УИХ-ын чуулганы өнөөдрийн хуралдаанаар “Төрөөс мөнгөний бодлогын талаар 2020 онд баримтлах үндсэн чиглэл батлах тухай” тогтоолын төслийг хэлэлцэж байна.
Энэ үеэр Монгол Улс саарал жагсаалтад орсон тухай болон үүнтэй холбоотойгоор Монголбанкны ерөнхийлөгчийн хариуцлагын асуудал хөндөгдсөн юм.
УИХ-ын гишүүн Л.Энх-Амгалан:
-Ам.доллар өсөх эдийн засгийн нөхцөл байгаагүй. “Саарал жагсаалт”-аас л үүдсэн. Мэдээллээ нэг болгох хэрэгтэй. Гадаад өрийн асуудал байна. Валютын нөөцийн эх үүсвэрийг ганцхан Монголбанк бүрдүүлдэг гэж үзэхгүй байна. Экспортоосоо бүрдүүлэх хэрэгтэй. Өнөөдөр бид хоёр их наядын алдагдалтай төсөв батлах гэж байна. Энэ эрсдэлээ мөнгөний бодлого дээр тооцох хэрэгтэй. Энэ бүхнийг хэр тооцсон бэ?
Монголбанкны Ерөнхийлөгч Н.Баяртсайхан:
-Саарал жагсаалтаас гарах арга хэмжээний төлөвлөгөөг ФАТФ-аас гаргаж өгсөн. Байгууллага нэг бүрээр хийх ажлыг нь батлах хэрэгтэй. ҮАБЗ-д 2017 онд би “хар, саарал жагсаалт”-д орох нөхцөл бүрдлээ гэж танилцуулсан. Энэ зөвлөмж дээр ярилцаад бие биенээ буруутгах гэж оролдоод байгаа зүйлсийг бүгдийг зааж өгсөн. Засгийн газар, Монголбанк, ТЕГ, ШЕЗ, АТГ үнэлгээнд дурдсан газруудыг үе шаттайгаар шийдвэрлүүлэх арга хэмжээ ав гэсэн. Энэ зөвлөмжийг биелүүлсэн бол өнөөдөр бие бие рүүгээ хуруугаа заагаад суухгүй байсан байх.
УИХ-ын гишүүн Ж.Энхбаяр:
– Саарал жагсаалтад оруулсан асуудал нь зөвхөн сүүлийн хэдэн жилийн асуудал биш. Барууны хөрөнгө оруулалтын эсрэг үйл ажиллагаа амжилттай явагдаж дууслаа. Одоо Оюутолгой л үлдлээ. Үүний сануулга саарал жагсаалт болсон гэдгийг бид ойлгох хэрэгтэй. Түүнээс биш л одоогийн ярьж байгаа зүйлс нь зөвхөн шалтгаан. Үнэнхүү шалтгаан нь манай улсыг дүгнэж байгаа гадаадын хөрөнгө оруулалт, олон улсын байгууллагуудаас өгсөн үнэлгээ боллоо шүү дээ.Үүнээс гарахын тулд улс төрийн болон бодлогын арга хэмжээ чухал. Монголбанк саарал жагсаалтаас гаргахын тулд юу хийх вэ. Шаардлагатай бол Монголбанкны Ерөнхийлөгч огцор. Улсаа аврах хэрэгтэй.
Монголбанкны Ерөнхийлөгч Н.Баяртайхан:
– Миний хувьд саарал жагсаалтын асуудлаар хариуцлага хүлээхэд бэлэн гэдгээ УИХ-ын даргад мэдэгдсэн байгаа. Надад ажил албан тушаалтай зууралдаад сууя гэсэн бодол алга.
Манай улстай хамт гурван улс саарал жагсаалтад орсон. Нэгдүгээрт, Исланд. Исландыг Скандинавын бүх орон, Европын холбооны маш олон орон тус улсыг саарал жагсаалтад оруулахгүйн төлөө тэмцэж ажилласан. Хоёрдугаарт, Пакистаныг саарал жагсаалтад үлдээх үү, хар жагсаалтад оруулах уу гэх асуудал яригдахад Пакистаныг цээжээрээ хамгаалсан олон орон байгаа.
Гуравт, Монголын асуудлыг ярихад хэн ч дуугараагүй. Үүнд том дүгнэлт гарч ирнэ. Цаана нь гадаад харилцааны тухай асуудал байна. Монголд хөрөнгө оруулсан компаниудын гомдол ч бас гарсан.
Ер нь саарал жагсаалтад оруулсан асуудлыг Үндэсний аюулгүй байдлын зөвлөлд дээр хэлэлцэх ёстой, тэндээс маш тодорхой чиглэл гарах ёстой гэж үзэж байгаа. Дахиад яривал олон зүйл байгаа. Гэхдээ би яримааргүй байна.
Энэ бүгдийг нээлттэй ярьж болохгүй байна. Үндэсний аюулгүй байдлын зөвлөл дээр эсвэл хаалттай хуралдаанд ярья.
Ийм нөхцөл байдал үүсчхээд байхад амиа аргацаах гэсэн ийм үйл ажиллагаа явж байгаад би үнэхээр их харамсалтай байна. Энэ чинь улс орны хувь заяа, үндэсний эдийн засгийн аюулгүй байдалтай холбоотой асуудал” хэмээн мэдэгдлээ.
