ОХУ-ын Сангийн яамны мэдээгээр Үндэсний баялгийн сангаас хоёр сар дараалан валют “алга болж” байна. Таван жилийн турш газрын тос, байгалийн хийн орлогыг хуримтлуулж байсан тус сан 6-р сард 713 сая евро, 75 сая фунт стерлинг, 12.6 тэрбум япон иенийг алджээ. Мөн долдугаар сард түүний хөрвөх чадвар дахин 862 сая евро, 91 сая фунт стерлинг, 14.9 тэрбум иенээр буурчээ. Зургадугаар сарын 1-ний байдлаар тус сангийн хөрвөх чадвартай хэсэгт 51.585 тэрбум евро, 5.567 тэрбум фунт стерлинг, 809.814 тэрбум иен байсан бол наймдугаар сарын 1 гэхэд 50.01 тэрбум евро, 5.401 тэрбум фунт стерлинг, 782.313 тэрбум иен үлджээ.
Сангийн яам энэ их мөнгийг хаашаа, ямар зүйлд зарцуулсныг тайлбарласангүй. Тус улсын валютын нөөц бүрдүүлэгч гол эх үүсвэр алтны экспорт нь хоригт орж зогссон. Евро, фунт стерлинг, иен хаашаа ч юм алга болсонтой зэрэгцэн Сангийн яамны дансанд нэгэн зэрэг, яг л хаанаас ч юм шиг рубль гарч иржээ. Зургадугаар сард “Газпром” банк руу 50 тэрбум рубль, орон сууц, нийтийн аж ахуйг хөгжүүлэх санд 4.2 тэрбум рубль шилжүүлсэн. Мөн долдугаар сард агаарын тээврийн компаниудыг дэмжихэд ижил хэмжээний мөнгө хуваарилсан байна. Тухайлбал 34.3 тэрбум рубль Аэрофлот (хувьцааны нэмэлт гаралтаар), 11.9 тэрбум рубль Сибирьт очив.
Тус улсын Сангийн яам нь аливаа мөнгөн тэмдэгтийг рубль болгон хөрвүүлдэг. Гэвч хориг арга хэмжээний улмаас евро, фунт, иентэй бодит гүйлгээ хийх боломжгүй тул хөрвөлтийг Төв банкаар дамжуулан хийдэг болжээ. Үнэн хэрэгтээ ийм үйл ажиллагаа нь зүгээр л рубль “хэвлэх” явдал юм гэж MMI-ийн шинжээчид бичжээ. Ийм үйл ажиллагааны хоёр сарын хугацаанд Төв банк Сангийн яаманд зориулж 100.4 тэрбум рубль “хэвлэсэн” байна. Энэ жил Үндэсний халамжийн сангаас бараг дөрвөн их наяд рублийг төсвийн алдагдлыг санхүүжүүлэхэд зарцуулахаар төлөвлөжээ.
Эх сурвалж: The Moscow Times
