БШУЯ-наас сурагчдын сургуульд бэлтгэгдсэн байдлын үнэлгээ, хоцрогдлын оношилгооны судалгаа, хоцрогдол арилгах төлөвлөгөөний талаарх мэдээллийг өгч байна.
ГУРВАН НАСТНУУДЫГ ХОЁРДУГААР САРЫН 14-НӨӨС ЦЭЦЭРЛЭГТ АВНА
Гурван настай хүүхдүүдийг хоёрдугаар сарын 14-нөөс цэцэрлэгт авна. Хоёр насандаа бүртгэлээс хасагдсан хүүхдүүдийг шинээр бүртгэнэ. Энэ нь нэлээн асуудал дагуулна байх.
Гурван настнуудыг 100 хувь цэцэрлэгт хамруулах боломжгүйг та бүхэн ойлгох хэрэгтэй. Гурван настай 47 мянган хүүхдийг л цэцэрлэгт хамруулах боломж бий. Тиймээс төрийн өмчит цэцэрлэгийн багтаамжийг нэлээн шахна. Хувийн цэцэрлэгүүдийн багтаамжид тооцоо хийж, хоёр, гурван настай хүүхдүүдийг хамруулахад онцгойлон анхаарна.
Сургуулийн өмнөх боловсролд
- Гурван настай хүүхдүүд 61 хувь
- Дөрвөн настай хүүхдүүд 86 хувь
- Таван настай хүүхдүүдийг 100 хувь хамруулахыг зорьж хамрагдаж байна.
СУРГУУЛЬДАА ОЧИЖ, БАГШ, АНГИЙНХАНТАЙГАА УУЛЗАЖ ҮЗЭЭГҮЙ
БҮХЭЛ БҮТЭН ҮЕ БИЙ БОЛСОН БАЙНА
3-5 насандаа эзэмших ёстой чадварууд нь жил ирэх тусам буурч байна. Сурах суурь буюу унших, тоо бодох чадварт анхаарах шаардлагатай.
7-14 насны хүүхдийн 61.6 хувь нь унших чадвар эзэмшсэн байна. 10 хүүхдийн 6 нь унших чадвартай гэсэн үг. Мөн насны хүүхдийн 51.5 хувь нь буюу 2 хүүхдийн нэг нь л тоо бодох чадвартай байна. Энэ нь манай улсын боловсролын салбарт үүсэж буй хамгийн том асуудал юм.
Улс орон даяар хийсэн судалгааны хамгийн эмзэг бүлэг нь 2, 3-р ангийн хүүхдүүд байна. Тэд сургуульдаа очиж, багш, ангийнхантайгаа уулзаж үзээгүй бүхэл бүтэн үе бий болсон байна.
Хоёрдугаар ангийн хүүхдүүд уншиж чадах ч, юу уншиж буй утгаа ойлгодоггүй. Тоог нэмж чадах ч нийлбэр нь юуг илэрхийлж байгааг ойлгох мэдлэг, чадвар хоцрогдсон байна. Бүх ангид сурлагын хоцрогдол үүсжээ.
-БШУ-ны сайд Л.Энх-Амгалан:
-Вакцинжуулалт сайн, хүүхдүүдийн өвчлөл бага байсан учраас бид өнгөрсөн намар хичээлийг эхлүүлсэн. Танхим, цахим хосолсон хөтөлбөрийг хэрэгжүүлсэн нь үр дүнтэй байсан.
5/9-ийн зарчмаар хичээллүүлэхэд 69 цэцэрлэг, 332 сургуульд халдвар илэрсэн. Гэхдээ халдварын тохиолдлын тоо маш цөөн байсан нь танхим, цахимаар хослуулан хичээллэсэнтэй холбоотой. Голомтолсон халдвар гараагүй.
Сургууль, цэцэрлэгийг хаахгүй. Аль болох танхимаар хичээллүүлэхийг UNESCO зөвлөсөн.
Энэ намраас төрийн өмчийн бүх сургуулиудад сэтгэлзүйч ажиллуулна. Цар тахлын энэ үед сургууль бүр сэтгэлзүйчтэй байх нь чухал юм.
40-ӨӨС ДООШ НАСНЫ ЭЦЭГ ЭХЧҮҮД ХҮҮХЭДТЭЙГЭЭ САЙН
АЖИЛЛАСАН НЬ СУДАЛГААГААР ХАРАГДСАН
Цахим хичээлийн үр дүн муу гарсан. Хичээлийн 60-70 хувийг цахимаар судалсан учраас хүүхдүүдэд хичээлийн хоцрогдол үүссэн. Тиймээс хичээлийн хоцрогдлыг нөхөх төлөвлөгөөг гаргасан.
Гэхдээ өмнө нь ч хүүхдүүд хичээлийн хоцрогдолтой байсан. Дээр нь цар тахлын улмаас хичээлийн хоцрогдол бүр даамжирлаа. Судалгаанд хамрагдсан хүүхдүүдийн 23 хувь нь техник технологи, дата зэрэг байхгүйгээс хичээлээс хоцорсон байна.
40-өөс доош насны эцэг эхчүүд хүүхэдтэйгээ сайн ажиллажээ. Харин үүнээс дээш насныхан хүүхэдтэйгээ тааруу ажилласан нь судалгааны үр дүнгээр харагдсан. Цаашдаа бүх сургалтыг танхимаар хичээллүүлэхэд анхаарч ажиллана. Сүүлийн хоёр жилд 2000 хүүхэд сургууль завсардах эрсдэлтэй байна гэх тоон үзүүлэлт гарсан нь хамгийн харамсалтай мэдээ юм.
