Эх, олон хүүхэдтэй өрх толгойлсон эх, эцэгт тэтгэмж олгох тухай хуульд нэмэлт, өөрчлөлт оруулах тухай хуулийн төслийг өнөөдрийн УИХ-ын чуулганаар хэлэлцэж, эцсийн хэлэлцүүлэгт бэлтгүүлэхээр боллоо.
УИХ–ын гишүүн Ц.Сандаг–Очир: Цэцийн дүгнэлт хүлээж авсантай холбогдуулаад энэ хуульд нэмэлт өөрчлөлт оруулахаар болж байна. Энэ жилийн төсөв батлагдсан. Тэтгэмжийн зардал төсөвт суугаагүй. Хэрэв Цэцийн дүгнэлтийг хүлээж авбал барагцаагаар 30-40 тэрбумын эх үүсвэр хэрэгтэй гэж ойлгож байна. Энэ мөнгийг хэзээ, хаана тусгах вэ?
Хөдөлмөр, нийгмийн хамгааллын сайд А.Ариунзаяа: Бид тооцоо судалгаа хийж үзсэн. Жилд 52 мянга орчим эхчүүд ажилдаа эргэн ороод цалинтай ээж хөтөлбөрөөс хасагддаг. Эдгээр эхчүүдийн мэдээллийн хүрээнд нөхрүүд нь ажил хөдөлмөр эрхэлж байгаа эсэх судалгааг гаргахад 20 мянга орчим аавууд ажил хөдөлмөр эрхлээгүй байна гэсэн судалгаа гарсан. Ингээд долдугаар сарын 1-ээс энэ хууль хэрэгжиж эхэлбэл, энэ жилийн хувьд 6.6 тэрбум төгрөгийн нэмэлт төсөв шаардлагатай гэсэн тооцоог гаргасан. Төсвийн тухайд төсвийн хуулийн зургадугаар зүйлийн 6.2.5 дахь заалтад төсөв нэмэгдүүлсэн аливаа шийдвэр төслийн дараа жилээс хэрэгжиж эхэлнэ гэж заасан байдаг. Гэвч Цэцийн дүгнэлт долдугаар сарын 1-ээс энэ хуулийг өөрчилж хэрэгжүүл гэсэн шийдвэр гарсан учир байнгын хороо долдугаар сарын 1-ээс эхэлж хэрэгжлүүлнэ гэсэн тооцооллыг гаргасан байна. Бид энэ жилийн төсөвт 196 мянган эхчүүдэд 92 тэрбум төгрөгийн тэтгэмж олгохоор суулгасан байгаа. Одоогийн гүйцэтгэлээс аваад үзэхэд нийт жилийн төсөв дотроо 6,6 тэрбум төгрөгийг суулгаад явах боломжтой гэж үзсэн учраас төсөв дотроо зохицуулалт хийх төлөвлөлтүүд гарсан байна. Энэ хуулийн зохицуулалттай холбоотойгоор төсвийн тодотгол хийх шаардлагагүй гэж үзэж байна.
УИХ–ын Б.Бат–Эрдэнэ гишүүн: Энэ хууль олон хүүхэдтэй эх эцэгт тэтгэмж олгох тухай хууль. Гэтэл сая хариултаас үзэхэд ганцхан эхчүүдийн тухай асуудал яриад байна. Өрх толгойлсон эх, эцгүүд ямар хэмжээнд байна. Зааглаад хэлж өгнө үү?
Хөдөлмөр, нийгмийн хамгааллын сайд А.Ариунзаяа: Өрх толгойлсон эцэг, эхийн тэтгэмжийг 7200 хүн авдаг. Үүнд ямар нэгэн өөрчлөлт орохгүй . Харин 0-3 насны хүүхдээ гэртээ асарч байгаа эхчүүд одоогийн байдлаар цалинтай ээж хөтөлбөрт хамрагдаж байна. Үүнд Цэц дээр 0-3 насны хүүхдээ асарч байгаа эцэг бас байдаг учир хэрэв эцэг эхийн аль нэг нь ажил хөдөлмөр эрхлээд аль нэг нь хүүхдээ хардаг бол хүүхдээ асарч байгаа эцэг эхийн аль нэгийг нь хамруулах нь зүйтэй гээд эцэг гэдэг нэршлийг хуулиар оруулж өгч байна. Ингэснээр жилд хүүхдээ гэртээ хардаг 20 мянга орчим эцэг хамрагдах боломж бүрдэх юм. Цэцийн дүгнэлтээр долдугаар сарын 1-ээс хэрэгжүүлж эхэл гэсэн шийдвэр гарсан учир энэ жилийн хувьд 20 мянган эцгээр тооцож үзвэл 6.6 тэрбум төгрөг шаардагдана. Энэ төсөв нь одоо байгаа төсөв дотроо зохицуулах боломжтой байна гэж харж үзсэн байгаа.
