УИХ-ын чуулганы нэгдсэн хуралдаан эхэллээ.
Соёлын бүтээлч үйлдвэрлэлийг дэмжих тухай хуулийн төсөл болон хамт өргөн мэдүүлсэн хуулийн төслүүдийг хэлэлцэх эсэх асуудлыг хэлэлцэж байна.
УИХ-ын гишүүн Н.Ганибал: Соёлын бүтээлч үйлдвэрлэл гэж яг юуг хэлээд байна вэ?
Соёлын сайд Ч.Номин: Хүний оюун санаа, авьяас билэг дээр суурилж, оюуны өмч, техник технологитой уялдуулан гарган авч буй бүтээгдэхүүн үйлчилгээг хэлнэ. Дэлхийд 1995 оноос хойш хөгжиж буй 2.2 их наяд ам.доллар эргэлддэг том зах зээл. Энэ үйлдвэрлэлийг хөгжүүлсэн улсуудын ДНБ-ий дөрвөн хувийг соёлын бүтээлч үйлдвэрлэл эзэлдэг бөгөөд дараагийн 10 жилд 10 хувьд хүрэх боломжтой. Манай улсын хувьд соёлын салбарт үйл ажиллагаа явуулж буй 33 мянган аж ахуйн нэгжийг хууль эрх зүйн хувьд тодорхой болгож өгөх асуудлыг шийднэ. Манай улсын хувьд соёлын бүтээлч үйлдвэрлэлийг өв соёл, кино урлаг, дүрслэх урлаг, утга зохиол, тоглоом зэрэг 12 салбарын хүрээнд хөгжүүлнэ.
УИХ-ын гишүүн Ж.Сүхбаатар: Соёлын бүтээлч үйлдвэрлэлийн дэд бүтцийг хэрхэн шийдэх вэ. Парк, цогцолбор, кластерыг шийдэх, хөрөнгө оруулалтыг хэрхэн татах вэ. БНХАУ-ын Өвөр Монголын өөртөө засах оронд манай соёлыг дэлхий дахинд түгээж байна.
Соёлын сайд Ч.Номин: Бид орон нутгийн онцлог, өв соёлд нь суурилсан аялал жуулчлалыг хөгжүүлнэ гэж төлөвлөж байна. Музей номын сангуудад шаардлагатай үзмэрүүдийг бий болгох ёстой гэж харж байна. Үүнтэй холбогдуулан АНУ руу Монгол Улсын хилээр хууль бусаар гаргасан 3.6 сая ам.долларын өртөг бүхий палеонтологийн олдворуудыг энэ намартаа багтаан буцаан авчирна. Энэ мэтчилэн соёлын орон зайг тухайн орон нутаг болгонд хөгжүүлнэ. Тус хуулийн бас нэг онцлог нь байнга төрийн эх үүсвэрээс биш хувийн хэвшлийг татан оролцуулахад оршино.
