Засгийн газрын лхагва гарагийн ээлжит хуралдаанаас гарсан шийдвэрийг танилцуулж байна.
Өнөөдрийн хуралдаанаар:
- Монгол, Хятадын Засгийн газар хоорондын комиссын хуралдааны тухай,
- Засгийн газрын гадаад зээл, тусламжийн хөрөнгөөр хэрэгжиж байгаа төсөл, арга хэмжээний хэрэгжилтийн талаар,
Газрын тосны бүтээгдэхүүний нөөц тогтоох тухай зэрэг 20 орчим асуудал хэлэлцэх болон танилцахаар төлөвлөсөн.
-Хууль зүй, дотоод хэргийн сайд Х.Нямбаатар:
-Гадаадын хөрөнгө оруулагчдыг тонон дээрэмдсэн, хамтарч хувьцаа эзэмшиж байсан хүмүүс нь хууль хүчний байгууллагатай хамтран дээрэмдсэн хэргүүдийн судалгаа түүврүүдийг гаргаж байна.
Бид Улсын ерөнхий прокурор болон мөрдөн шалгах чиг үүрэгтэй байгууллагуудын удирдлагуудтай аравдугаар сарын 28-нд ажлын хэсгийн санал хүсэлтээ гардуулна.
2012 оноос 2022 оны хооронд гадаадын хөрөнгө оруулалттай ААН-үүд хэрхэн хохирсон, энэ хэрэгт хэн хэн холбогдсон, ямар прокуроор хяналт тавьж ажилласан, хэргүүд хэрхэн хаагдсан талаарх мэдээллийг олон нийтийн мэдээллийн хэрэгслээр дэлгэрэнгүй хүргэнэ.
Үүнээс маш олон зүйл гарч ирнэ. Монгол Улсын ерөнхий прокуророор ажиллаж байсан, Тагнуулын байгууллагын даргаар ажиллаж байсан, Үндэсний аюулгүй байдлын зөвлөлийн нарийн бичгийн даргаар ажиллаж байсан хүмүүсийн холбогдсон хэргүүдийг энэ сарын 28-нд танилцуулахаар бэлдэж байна.
-ЗГХЭГ-ын дарга Д.Амарбаясгалан:
-Эрүүл мэндийн салбарын шинэчлэлийг бодлогын түвшинд анхаарах үүрэг чиглэл өгсөн. “Өргөө” амаржих газрын асуудал олон нийтэд ил болсон. Энэ амаржих газартай холбоотой маргаантай асуудал нь яамны түвшинд яригдаж, захирлыг нь ажлаас чөлөөлсөн.
Засгийн газраас эл асуудлыг салбарынх нь хэмжээнд авч үзэх ёстой хэмээн үзсэн. Тиймээс салбарын хэмжээнд хяналт, шалгалт хийж, эх, хүүхдийн эрүүл мэндийн байгууллагуудад анхаарна.
Тиймээс өнөөдөр АТГ-т хүсэлт тавьж байна.
Хоёрдугаарт, МХЕГ-ыг татан буулгаж, салбарын хяналтын үйл ажиллагааг шалгалтыг салбарын яамдад хариуцуулна. Салбарын яамдаар дамжуулаад хүний эрүүл мэнд, амь настай холбоотой онцгой болон тусгай чиг үүргээс бусад боломжит чиг үүргийг хувийн хэвшил, ТББ-аар гүйцэтгүүлэх чиглэлийг барьж ажиллана.
Энэ хүрээнд 300 орчим орон тоо хэмнэнэ.
Мэргэжлийн хяналтын байгууллага 1600 гаруй алба хаагчтай. Уг байгууллага байгуулагдсанаас хойш 20 жилийн хугацаанд тодорхой үүрэг гүйцэтгэн ажиллаж ирсэн. Мэргэжлийн яамдад давхардсан 1400 ажилтан ажилладаг нь ил болсон.
Төр давхардсан хяналтаар хүндрэл учруулж байна хэмээн иргэдээс гомдол ирдэг. Үүний шалтгааныг бид олж харсан. Санхүүгийн зэрэг хяналтыг мэргэжлийн хяналтын байгууллага давхар хийж байна. Энэ нь олон нийт иргэдэд хүнд суртлыг үзүүлэх шалтгаан болсон гэж үзэж байна.
Мэргэжлийн хяналтын байгууллага нийт 26 чиглэлийн үйл ажиллагаа явуулдаг.
Засгийн газрын дотоод хяналт шалгалтын агентлаг байгуулна. Энэ нь яам, тамгын газрын үйл ажиллагаанд хяналт тавих юм.
