НОСК-ын дарга М.Говьсайхан “Буянт-Ухаа 2” хорооллын иргэдийг орох оронгүй болохоор зүтгэж байна. Уг нь Засгийн газраас иргэдээ орон сууцжуулах бодлого хэрэгжүүлж, түрээсийн орон сууцны хөтөлбөрийг анх баталж байсан. Гэтэл энэ удаа төрийн бодлогын залгамж үгүй болжээ.
Тодруулбал, тус хороололд зорилтод бүлгийн 972 өрхийг 2019 онд түрээслээд өмчлөх болон энгийн түрээсийн журмаар гэрээ байгуулан оруулсан. Тэдний 50 орчим хувь нь энгийн түрээсийн гэрээтэй. Мэдээж анх “Буянт-Ухаа 2” хорооллыг барьж байхад Төрийн орон сууцны корпорацийн /ТОСК/ мэдэлд байсан ашиглалтад орох үед нь Нийслэлийн орон сууцны корпорацид /НОСК/ шилжүүлснийг уншигчид санаж байгаа.
Гэтэл одоо НОСК-ийн зүгээс түрээслэгчид иргэдийг энэ оны сүүлээр байрнаасаа гар гэх утга бүхий гэрээ байгуулж, дахин сунгахгүй гэсэн тайлбар өгсөн байна.
Иргэд энэ орон сууцанд анх орох үед Барилга хот байгуулалтын сайд байсан Х.Баделхан “Улаанбаатар хотын захиргаа болон Говь-Алтай, Булган аймгийнхан 5 жил түрээслүүлээд дараагаар нь өмчлүүлж болно гэсэн шийдвэр гарч байна.” гэж мэдэгдсэн. Оршин суугчид ч өөрсдийн нөхцөл болон анхны хэлцлийн дагуу зарим нь өмчлөх, нөгөө хэсэг нь түрээслэх гэрээ байгуулсан байдаг.
Гэтэл НОСК-д очиж гэрээ хийхэд анхны 5 жилийн гэрээг 3 гэж ярьж байгаад 2 жилээр хийж гэрээгээ тухайн жилд нь үргэлжлүүлээд явна гэдэг тайлбар өгч байж.
Ингээд анх байранд орохдоо хийсэн гэрээ нь 2 жил байж хугацаа нь дуусгавар болсон учраас дахин сунгах тухай асуудал яригдаж, өнгөрсөн нэгдүгээр сард хэрэгжүүлж эхэлсэн байна.
Хамгийн хачирхалтай нь анх 5 жилийн гэрээ хийнэ гэж байсан бол энэ онд оршин суугчидтай гэрээ хийхдээ ердөө ганцхан жил буюу 2022 оны 12 дугаар сарын 31 хүртэл сунгажээ. Оршин суугчид тухайн гэрээний заалтыг хараад гарын үсэг зурахгүй анхны нөхцөл өөрчлөгдсөн байна гэхэд нь “Тэгвэл одоо таны 2 жилийн гэрээний хугацаа дууссан тул байраа чөлөөлж өг. Эсвэл 1 жилээр гэрээгээ дахин сунгаад 3 жилээ гүйцээж амьдар” гэдэг шаардлага тавиад байна.
Тиймээс тус хорооллын энгийн түрээсийн гэрээтэй оршин суугчид ирэх өвөл байрнаасаа хөөгдөхдөө тулж, нийслэлийн удирдлагууд болон салбарын сайдад хандахаар болоод байгаа аж.
Уг нь энгийн түрээсээс түрээслээд өмчлөх хэлбэр рүү ч шилжих боломжтой гэж анх ярьж байсан ч өнөөдрийн НОСК-ын удирдлагууд түүнийг нь хүлээж авах байтугай иргэдийн удаа дараагийн хүсэлтэд ч хариулт өгөөгүй байсаар өнөөг хүргэжээ.
Тэднийхээр бол Засгийн газраас залуу гэр бүл, өндөр настан, хөгжлийн бэрхшээлтэй иргэд, Төрийн албан хаагчид, газар чөлөөлөлтийн гэсэн ангилалд хамаарах зорилтод бүлгийн иргэдийг гудамжинд хөөж ёстой юу ч биш бололтой.
Түүнчлэн иргэдийн хувьд өнгөрсөн хугацаанд түрээсийн төлбөрөө цаг хугацаанд барагдуулж, элдэв асуудал үүсгэлгүй гэрээний үүргээ биелүүлж байхад гэнэтийн шийдвэр гаргаж байгаа нь “Буянт-Ухаа 2” хорооллыг Хөгжлийн банкны зээлээр барьсантай холбоотой. Тиймээс тухайн орон сууцнуудыг түрээслэгч иргэдээс нь булаан авч бэлэн мөнгөөр борлуулж, тус банкны өрийг дарах гэж байна гэх хардлага ч яваад эхэлчхэж.
Эх сурвалж: erennews.mn
