Монголын эрүүл мэндийн ажилтны үйлдвэрчний эвлэлийн холбоо Х.Ариунаатай холбогдож дараах байр суурийг авлаа. Тус үйлдвэрчний эвлэл эрүүл мэндийн ажилчдын цалин хөлсийг хоёр дахин нэмэгдүүлэх, улаан бүсэд ажиллаж байгаа эмч ажилчдыг эрсдэлийн даатгалд хамруулах зэрэг шаардлагыг Засгийн газарт хүргүүлээд байгаа билээ.
-Улаан бүсэд ажиллаж байгаа эрүүл мэндийн ажилчдын нөхцөл байдал ямар байна вэ. Хүний нөөцийн дутагдалд ороод байна гэсэн мэдээлэл байна. Үнэн үү?
-Үнэн. Хүний нөөцийн дутагдалд орсон. Монголын эрүүл мэндийн ажилтны үйлдвэрчний эвлэлийн холбоо, Монголын үйлдвэрчний эвлэлийн холбоо хамтарсан мэдэгдлээ УИХ, Засгийн газарт хүргүүлсэн. Эрүүл мэндийн ажилчид маш олноороо өвдөж, тусгаарлалтад орж байгаа нь эмнэлгийн хүний нөөцийг хомсдуулах эхний шалтгаан болж байна. Эмч ажилчид өвдөж, туйлдаж ядарч байна. Дээр нь ар гэрийнхэн, үр хүүхэд нь өвдөж байна. Эрүүл мэндийн салбар маш хүнд байдалд орсон. Эмнэлэг байхгүй тул эрүүл мэндийн ажилчид гэрээрээ тусгаарлагдаж, өөрсдийгөө эмчилж байна.
-Цалин хөлсний хувьд хангалттай байж чадаж байна уу?
-Үнэхээр ханлатгүй байгаа. Үйлчилгээний гэх ангилалд хамаардаг асрагч, сувилагч, нярав, жолооч гэх мэт ажилчид хагас сард 207 мянган төгрөгийн цалин авдаг. Энэ нь тэр чигтээ цалингийн зээлд суутгагддаг. Сүүлийн цалингийн тал нь ч цалингийн зээлд явдаг. Эрүүл мэндийн салбар элгээрээ хэвтэж байна. Манай үйлдвэрчний эвлэл удаа дараа энэ асуудлыг хөндөж, бүхий л шатны газарт хандсан. Ингэхэд нэг нь ч хариу ирүүлдэггүй. УИХ-ын байнгын хорооны дарга нь Эрүүл мэндийн яам руу үүрэг даалгавар өгдөг, яам нь харьяа газар луу үүрэг даалгавар өгдөг. Ингээд л бие бие рүүгээ чиглүүлсэн ямар ч үр дүнгүй ажил болж хувирсан. Өнөөдөр салбарын ажилчид бол ажлаа хаяад жагсахад бэлэн байна. Олон улсын эрүүл мэндийн ажилчид манайхаас 8-10 дахин өндөр цалин авч байна. Монгол Улсын Эрүүл мэндийн тухай хуульд зааснаар цар тахлын үед үндсэн цалинг 3 дахин нэмэгдүүлж олгоно гэх хуулийн заалтаа ч хэрэгжүүлж ажиллахгүй байна. Сонгууль, шагнал, номын баяр гээд халдварыг өргөн хүрээнд тарааж байхад салбарын сайд нь ямар ч арга хэмжээ авдаггүй. Монгол хүний амь нас өдөрт арваараа үгүйрч байхад наадам хийнэ гээд сууж байх юм.
-Улаан бүсэд ажиллаж байгаа эмч сувилагч нар ээлжээр ажиллаж чадаж байна уу. Хүний нөөцийн хомсдолд орсон тул ээлж солигдох ажилтангүй болсон гэх юм. Үнэн үү?
-Үнэн. Улаан бүсэд ажиллах хүний нөөц алга. Нарийн мэргэжлийн халдвар судлаач 6-8 хүн байдаг. Эдгээр нь өвдлөө гэхэд нарийн мэргэжлийн хүний нөөцгүй. Салбар хүндэрч байна. Өвдсөн эмч, ажилчдынхаа нөхөн олговрыг хурдан олгох хэрэгтэй. Халдвар авсан эмч эмнэлэгт хэвтэх гэхээр эмнэлэг байхгүй, эм авах гэхээр мөнгө байхгүй. Бодит байдао ийм л байна.
