орой дээр барьснаас болоод авто зам, зогсоол барих боломжгүй болжээ. Зам нь энхэл донхолтой, хэт налуу тул хүүхдүүд гэмтэж бэртэх, явган хүн явахад бэрх гээд асуудал мундахгүй гардаг тухай тухайн орчмын иргэд удаа дараа гомдол гаргаж буй аж. Тиймээс нийслэлийн удирдлага газар дээр ажиллаж, шийдэл хайсан юм.
Тус хорооноос нийслэлийн ИТХ-д сонсогдсон төлөөлөгч Ц.Баатархүүд хорооны иргэд энэ талаарх гомдол, саналаа удаа дараа хүргүүлсэн аж. Тиймээс тэрбээр санаачилга гарган, газар дээр ажиллаж, холбогдох албаныханд нөхцөл байдлыг харуулсан юм. Үүсээд буй нөхцөл байдлын талаар тэрбээр “Улаанбаатар хотод хүүхдэд ээлтэй орчин бүрдүүлэхэд онцгойлон анхаарах учиртай. Боловсролын хүртээмжийг нэмэгдүүлнэ гээд хөрөнгийг нь шийдэж, сургууль, цэцэрлэгийн барилга барьж орхидгоо болих хэрэгтэй. Хүүхдэд ээлтэй орчин бүрдүүлдэггүй, тухайлбал, эцэг эхчүүд нь машинаа байрлуулах талбай, хүүхдүүд тоглох талбай байгуулдаггүй, стандартаа мөрддөггүйн тод жишээ бол Чингэлтэй дүүргийн XII хорооны 138 дугаар сургууль, 220 дугаар цэцэрлэгийн цогцолбор юм. Анх төлөвлөлтийн алдаа гаргаад уулын орой дээр барьчихсан. Хүүхдүүд хаана тоглох юм, эцэг эхчүүд нь хүүхдүүдээ яаж хүргэж өгөх вэ, цас орвол яах вэ гээд олон асуудал бий. Буруу төлөвлөлтөөр бүтээн байгуулалт хийснээс үүдээд алдааг залруулахын тулд нийслэлийн төсөв алдагдалд ордог. Тус цогцолборыг уулын орой дээр барьснаас болоод нэг тэрбум төгрөгийн алдагдал хүлээж байна. Түшиц ханыг нь барихын тулд 700 сая төгрөг зарцуулсан. Улаанбаатар хотын сургууль, цэцэрлэгийн орчны стандарт ямар байна вэ гэдэгт нэгдсэн үзлэг, шалгалт хийхгүй бол болохгүй юм байна. Нийслэлийн удирдлага тухайн цогцолборт үүсээд буй асуудлыг шийдэхээр газар дээр нь ажиллаж байна. Цаашид холбогдох албаныхан аливаа бүтээн байгуулалт хийхдээ газар дээр нь ажиллах хэрэгтэй. Албан тасалгаанаасаа ажил хийснээс болж удаа дараа ийм алдаа гаргах ёсгүй” гэсэн юм.
Тухайн цогцолбор орчимд авто зам тавих зураг нь ямар байх вэ, авто зам барьж болох уу, үгүй юү гэдгийг шийдэхэд бэрх гэдгийг холбогдох албаныхан хэлэв. Учир нь газрын байршил нь хэт налуу гэнэ. Мөн авто зам тавихаар бол ойролцоох айлуудын газрыг чөлөөлөхөөс авахуулаад олон асуудал үүсэх ажээ. Гэсэн ч нийслэлийн удирдлага тухайн цогцолборын асуудлыг онцгойлон анхаарч, гарц эрэлхийлнэ гэдгээ хэлсэн. Нийслэлийн Авто замын хөгжлийн газрын дарга Ж.Тогтохбаяр эхний ээлжинд тухайн цогцолборын дэргэд авто зогсоол байгуулах зураг төсөл гаргахаар болсон юм. Харин нийслэлийн ИТХ-ын төлөөлөгч Ц.Баатархүү тухайн орчмын иргэдтэй уулзаж, газар чөлөөлөлтийн асуудлаар зөвшилцөнө гэв.
