УИХ-ын Хууль зүйн байнгын хорооны өнөөдрийн хуралдаанаар Монгол Улсын шүүхийн тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийн анхны хэлэлцүүлгийг хийж байна. Тус хуулийн төслийг Засгийн газар өнгөрсөн дөрөвдүгээр сард өргөн барьсан бөгөөд УИХ ажлын хэсэг байгуулсан. Ажлын хэсэг 75 зарчмын зөрүүтэй санал боловсруулсан. Ажлын хэсгээс оруулж ирсэн зарчмын зөрүүтэй саналаар санал хураалт явуулж байна. Хуулийн төслийн 23 дугаар зүйлтэй холбоотой асуудлаар гишүүд асуулт асуулаа.
УИХ-ын гишүүн Д.Ганбат: ШШГЕГ Засгийн газрын харьяанд байх юм уу, ШЕЗ-ийнхөө харьяанд байх юм уу. Шүүхийн шийдвэр биелэгдэхгүй бол яах юм бэ?
Хууль зүй дотоод хэргийн сайд Х.Нямбаатар: Засгийн газрын үйл ажиллагааны хөтөлбөрт ШШГ байгууллагын үйл ажиллагааг боловсронгуй болгох гэж орсон. Шүүхийн тухай хуулийг ажлын хэсэг дээр хэлэлцэж байх үед би ШШГ байгууллагыг хоёр салгая. Нэг нь хорих байгууллагуудыг удирдах газар чигээрээ, нөгөөх нь иргэний болон захиргааны хэргийн шийдвэр гүйцэтгэх байгууллагыг шүүх эрх мэдлийн харьяанд аваачъя, шүүх засаглалаас ангид, шүүхийн шийдвэрийг гарцаагүй хэрэгждэг зарчмыг нь хангая гэсэн агуулгаар зарчмын зөрүүтэй саналын томьёолол бэлдээд ажлын хэсгийн хуралдаанд хэд хэдэн удаа хэлэлцүүлэг хийсэн. ШШГ хуулийг бүхэлд нь шинэчилсэн найруулгыг боловсруулж өргөн барьсан. Ажлын хэсгийн гишүүд ярилцаад энэ том тогтолцооны өөрчлөлтийг хууль дагуулж өөрчлөхөө болъё. Ингээд Засгийн газар хаврын чуулганаар тусад нь хууль оруулж ирэхээр болсон. Шүүхийн шийдвэр хэрэгждэг байх ёстой. Гэтэл захиргааны хэргийн шийдвэр гүйцэтгэл 10 хүрэхгүй хувьтай, иргэний хэрэг 40 хүрэхгүй хувьтай явж байгаа.
