Анх Өмнөд Африкт 11 сард бүртгэгдэж байсан коронавирусийн шинэ хувилбар болох омикрон штамм өдгөө дэлхийн 80 орчим оронд тархаад байна. Энэ штаммыг дельта хувилбартай харьцуулахад хэд дахин хурдтай тархах магадлалтай гэж шинжээчид үзэж байв.
Сүүлийн үеийн мэдээллээр, коронавирусийн омикрон штамм нь COVID-19-ийн өмнөх хувилбаруудтай харьцуулахад 70 дахин хурдтайгаар халдварлах чадвартай гэнэ. Энэ талаар Хонконгийн Их Сургуулийн судалгаанаас иш татан The Hill мэдээлжээ.
Судалгааны явцад эрдэмтэд хүний уушгины эд эсэд омикрон штамм хэрхэн нөлөөлж байгааг шалгасан байна. Улмаар ердөө 24 цагийн дараа омикрон штаммын вирусийн хэсгүүд дельта болон бусад хувилбаруудаас харьцуулахад 70 дахин хурдтайгаар нөхөн төлжиж байгаа нь тогтоогджээ. Гэхдээ омикроны нөхөн төлжих цар хүрээ нь вирусийн анхдагч хувилбараас 10 дахин бага байсан гэнэ. Эндээс харахад, омикрон штаммын халдвараас үүдсэн өвчний явц төдийлөн хүндрэхгүй байж мэднэ гэсэн таамаглалыг дэвшүүлж болох юм, гэхдээ хүний дархлаа зэрэг олон хүчин зүйлээс хамаарна гэж эрдэмтэд мэдэгдсэн байна.
Омикроны 4 аюул
ӨАБНУ-ын Эрүүл мэндийн даатгалын Discover Health компани Өмнөд Африкт омикрон штаммаас үүдэлтэй коронавирусийн давлагааны эхний гурван долоо хоногийн нөхцөл байдлын мэдээг нийтэлжээ. Энэ компани нь 3,7 сая үйлчлүүлэгчтэй, мөн ӨАБНУ-ын аль ч эмнэлэг эсвэл эрдэм шинжилгээний хүрээлэнд байхгүй асар их статистик мэдээллийн сантай юм. Улмаар энэ компани омикрон штаммын 78 мянган халдварын тохиолдлыг багтаасан нийт 211 мянган шинжилгээ, өвчний тохиолдлын мэдээлэл бүхий тайланг Өмнөд Африкийн анагаах ухааны судалгааны зөвлөлтэй хамтран бэлтгэсэн байна. Discover Health компанийн мэдэгдсэнээр, өнөөдөр Өмнөд Африкт илэрч буй коронавирусийн халдварын нийт тохиолдлын 90 гаруй хувь нь омикрон штаммаар үүсгэгдсэн гэнэ.
Вакцины үр дүн буурах хэдий ч энэ штаммаас хамгаална
Омикрон штаммын халдварын үед өвчин хүндрэх, эмнэлэгт хэвтэхээс Пфайзер вакцины хоёр тун хэрхэн хамгаалж байгаа талаар Discovery Health компанийн шинжээчид судалсан байна.
Судалгааны дүнгээс харахад, вакцины хоёр тун тариулсан хүмүүс вакцинд хамрагдаагүй хүмүүстэй харьцуулахад омикрон штаммаас хамгаалагдах үзүүлэлт нь 33 хувиар их байсан гэнэ. Судлаачдын онцолсноор, дельта штаммаас вакцин 80 хувь орчим хамгаалж байсантай харьцуулахад энэ нь хавьгүй доогуур үзүүлэлт ч гэлээ вакцин омикроноос хамгаалж байгаа аж.
Харин эмнэлэгт хэвтэн эмчлүүлэх шаардлагатай болох хүртэл өвчин хүндрэхээс хоёр тун вакцин 70 хувь хамгаалж байгаа нь тогтоогдсон байна. Дельта штаммын халдварын үед энэ үзүүлэлт 93 хувьтай байжээ.
Давтан халдвар авах эрсдэл өндөр
Өмнөх хувилбаруудын халдвар авсны дараа үүсэх дархлаа омикрон штаммтай тэмцэхэд төдийлөн өндөр үр дүнтэй биш байгаа гэнэ.
Гуравдугаар давлагааны үеэр дельта штаммын халдвар авсан хүн омикрон штаммын халдвар авах эрсдэл 40 хувь, хоёрдугаар давлагааны үеэр бета штаммаар халдварласан хүмүүсийн эрсдэл 60 хувь, D614G хувилбар Өмнөд Африкт давамгайлж байх үед халдвар аваад эдгэрсэн хүмүүс омикрон штаммаар халдварлах эрсдэл 73 хувьтай байсан гэж судлаачид онцолсон байна.
Өвчин хүндрэх, эмнэлэгт хэвтэх эрсдэл бага
Шинжээчдийн онцолсноор, коронавимрусийн эхний давлагааны үеийнхтэй харьцуулахад омикрон штаммын халдвараас үүдэлтэйгээр эмнэлэгт хэвтэх тохиолдол 29 хувиар бага байсан гэнэ.
Дельта штаммаар үүсгэгдсэн өвчний давлагаа болон дархлаажуулалтын дараа үүссэн дархлаа өндөр байгаатай холбоотой байж мэдэх юм гэж шинжээчид таамагласан байна. Одоогоор ӨАБНУ-ын сэхээн амьдруулах болон эрчимт эмчилгээний тасагт урьд өмнөх шиг өвчтөн олноор ирэхгүй байгаа гэнэ.
Хүүхдүүд өвчлөх нь их байна
Хэдийгээр ӨАБНУ-ын Халдварт өвчний үндэсний хүрээлэнгийн мэдээллээр 18 хүртэлх насны хүүхдүүд халдвар авсан тохиолдол одоо бага байгаа ч гэлээ дельта штаммын халдварын үеийнхтэй харьцуулахад хүүхдүүд омикрон штаммын халдвар авч, өвчин хүндрэх эрсдэл 20 хувиар их байгаа гэнэ.
“Дөрөвдүгээр давлагааны үед таваас доош насны хүүхдүүд халдвар аван эмнэлэгт хэвтэх тохиолдлууд нэмэгдэж байна” хэмээн судалгааны багийн эрдэмтэн онцолжээ.
Гэхдээ хүүхдүүдэд өвчин хөнгөн хэлбэрээр, хоолой өвдөх, хамар битүүрэх, толгой өвдөх, халуурах шинж тэмдгүүд эхний гурав хоногт ажиглагдаж байгааг эмч нар онцолсон байна.
