Нийслэлийн Ардчилсан Намын бүлгийн дарга, Нийслэлийн ИТХ-ын төлөөлөгч Д.Пүрэвдаваа төсвийн мөнгөнөөс хэвлэл мэдээлэл, олны танил эрхмүүдэд 2.3 тэрбум төгрөгийн төслийг шалгуургүйгээр олгож байгаа талаар мэдээлэл хийлээ.
Тэрбээр “Нийслэлийн ирэх оны төсвийн төсөлтэй танилцахад иргэдийн хүн амын орлогын албан татвар, ААН-ийн орлогын албан татвар дийлэнхийг нь эзэлж байна.
COVID-19 тахалтай холбоотойгоор манай ААН-үүд, иргэд амаргүй цаг хугацааг давсан. Дээрээс нь одоо өргөн хэрэглээний бараа, бүтээгдэхүүний үнэ маш ихээр өсөж байна. Гэтэл энэ төсөвт иргэдийн талд болон бизнес эрхлэгчдэд таатай орчин бүрдүүлэхэд чиглэсэн ямар ч дорвитой шийдэл, гарцыг гаргасангүй.
Тухайлбал, АН-ын бүлэг НӨАТ бол хяналтын татвар учраас иргэн, ААН-ийн 10 хувийг таван хувь болгох саналыг болон өөр бусад хөнгөлөлттэй нөхцөл байдал зэргийн тухай саналыг хэрхэн шийдвэрлэх тал дээр ямар ч гаргалгаа гаргасангүй.
Хотын дарга хэлэхдээ 2023 онд Улаанбаатар хот өөрийн гэсэн нүүрсний уурхайтай болно. Тэр уурхайн нөөц тогтоогдохоор тодотгол хийгээд хот тодорхой хэмжээний бүтээн байгуулалтыг хийнэ гэсэн. Энэ бол хэрвээ бүтвэл гэсэн үг. Гэтэл өөр эх үүсвэрүүд олон бий.
Энгийн жишээгээр, хотын стандартыг хэрэгжүүлэхэд бонд босгох, үнэт цаас гаргах зэрэг боломжууд нь Нийслэлийн Эрх зүйн байдлын тухай хууль батлагдсанаар нээлттэй болсон буюу хот орлогын олон талт байдлыг бий болгох боломжтой болсон. Харамсалтай нь энэ дээр ямар ч судалгааг нийслэлийн эрх баригчид хийсэнгүй” хэмээн ярилаа.
“Харин Яармагт 97 тэрбум төгрөгөөр баригдсан нийслэлийн төр захиргааны байгууллагын том ордон байна. Үүнийгээ хувийн байгууллагад зарчих. Хангарьд ордон өнөдөөр юу нь муудсан юм бэ. Эрх ямбатангуут тэр үнэтэй, тансаг байранд ажиллаа гээд юу өөрчлөгдөх вэ. Түүнийг 200 тэрбум төгрөгөөр борлуулаад түгжрэл зэрэг тулгамдсан асуудлаа, ядаж ажилчдынхаа цалингийн асуудлыг шийдвэл болдоггүй юм уу.
“Эрх баригчид нутгийн өөрөө удирдах байгууллагын эрхийг улам л бүдгэрүүлж байна”
Мөн өнөөдөр НИТХ байгууллага биш болчихлоо. Сард нэг удаа хуралддаг байсныг улиралд нэг болгож цөөрүүлсэн. Төлөөлөгчдөд тавхан минутад үг хэлэх боломж олгож байна. Уг нь нутгийн өөрөө удирдах байгууллага гэдэг Үндсэн хуулиар хамгаалагдсан нэгж. Гэвч эрх баригчид энэ нэгжийн эрхийг улам л бүдгэрүүлж байна.
Тухайлбал, өнөөдөр Хотын буюу Түгжрэлийн сайдтай болсон, дээрээс нь хотын төсвийг яагаад Засгийн газар шийдээд байгаа юм бэ. Тэгвэл иргэдийн хурал байгаад ямар хэрэг байгаа вэ.
Энэ жил гэхэд 300 гаруй тэрбум төгрөгөөр түгжрэлийг бууруулахад автобус авах нь зүйтэй гэдгийг зүгээр л Засгийн газрын түвшинд шийдсэн. Өөрөөр хэлбэл, Засгийн газрын хурал дээр бидний санал орохгүйгээр хоттой холбоотой асуудал шийдэгдэж байна.
“Цар тахлын хуулийн боломжийг ашиглаж төрийн албанд томилгоо хийгээд байна”
Түүнээс гадна, Цар тахлын хуулийг ашиглаж өнөөдөр төрд ажиллаж байгаа ялангуяа яам, тамгын газар, нийслэлийн агентлагуудад төрийн албаны тухай хуулиар томилгоо нь явагдахгүй байгаа нь асуудал. Монгол Улсад маш олон хууль тогтоомж, бодлогын бичиг баримтууд байгаа ч зүгээр л өөрсдөө тэрийгээ мөрдөхгүй байна.
Тухайлбал, агентлагийн дарга бол төрийн албаны шалгалт өгсөн, тодорхой хэмжээний төсвийн мэдлэгтэй, мэргэшсэн албан хаагч байх ёстой. Гэтэл Цар тахлын хуулиар шууд томилох эрх нь нээлттэй болсон учраас өнөөдөр энэ хүмүүс хуулийн ийм боломжийг ашиглан томилгоо хийгээд байна.
Мөн нийслэлийн сургалт, олон нийтийн төв гэдэг нь хэвлэлийн зардал гэсэн үг. Тиймээс тодорхой хэмжээнд хууль болон гаргаж байгаа аливаа шийдвэрийг сурталчлах, үйл ажиллагаагаа таниулахад энэ төрлийн зардлыг 100 хувь үгүйсгэж болохгүй. Нийслэлийн 1.5 сая хүнд өнөөдөр ямар шийдвэр журмууд хэрэгжиж байгааг ойлгож таниулахад тодорхой хэмжээний хөрөнгө тавигдах ёстой. Гол нь тэр зардал нь зохистой хэмжээнээсээ их байгаа эсэхийг нь л тодруулах хэрэгтэй. Түүнээс биш хэвлэлд зориулж тавигдсан мөнгө болгон буруу гэж хэлж болохгүй” гэсэн юм.
