Саналаа өгөөгүй 659.787 + С.Ганбаатар = Монгол Улсын тав дахь Ерөнхийлөгч

 

Ардчилсан намаас Ерөнхийлөгчийн сонгуульд нэр дэвшигч
Халтмаагийн Баттулга нийт санал өгсөн сонгогчдын 38.1 хувийн саналыг авч, ялалт
байгуулсан ч 50+1 хувийн санал авч чадаагүй учраас дахин санал хураалт явуулахаас
аргагүйд хүрлээ. Товыг Сонгуулийн Ерөнхий хороо 14 хоногтоо багтааж зарлах
ёстой. Харин дахин санал хураалт явуулах хөрөнгийг төсвийн хөрөнгөөс гаргана.

 

Улсын хэмжээнд 1.318.511 сонгогч саналаа өглөө. Тэдний
олонхийн саналыг авсан Х.Баттулга, М.Энхболд нарын дунд дахин санал хураалт
явагдана. Өөрөөр хэлбэл саналаа өгсөн 1.318.511 сонгогч, саналаа өгөх ёстой
байсан ч ямар нэг шалтгаанаар ирээгүй 659.787 сонгогчийн дунд дахин санал
хураалт болох юм. Энд саналын хуудсаа хүчингүй болгосон, хоосон цаас уншуулсан
18.000 орчим сонгогчийг мөн мартаж болохгүй юм.

 

Одоо Сонгуулийн Ерөнхий хороо яаралтай ажиллаж, дахин
санал хураалтаа зохион байгуулах хэрэгтэй. Ингэж байж энэ жилийн наадмаар шинэ
Ерөнхийлөгч үг хэлэх боломж бүрдэх юм. Үгүй бол хоёр удаа сонгогдсон
Ц.Элбэгдорж 9 дэх удаагаа наадмыг нээх болчихоод байна. Түүнд уг нь олон жилийн
туршлага бий ч шинэ Ерөнхийлөгчтэй, шинэ төрийг хүсч байна шүү дээ.

 

Гурван нэр дэвшигч 600 мянган хүний санал авахын төлөө
өрсөлдөж байсан бол одоо 1.08 сая хүний санал авахын төлөө өрсөлдөнө. Өөрөөр
хэлбэл өрсөлдөөн улам л ширүүснэ гэсэн үг юм. Гэхдээ дахин сурталчилгаа хийж
цаг алдах шаардлага байхгүй. Х.Баттулга ямар мөрийн хөтөлбөртэй, ямар хэрэг
төвөгт орооцолдсон бүгдийг нь бид мэднэ. М.Энхболд ямар мөрийн хөтөлбөр дэвшүүлж,
ямар асуудлуудад холбогдож, ямар тайлбар өгснийг нь бас л мэднэ. Тэгэхээр одоо
хэн нь Монгол Улсын тав дахь Ерөнхийлөгч болох вэ гэдэг сонголтыг зөвхөн ард
түмэнд л үлдээ. За тэгээд С.Ганбаатарын төлөө саналаа өгсөн 400 мянга
бүртгэлтэй ч саналаа өгөхөөс татгалзсан 600
мянган сонгогчийн саналыг яаж өөртөө татах вэ энэ бол улс төрийн хашир
туршлагатай хоёр хүчний нэр дэвшигчдийн л асуудал болж байх шиг байна.

 

Харин ч энэ сонгууль \”долоогчдод” алганы амт үзүүлсэн үзүүштэй юм болчихлоо. Ирэх санал
хураалтад шударга сайхан өрсөлдөөсэй…