Өмнөд Солонгост залуу эмэгтэйчүүд ирээдүйнхээ төлөө тэмцсэн жагсаал хөдөлгөөн өрнөлөө. Дэлхий дахинаа бэлгийн дарамт, хүчирхийллийн эсрэг өрнөж буй #MeToo хөдөлгөөнийг тус улсын эмэгтэйчүүд өөрийн оронд ийнхүү зохион байгуулжээ.
Энэхүү хөдөлгөөний ачаар эрх мэдэл, албан тушаалаа ашиглан эмэгтэйчүүдэд бэлгийн дарамт үзүүлж байсан эрчүүдийн нэр ил тод болж, олон арван жил нууцалж явсан энэ төрлийн хэргийн хохирогчид ч дуу хоолойгоо олон нийтэд хүргэх болсон билээ. Гэвч энэ нь бохир үг соёлт хэмээн тооцогддог феминизмийг Азийн энэ орны соёлд үргэлжлүүлж чадах болов уу гэдэг нь эргэлзээтэй болоод байгаа юм.
Өнгөрсөн сард л гэхэд алдартай “Apink” хамтлагийн дуучин Сон Наёон Инстаграмдаа “Охид бүхнийг хийж чадна” хэмээн бичсэнийг нь феминизмийг сурталчилсан утга агуулгатай хэмээн буруутгаж, хүчээр устгасан байна. Хэдэн сарын турш бэлгийн хүчирхийллийн тухай мэдээллүүд ил тод болж байгаа ч, тэдгээрийг илчилсэн хүмүүсийг эргүүлэн буруутгах эрсдэл байгааг эх сурвалжууд мэдэгдэж байгаа юм.
Гэвч 2018 оны нэг ялгаа нь Өмнөд Солонгос эмэгтэйчүүд дээрх эрсдэлийг даван гарч, дуу хоолойгоо олон нийтэд сонсгож чадна байх хэмээн үзэж байгаа аж. Тийм ч учраас #MeToo хөдөлгөөн олон саад, хязгаарыг давж чадна гэж найдаж байгаагаа зохион байгуулагчид нь ярьсан байна.
Өнгөрсөн нэдүгээр сард олон нийтийн прокурор Сео Жи-Хён нэгэн телевизэд өгсөн ярилцлагадаа Өмнөд Солонгосын Хууль зүйн яамны албан хаагч асан эрэгтэйг 2010 онд болсон оршуулах ёслолын үеэр өөрийг нь оролдож, ёс бус үйлдэл гаргасан хэмээн буруутган ярьжээ. Гэвч уг эрэгтэй тэрхүү явдлыг санахгүй байгаагаа хэлсэн байна.
Түүний олон нийтэд дэлгэсэн үг ийнхүү бусад хохирогчдыг зоригтой дуугарахад нөлөөлжээ. Прокурорууд бол Өмнөд Солонгосын нийгмийн элит хэсгийнхэн. Гэтэл уг эмэгтэй айж эмээхгүйгээр ийн илчилж байхад яагаад бид чадахгүй гэж хэмээн олон эмэгтэйг зоригжуулж чаджээ.
Тиймээс өнгөрсөн хэдэн долоо хоногт олон зуун эмэгтэй #MeToo хөдөлгөөнд нэгдэж, өөрт тохиолдсон явдлаа зоригтойгоор илчилж эхэлсэн байна. Үүний ачаар амбан захирагч Ан Хи-Жун нарийн бичгийн дарга эмэгтэйг хүчирхийлсэн хэрэг ил болж, улс төрийн ертөнцөд шуугиан дэгдээж, албан тушаалаасаа огцроход хүрчээ.
Түүгээр ч зогсохгүй утга зохиолын төрөлд Нобелийн шагналд нэгэнтээ өрсөлдөж байсан Ко Ун эмэгтэй зохиолчид бэлгийн дарамт үзүүлсэн хэрэг нь мэдэгдсэний дараа шүлгүүдийг нь Өмнө Солонгосын сурах бичигнээс хассан байна. Түүнчлэн Венецийн кино наадмаас Алтан арслан хүртсэн найруулагч Ким Ки-дук шинэхэн киноныхоо жүжигчин бүсгүйчүүдийг хүчрхийлэхийг завдсан хэрэгт буруутгагдаж байгаа аж.
Энэ мэтчилэн бэлгийн дарамт, хүчирхийлэл үйлдсэн гэх олон хэрэг нийгмийн бүхий л салбарт ар араасаа гарч ирж, олон нийтэд ил болоод буй. Мэдээллийг цааш дэлгэрүүлэн уншигч та бүхэнд хүргэх болно.
Б.Болормаа
