“Давсны хэрэглээг 5 грамм хүртэл багасгах 5 арга” мэдээлэл, сурталчилгааны долоо хоног эхэллээ. Уг арга хэмжээг ХХААХҮЯ, ЭМЯ, НЭМҮТ хамтран 7 дахь жилдээ зохион байгуулж байна. Арга хэмжээний хүрээнд:
1. НЭМҮТ, “5 грамм хүртэл багасгах 5 арга” зурагт хуудас болон мэдээлэл сурталчилгааны материал боловсруулж, нийгмийн цахим сүлжээгээр дамжуулан хүн амд хүргэх,
2. “Хоол үйлдвэрлэл, үйлчилгээний салбарын тогооч нар”-ын сургалт болно.
Сургалтаар Монголчуудын давсны хэрэглээг бууруулах үндэслэл, шаардлага, хоолны давсыг орлуулах аргууд, давсыг орлуулж болох бүтээгдэхүүнүүд, давс багатай хоолны цэс зэрэг эрүүл мэндэд ач тустай, танин мэдэхүйн сургалтууд орох юм.
3. НЭМҮТ, “Давс багатай бүтээгдэхүүн үйлдвэрлэлийг дэмжье” арга хэмжээнд оролцож буй аж ахуйн нэгжийн хүнсний бүтээгдэхүүн болон хоолны дээжийг цуглуулах,
4. НЭМҮТ,Нийслэлийн боловсролын газар хамтран цэцэрлэгийн эрхлэгч, эмч нарт “Хүүхэд давс бага хэрэглэж сурахад цэцэрлэг болон эцэг, эхчүүдийн оролцоо, дэмжлэг”сэдэвт сургалт хийх,
5. “Давс багатай бүтээгдэхүүн үйлдвэрлэлийг дэмжье” арга хэмжээнд оролцогч зарим аж ахуйн нэгжийн бүтээгдэхүүний давсын агууламжийг бууруулах ажлын явцтай ХХААХҮЯ танилцах,
6. Зарим ЕБС, их дээд сургуулийн зоогийн газрын хоолны давсны амтад оюутан, сурагчдаар мэдрэхүйн үнэлгээ хийлгэх,
7. НЭМҮТ, Нийслэлийн боловсролын газар хамтран ерөнхий боловсролын зарим сургуулийн захирал, менежер болон эмч нарт “Давсны зохистой хэрэглээг дэмжих сургуульд суурилсан арга хэмжээ”сэдэвт сургалт хийх,
8. ХХААХҮЯ, МХХ, ШУТИС хамтран “Давс багатай бүтээгдэхүүн үйлдвэрлэлийг дэмжье” арга хэмжээнд оролцож буй эмнэлэг, цэцэрлэгийн тогооч нарт “Бүтээгдэхүүний давсыг багасгах арга” сэдэвт онол, дадлагын сургалтхийх,
9. Бүх шатны боловсролын байгууллагын дэргэдэх зоогийн газрын хоолны давсыг багасгах асуудлаар БСШУСЯ-д албан захидал илгээх зэрэг үйл ажиллагааг зохион байгуулах юм.
Дэлхийн хэмжээнд жилд 1.7 сая хүн давс хэтрүүлэн хэрэглэсний улмаас зүрх судасны өвчлөлд нэрвэгдэж, нас барж байна. 10 хүн тутмын найм нь 5 граммаас их (дунджаар 11 г) давс хэрэглэж байна.
Давсны илүүдэл хэрэглээ нь зүрх судасны өвчин, цусны даралт ихсэлт, чихрийн шижин, хавдар зэрэг халдварт бус өвчин үүсэх нэг шалтгаан болж байгаа юм. Давс хэтрүүлэн хэрэглэсний улмаас дэлхийн хэмжээнд жилд дунджаар 1.7 сая хүн зүрх судасны өвчний шалтгаанаар нас барж байна гэсэн судалгаа бий.
Монгол улсын хүн амын нийт нас баралтын 77 хувийг халдварт бус өвчин (ХБӨ) эзэлж байгаа нь дэлхийн хүн амын нас баралтаас 6 пунктээр өндөр байна. Түүнчлэн 15-64 насны 3 хүн тутмын нэг нь 70 нас хүрэхээсээ өмнө зүрх судасны өвчин, чихрийн шижин, амьсгалын замын архаг өвчин болон хорт хавдарын аль нэгээс шалтгаалан нас барах эрсдэлтэй, 10 хүн тутмын найм нь 5 граммаас их (дунджаар 11 г) давс хэрэглэж байна. Үйлдвэрийн аргаар боловсруулсан хүнсний бүтээгдэхүүний 83 хувь, хоолны 81 хувь нь “давс ихтэй“ байгаа юм.
Нэгдсэн Үндэстний Байгууллагын 2030 он хүртэлх “Тогтвортой хөгжлийн зорилтод 2025 гэхэд дэлхийн хүн амын давсны хэрэглээг 30 хувь бууруулах”-аар; Монгол Улсын “Тогтвортой хөгжлийн үзэл баримтлал-2030”-ын 2.2.2-ын 3 дахь зорилтод “2016-2020 онд 10000 хүн амд ногдох зүрх судасны өвчлөлөөс шалтгаалсан нас баралтыг 17.4 хүртэл бууруулах”-аар; “Давсны хэрэглээг бууруулах үндэсний стратеги (2015-2025)-д хүн амын давсны хэрэглээг 2025 он гэхэд 2013 оны түвшингээс 30 хувь, үйлдвэрийн аргаар боловсруулсан хүнс болон хоолны давсны агууламжийг 40 хувиар бууруулахаар тус тус заасан.
Давсны хэрэглээг бууруулах арга хэмжээг үр дүнтэйгээр хэрэгжүүлж чадвал Монгол улс ирэх 15 жилийн хугацаанд нийт нас баралтын 50 гаруй хувийг сэргийлэх боломжтой. Нийгмийн эрүүл мэндийн үндэсний төвийн санаачлагаар, Монгол улс 2011 оноос эхлэн давсны зохистой хэрэглээний мэдээлэл сурталчилгааны дэлхийн 7 хоногийг тэмдэглэж ирсэн. Энэ жил “Давсны хэрэглээг 5 грамм хүртэл багасгах 5 арга” уриан дор 2018 оны гуравдугаар сарын 26-наас дөрөвдүгээр сарын 2-ны хооронд тэмдэглэж байна.
Давсыг зохистой хэрэглэцгээе.
